ރާއްޖޭގެ އަންހެން ޓެނިސް ޓީމަށް ތާރީޚީ މޮޅެއް

ރާއްޖެއިން ވާދަކުރާ ޓެނިހުގެ އެންމެ މަތީ ފަންތީ މުބާރާތުން އަންހެން ޓީމު ފުރަތަމަ ފަހަރަށް މޮޅެއް ހޯދައިފިއެވެ.

މިހާރު ކުރިއަށްދާ ބިލީޖީން ކިންގް ކަޕް އޭޝިއާ އަދި އޯޝޭނިއާ ގުރޫޕް ތިނެއްގައި ވާދަކޮށް ރާއްޖެއިން ތާރީޚީ ކާމިޔާބެއް ހޯދީ މުބާރާތް ކުރިއަށްދާ ޤައުމު ކަމަށްވާ ބަހްރެއިން ބަލިކޮށްގެންނެވެ. މި މެޗުން ރާއްޖެ މޮޅުވީ ފަސޭހަކަމާއެކު 3-0 އިންނެވެ.

އިއްޔެ ކުޅުނު މެޗުގެ ފުރަތަމަ ގޭމުގައި ރާއްޖޭގެ ލަޔާން މުޙައްމަދު ޝާމިން ވަނީ ސީދާ ދެ ސެޓުން ބަހްރެއިނުގެ ހާޖަރު ޒައިދާން ބަލިކޮށްފައެވެ. އެއީ 6-1 އަދި 6-2 އިންނެވެ. އަދި އާރާ އާސަލް އާޒިމް ނުކުތީ ބަހުރެއިނުގެ ސަލްމާ ފަރަގުالله އާ ދެކޮޅަށެވެ. މި ގޭމުގައި އާރާ ވަނީ 6-1 އަދި 6-0 އިން ކުރިހޯދާފައެވެ. މި މެޗުގެ ފުރަތަމަ ޑަބަލްސްގައި ނުކުތީ އާރާ އާއި ލަޔާން ޝާމިންގެ ޕެއާއެވެ. މި ގޭމުން ރާއްޖޭގެ ޕެއާ ސީދާ ދެ ސެޓުން ކުރިހޯދީ ސަލްމާ އާއި ހާޖަރު ޒައިދާންގެ ޕެއާގެ މައްޗަށެވެ. އެއީ 6-1 އަދި 6-0 އިންނެވެ.

މި ފަހަރުގެ މުބާރާތުގައި ވާދަކުރާ ރާއްޖޭގެ ޓީމުގައި ހިމެނެނީ އާރާ އާއި، ލަޔާން ޝާމިންގެ އިތުރުން ނަޔާރާ އުސާމާ އަލީ އަދި މިޝާލް މުޙައްމަދެވެ. މި މުބާރާތުގައި ރާއްޖެއިން މިދިޔަ އަހަރު އަލަށް ވާދަކުރިއިރު، ކޮންމެ އަހަރުކުވެސް އެންމެ ރަނގަޅު ނަތީޖާ ހޯދާ ދެ ޓީމެއް ޖެހިގެން އަންނަ އަހަރުގެ މުބާރާތުގެ ދެން އޮންނަ ގުރޫޕަށް ކޮލިފައިވާނެއެވެ.

އޭޝިއާ އަދި އޯޝޭނިއާ ގުރޫޕުގައި ހިމެނެނީ ރާއްޖޭގެ އިތުރުން ބޫޓާނާއި، ބުރޫނާއި ދާރުއްސަލާމާއި، އިރާނާއި، އިރާގާއި، ކިރްގިސްތާނާއި، ލާއޯސް އާއި، މަކާއޯ އާއި، ނޭޕާލާއި، ޤަތަރާއި، ސައުދީ އަރަބިއްޔާ އާއި، ތަޖަކިސްތާން އަދި ވިއެޓްނާމެވެ. މި އަހަރުގެ މުބާރާތުގައި 14 ޤައުމެއް ވާދަކުރާއިރު, މިއަދު ރާއްޖެ ނުކުންނާނީ މަކާއޯއާ ދެކޮޅަށެވެ.