އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުން ބަންގްލަދޭޝް އަތުން ނިއު ޒީލަންޑް މޮޅުވެއްޖެއެވެ.
ޗެންނާއީގައި އެމް.އޭ ޗިދަމްބަރަމް ސްޓޭޑިއަމުގައި ކުޅުނު މި މެޗުން ނިއު ޒީލަންޑް މޮޅުވީ އަށް ވިކެޓުންނެވެ.
މި މެޗުގެ ގުރު ދިމާވުމުން ނިއު ޒީލަންޑުން ނިންމީ ހޮވުމަށެވެ. އެއާއެކު ބަންގްލަދޭޝް އެންމެ ފުރަތަމަ ކުޅެން އަރައި 50 އޯވަރު ހަމަވިއިރު ނުވަ ކުޅުންތެރިން ނުބައިވެގެން ހެދުނީ 245 ލަނޑެވެ. އެ ޓީމުން އެންމެ ރަނގަޅަށް ކުޅުނީ 75 ބޯޅައިން 66 ލަނޑު ހެދި މުޝްފިގުރް ރަހީމް އާއި ނުބައިނުވެ 49 ބޯޅައިން 41 ލަނޑު އެއްކުރި މުޙައްމަދުﷲ އެވެ. މި އިނިންގްސްގައި ނިއު ޒީލަންޑުގެ ލޮކީ ފާގަސަން ވަނީ ތިން ވިކެޓް ނަގާފައެވެ.
ޖަވާބުގައި ނިއު ޒީލަންޑް ކުޅެން އަރައި އެ ޓީމުން ވަނީ 42.5 ވަނަ އޯވަރުގައި ދެ ކުޅުންތެރިން ނުބައިވެގެން 248 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 67 ބޯޅައިން 89 ލަނޑު ހެދި ޑެރީލް މިޗެލް އާއި 107 ބޯޅައިން 78 ލަނޑު އެއްކުރި ޓީމުގެ ކެޕްޓަން ކޭން ވިލިއަމްސަންއެވެ.
10 ޤައުމު ވާދަކުރާ މި މުބާރާތުގައި ނިއު ޒީލަންޑުން މިހާތަނަށް ކުޅުނު ތިން މެޗުވެސް ކާމިޔާބުކޮށްފައިވާއިރު، އެ ޓީމު އޮތީ ތާވަލުގެ އެއްވަނައިގައި ހަ ޕޮއިންޓާއެކުއެވެ. އަދި ބަންގްލަދޭޝް އޮތީ ތާވަލުގެ ހަވަނައިގައި ތިން މެޗުން ދެ ޕޮއިންޓާއެކުއެވެ.