ޔޫރޯ 2024 ކޮލިފައިން ގްރޫޕް ބީގައި ރޭ ނެދަލަންޑްސް ބަލިކޮށް، ބާކީ ދެ މެޗު އޮއްވައި އަންނަ އަހަރުގެ މުބާރާތުގެ ޖާގައެއް ފްރާންސުން ހޯދައިފިއެވެ.
ރަށުން ބޭރުގައި ރޭ ކުޅުނު މެޗުން ފްރާންސް މޮޅުވީ 2-1 ގެ ނަތީޖާއަކުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު ފްރާންސުން ވަނީ ލީޑު ނަގާފައެވެ. މެޗު ފަށައިގެން ހަތްވަނަ މިނެޓުގައި ޖޮނަތަން ކްލައުސް ތަނަވަސްކޮށްދިން ފުރުސަތަކުން މި ލަނޑު ކާމިޔާބުކޮށްދިނީ އެ ޓީމުގެ ފޯވާޑް ކިލިއަން އެމްބާޕޭއެވެ. އޭގެ ފަހުން ފުރަތަމަ ހާފުގައި ނެދަލަންޑްސްއަށް ވަނީ ނަތީޖާ އެއްވަރުކުރަން ރަނގަޅު ފުރުސަތުތަކެއް ލިބި ބޭކާރުވެފައެވެ.
މި މެޗުގެ ދެވަނަ ހާފު ފަށައިގެންވެސް ފްރާންސުން ރަނގަޅު ކުޅުމެއް ދެއްކިއިރު، މި ހާފުގެ އަށްވަނަ މިނެޓުގައި އެ ޓީމުން ވަނީ ލީޑު ފުޅާކޮށްފައެވެ. މި ލަނޑުވެސް އެ ޓީމަށް ކާމިޔާބުކޮށްދިނީ އެމްބާޕޭއެވެ. މިއީ ޔޫރޯ ކޮލިފައިންގައި ކުޅުނު ހަ މެޗުގައި އެމްބާޕޭ ކާމިޔާބުކުރި ހަވަނަ ލަނޑެވެ.
މި މެޗުގައި ނެދަލަންޑްސްއިން ފަރަގު ކުޑަކޮށްފައިވަނީ މެޗު ނިމެން ހަތް މިނެޓަށް ވެފައި ވަނިކޮށެވެ. ސްޓީވަން ބާގްވިން ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު ކުއިލިންޗީ ހާޓްމަންއެވެ.
މި މޮޅާއެކު އަންނަ އަހަރުގެ ޔޫރޯގެ ޖާގައެއް ފްރާންސުން ހޯދިއިރު، ގްރޫޕް ބީގެ އެއްވަނައިގައި އެ ޓީމު އޮތީ ކުޅުނު ހަ މެޗުންވެސް މޮޅުވެ 18 ޕޮއިންޓާއެކުއެވެ. ދެވަނައިގައި އޮތް ގްރީސްއަށް ހަ މެޗުން 12 ޕޮއިންޓް ލިބިފައިވާއިރު، ނެދަލަންޑްސް އޮތީ ތާވަލުގެ ތިންވަނައިގައި ފަސް މެޗުން ނުވަ ޕޮއިންޓާއެކުއެވެ. މި ގްރޫޕުގެ އަނެއް މެޗުގައި ރޭ ގްރީސް ވަނީ ރަށުން ބޭރުގައި އަޔަލަންޑް އަތުން 2-0 ގެ ނަތީޖާއަކުން މޮޅުވެފައެވެ.