ޔޫރޯ 2024 ކޮލިފައިން ގްރޫޕް ސީގައި ރޭ ފަހަތުން އަރައި އިޓަލީ ބަލިކޮށް، އަންނަ އަހަރުގެ މުބާރާތުގެ ޖާގައެއް އިންގްލަންޑުން ހޯދައިފިއެވެ.
އަމިއްލަ ޤައުމުގައި ރޭ ކުޅުނު މެޗުން އިންގްލަންޑް މޮޅުވީ 3-1 ގެ ނަތީޖާއަކުން ބަލިވެފައެވެ.
އެންމެ ފަހުން ބޭއްވި ޔޫރޯގެ ފައިނަލުގައިވެސް މި ދެ ޓީމު ވާދަކުރިއިރު، އެ ފަހަރުގެ ފައިނަލުން އިޓަލީ މޮޅުވީ ޕެނަލްޓީ ޖަހައިގެންނެވެ. އެކަމަކު އިންގްލަންޑުން ވަނީ މި ފަހަރުގެ ކޮލިފައިންގައި އިޓަލީއާ ދެކޮޅަށް ކުޅުނު ދެ މެޗުންވެސް މޮޅުވެފައެވެ. އެގޮތުން މާޗު މަހު ކުޅުނު އިޓަލީގެ ހޯމް މެޗުން އިންގްލަންޑް މޮޅުވީ 2-1 ގެ ނަތީޖާއަކުންނެވެ.
ވެމްބްލީ ސްޓޭޑިއަމްގައި ރޭ ކުޅުނު މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ އިޓަލީންނެވެ. މެޗުގެ 15 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ފޯވާޑް ޖިއަންލޫކާ ސްކަމާކާއެވެ. އެކަމަކު ފުރަތަމަ ހާފު ނިމުމުގެ ކުރިން މެޗުގެ 32 ވަނަ މިނެޓުގައި ލިބުނު ޕެނަލްޓީއަކުން ކެޕްޓަން ހެރީ ކޭން ވަނީ އިންގްލަންޑަށް ނަތީޖާ އެއްވަރުކޮށްދީފައެވެ. މިއީ އޭރިއާ ތެރެއިން އިންގްލަންޑުގެ ޖޫޑް ބެލިންހަމަށް އިޓަލީގެ ޖިއޮވާނީ ޑި ލޮރެންޒޯ ކުރި ފައުލަކާ ގުޅިގެން، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ދިން ޕެނަލްޓީއެކެވެ.
މި މެޗުގައި އިންގްލަންޑުން ފަހަތުން އަރައި ލީޑު ނެގީ މެޗުގެ 57 ވަނަ މިނެޓުގައެވެ. ބެލިންހަމް ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ފޯވާޑް މާކަސް ރަޝްފޯޑެވެ. އަދި މެޗުގެ 77 ވަނަ މިނެޓުގައި ކޭން ވަނީ އިތުރު ލަނޑެއް ޖަހައި، އިންގްލަންޑުގެ ލީޑު ފުޅާކޮށްދީފައެވެ. މިއީ ޤައުމީ ޓީމަށް ކޭން ކާމޔާބުކޮށްދިން 60 ވަނަ ލަނޑެވެ.
މި މޮޅާއެކު އަންނަ އަހަރުގެ ޔޫރޯގެ ޖާގައެއް އިންގްލަންޑުން ހޯދިއިރު، ގްރޫޕް ސީގެ އެއްވަނައިގައި އިންގްލަންޑް އޮތީ ކުޅުނު ހަ މެޗުން ލިބުނު 16 ޕޮއިންޓާއެކުއެވެ. ދެ ވަނައިގައި އޮތް ޔޫކްރެއިނަށް ވަނީ ހަތް މެޗުން 13 ޕޮއިންޓް ލިބިފައެވެ. ރޭ ކުޅުނު މެޗުން ޔޫކްރެއިން ވަނީ މޯލްޓާ އަތުން 3-1 ގެ ނަތީޖާއަކުން މޮޅުވެފައެވެ. އަދި ތާވަލުގެ ތިންވަނައިގައި އިޓަލީ އޮތީ ހަ މެޗުން 10 ޕޮއިންޓާއެކުއެވެ.
އިންގްލަންޑަކީ އަންނަ އަހަރުގެ ޔޫރޯއަށް ކޮލިފައިވި ނުވަވަނަ ޓީމެވެ. އެގޮތުން މުބާރާތް ބާއްވާ ޤައުމުގެ ގޮތުގައި ޖަރުމަނަށް ފުރުޞަތު ލިބިފައިވާއިރު، ދެން ކޮލިފައިވެފައިވަނީ އިންގްލަންޑުގެ އިތުރުން ބެލްޖިއަމާއި، ފްރާންސް އާއި، ޕޯޗުގަލާއި، ސްޕެއިނާއި، ސްކޮޓްލަންޑާއި، ތުރުކީ އަދި އޮސްޓްރިއާއެވެ.