ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2023 ގެ ސައުތު މާލޭ ޒޯނުގެ ޗެމްޕިއަންކަން ކްރޮސްރޯޑްސް މޯލްޑިވްސްއިން ހޯދައިފިއެވެ.
މި މުބާރާތުގެ ޗެމްޕިއަންކަން ކްރޮސްރޯޑްސްއިން ހޯދީ އިއްޔެ ހަވީރު ކުޅުނު ފައިނަލް މެޗުގައި އަނަންތަރާ ދިގު މޯލްޑިވްސް އަތުން 7-5 ގެ ނަތީޖާއަކުން މޮޅުވެގެންނެވެ.
ފޯރިގަދަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ކްރޮސްރޯޑްސްއިންނެވެ. މެޗުގެ ނުވަވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ހަސަން ލައުހެވެ. އެކަމަކު އޭގެ ފަހުން އަނަންތަރާއިން ވަނީ ކުޅުން ރަނގަޅުކޮށް ތިން ލަނޑު ޖަހާފައެވެ. އެގޮތުން މެޗުގެ 12 ވަނަ މިނެޓުގައި މޫސާ ޒާހިރު އެ ޓީމަށް ނަތީޖާ އެއްވަރުކޮށްދިންއިރު، ގާތް ގާތުގައި އަބްދުﷲ ވިޝާލް ކާމިޔާބުކުރި ދެ ލަނޑާއެކު އަނަންތަރާއިން ވަނީ ލީޑު ނަގާފައެވެ. ނަމަވެސް ފުރަތަމަ ހާފު ނިމުމުގެ ކުރިން ނޫހް އިބްރާހީމް ވަނީ ކޮރޮސްރޯޑްސްއަށް ފަރަގު ކުޑަކޮށްދީފައެވެ.
މި މެޗުގެ ދެވަނަ ހާގު ފަށައިގެން ހަވަނަ މިނެޓުގައި އަނަންތަރާއިން އަލުން ލީޑު ފުޅާކުރީ އަޙްމަދު ޝުޖާއު އަލީ ކާމިޔާބުކުރި ލަނޑާއެކުއެވެ. އަދި އޭގެ ހަތަރު މިނެޓު ފަހުން ޒާހިރް ވަނީ އަނަންތަރާގެ ފަސްވަނަ ލަނޑު ޖަހައިދީފައެވެ.
އެކަމަކު މެޗުގެ ފަހުކޮޅު ކުޅުން ރަނގަޅުކޮށް ކްރޮސްރޯޑްސްއިން ވަނީ ގާތްގާތުގައި ކާމިޔާބުކުރި ލަނޑުތަކާއެކު އެ ޓީމު ކޮޅަށް ނަތީޖާ އަނބުރާލާފައެވެ. އެގޮތުން މެޗުގެ 33 ވަނަ މިނެޓުގައި ހަސަން ލައުހް އެ ޓީމަށް ލަނޑެއް ޖަހައިދިންއިރު، އޭގެ މިނެޓެއް ފަހުން އަބްދުﷲ އިޝާން ވަނީ ކްރޮސްރޯޑްސްއަށް ފަރަގު ކުޑަކޮށްދީފައެވެ. އަދި މެޗުގެ 34 ވަނަ މިނެޓުގައި ކްރޮސްރޯޑްސްއަށް ނަތީޖާ އެއްވަރުކޮށްދިނީ އިސްމާޢީލް ވަހީދެވެ. މި މެޗުގައި ކްރޮސްރޯޑްސްއިން ލީޑު ނަގާފައިވަނީ މެޗުގެ ފަހު މިނެޓުގައި ނޫހް ކާމިޔާބުކޮށްދިން ލަނޑާއެކުއެވެ. އަދި އިތުރު ވަގުތުގައި އެ ޓީމުގެ ހަތްވަނަ ލަނޑު ޖަހައިދިނީ ޝިފާޒް އާދިލެވެ.
މި މޮޅާއެކު ކްރޮސްރޯޑްސްއިން ސައުތު މާލޭ ޒޯނުގެ ޗެމްޕިއަންކަން ހޯދިއިރު، މި ޒޯނުގެ އެންމެ މޮޅު ކުޅުންތެރިއަކަށް ހޮވުނީ އެ ޓީމުގެ ހަސަން ލައުހެވެ. އަދި މި ޒޯނުގެ އެންމެ މޮޅު ކޯޗަކަށް ހޮވުނީ އަަންތަރާގެ ކޯޗު ނަސީހު މުޙައްމަދެވެ.
ސައުތު މާލޭ ޒޯނާއެކު މި އަހަރުގެ ރިސޯޓް ލީގުގެ ޒޯނު ބުރުގެ ކުޅުން ނިމުގެންދިޔައިރު، ދެން އޮންނާނީ މި އަހަރު މުޅިން އަލަށް ބާއްވާ ރިސޯޓް ސުޕަ ލީގެވެ. އެ މުބާރާތް ކުރިއަށްދާނީ ރިސޯޓް ލީގުގެ އެކި ޒޯންތަކުގެ ޗެމްޕިއަނުންގެ މެދުގައެވެ.