ޔޫރޯ 2024 ކޮލިފައިން ގްރޫޕް ޖޭގައި ރޭ ކެޕްޓަން ކްރިސްޓިއާނޯ ރޮނާލްޑޯ ކާމިޔާބުކުރި ދެ ލަނޑާއެކު ޕޯޗުގަލުން ބޮޑު މޮޅެއް ހޯދައިފިއެވެ.
ރޭ ކުޅުނު މެޗުން ޕޯޗުގަލް މޮޅުވީ ރަށުން ބޭރުގައި ބޮސްނިއާއާ ވާދަކޮށް 5-0 ގެ ނަތީޖާއަކުންނެވެ.
ރޭގެ މެޗުގައި ޕޯޗުގަލުން ޖެހި ހުރިހާ ލަނޑެއް ކާމިޔާބުކޮށްފައިވަނީ މެޗުގެ ފުރަތަމަ ހާފުގައެވެ. މެޗު ޑޮމިނޭޓުކޮށްގެން ކުޅުނު ޕޯޗުގަލުގެ ކެޕްޓަން ރޮނާލްޑޯ ވަނީ ފުރަތަމަ 20 މިނިޓުގެ ތެރޭގައި ދެ ލަނޑު ކާމިޔާބުކޮއްފައެވެ. މި ދެ ލަނޑާއެކު އޭނާ ވަނީ ޤައުމީ ޓީމަށް 127 ލަނޑު ކާމިޔާބުކޮށްދީފައެވެ. ދެން މި މެޗުގައި ޕޯޗުގަލަށް ލަނޑުތައް ކާމިޔާބުކޮށްދިނީ ބުރޫނޯ ފެނާންޑޭސް އާއި ޖާއޯ ކަންސްލޯ އަދި ޖާއޯ ފީލިކްސްއެވެ.
މި މޮޅާއެކު ޕޯޗުގަލުން ވަނީ ކޮލިފައިންގައި ސައްތައިން ސައްތަ ރިކޯޑު ދަމަހައްޓާފައެވެ. އެގޮތުން ގްރޫޕް ޖޭގެ އެއްވަނައިގައި ޕޯޗުގަލް އޮތީ ކުޅުނު އަށް މެޗުންވެސް މޮޅުވެ 24 ޕޮއިންޓް ހޯދައިގެންނެވެ. މި ގްރޫޕްގެ ދެ ވަނައިގައި އޮތީ ރޭ ލަގްޒަމްބާގް އަތުން 1-0 ގެ ނަތީޖާއަކުން މޮޅުވެ، އަށް މެޗުން 16 ޕޮއިންޓް ހޯދާފައިވާ ސްލޮވާކިއާއެވެ.