ޔޫރޯ 2024 ކޮލިފައިން ގްރޫޕް ސީގައި ރޭ މޯލްޓާ ބަލިކޮށް، އަންނަ އަހަރުގެ މުބާރާތަށް ކޮލިފައިވުމުގެ އުއްމީދު އިޓަލީން ދަމަހައްޓައިފިއެވެ.
އަމިއްލަ ޤައުމުގައި ރޭ ކުޅުނު މެޗުން އިޓަލީ މޮޅުވީ ފަސޭހަކަމާއެކު 4-0 ގެ ނަތީޖާއަކުންނެވެ.
މި މެޗުގައި އިޓަލީގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ 23 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މޮއިސް ކީން ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު ޖިއަކޮމޯ ބޮނަވެންޓޫރާއެވެ. އަދި ފުރަތަމަ ހާފުގެ އިތުރު ވަގުތުގައި އިޓަލީން ލީޑު ފުޅާކުރިއިރު، ނިކޮލާ ބަރެއްލާ ދިން ބޯޅައަކުން މި ލަނޑު ކާމިޔާބުކޮށްދިނީ ފޯވާޑް ޑޮމެނިކޯ ބެރާޑީއެވެ.
މި މެޗުގެ ދެވަނަ ހާފުގައިވެސް އިޓަލީން އިތުރު ދެ ލަނޑު ކާމިޔާބުކުރިއިރު، މެޗުގެ 63 ވަނަ މިނެޓުގައި އެ ޓީމުގެ ތިންވަނަ ލަނޑު ޖަހައިދިނީ ދެވަނަ ލަނޑުވެސް ކާމިޔާބުކޮށްދިން ބެރާޑީއެވެ. އަދި އިޓަލީގެ ފަހު ލަނޑު މެޗުގެ އިތުރު ވަގުތުގައި ޑެސްޓިނީ އުޑޯގީގެ އެހީއާއެކު ޖަހައިދިނީ ބަދަލަކަށް ކުޅެން ނުކުތް ޑާވިޑޭ ފްރަޓޭސީއެވެ.
މި މޮޅާއެކު ގްރޫޕް ސީގެ ދެވަނައިގައި އިޓަލީ އޮތީ ކުޅުނު ފަސް މެޗުން ލިބުނު 10 ޕޮއިންޓާއެކުއެވެ. އެއްވަނައިގައި އޮތް އިންގްލަންޑަށް ފަސް މެޗުން ވަނީ 13 ޕޮއިންޓް ލިބިފައެވެ. ކޮލިފައިންގައި އަންނަ އަންގާރަ ދުވަހުގެރޭ އިޓަލީއާ ދެކޮޅަށް އިންގްލަންޑް ނުކުންނައިރު، އެ މެޗުން އިންގްލަންޑް މޮޅުވެއްޖެނަމަ, އަންނަ އަހަރުގެ ޔޫރޯއަށް އެ ޓީމު ކޮލިފައިވާނެއެވެ.
މި ގްރޫޕުގެ އަނެއް މެޗުގައި ރޭ ޔޫކްރެއިން ވަނީ އަމިއްލަ ދަނޑުގައި ނޯތު މެސެޑޯނިއާ އަތުން 2-0 ގެ ނަތީޖާއަކުން މޮޅުވެފައެވެ. އެއާއެކު ތާވަލުގެ ތިންވަނައިގައި ޔޫކްރެއިން އޮތީ ހަ މެޗުން ލިބުނު 10 ޕޮއިންޓާއެކުއެވެ. އަދި ހަތަރުވަނައިގައި އޮތް ނޯތު މެސެޑޯނިއާއަށް ހަ މެޗުން ލިބިފައިވަނީ ހަތް ޕޮއިންޓެވެ.