މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި އަފްޣާނިސްތާން އަތުން ފަސޭހަކަމާއެކު މުބާރާތް ބާއްވާ ޤައުމު ކަމަށްވާ އިންޑިއާ މޮޅުވެއްޖެއެވެ.
ދިއްލީގައި ހުންނަ އަރުން ޖެއިޓްލީ ސްޓޭޑިއަމުގައި ކުޅުނު މި މެޗުން އިންޑިއާ މޮޅުވީ އަށް ވިކެޓުންނެވެ.
މި މެޗުގެ ގުރު ދިމާވުމުން އަފްޣާނިސްތާން އެންމެ ފުރަތަމަ ކުޅެން އަރައި 50 އޯވަރު ހަމަވިއިރު އަށް ކުޅުންތެރިން ނުބައިވެގެން ހެދުނީ 272 ލަނޑެވެ.
އެ ޓީމުން އެންމެ ރަނގަޅަށް ކުޅުނީ 88 ބޯޅައިން 80 ލަނޑު ހެދި ޓީމުގެ ކެޕްޓަން ހަޝްމަތުﷲ ޝަހީދީ އާއި 69 ބޯޅައިން 62 ލަނޑު އެއްކުރި އަޒްމަތުﷲ އޮމަރްޒައިއެވެ. މި އިނިންގްސްގައި އިންޑިއާގެ ޖަސްޕްރީތު ބުމްރާ ވަނީ ހަތަރު ވިކެޓް ނަގާފައެވެ.
ޖަވާބުގައި އިންޑިއާ ކުޅެން އަރައި އެ ޓީމުން ވަނީ 35 ވަނަ އޯވަރުގައި ދެ ކުޅުންތެރިން ނުބައިވެގެން 273 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ 84 ބޯޅައިން 131 ލަނޑު ހެދި ޓީމުގެ ކެޕްޓަން ރޯހިތު ޝަރްމާއެވެ. އަދި އެ ޓީމުގެ ވިރާޓް ކޯލީ ވަނީ ނުބައިނުވެ 56 ބޯޅައިން 55 ލަނޑު ހަމަކޮށްފައެވެ.
10 ޤައުމު ވާދަކުރާ މި މުބާރާތުގައި އިންޑިއާއިން މިހާތަނަށް ކުޅުނު ދެ މެޗުވެސް ކާމިޔާބުކޮށްފައިވާއިރު، އެ ޓީމު އޮތީ ތާވަލުގެ ދެވަނައިގައެވެ. އަދި ފުލުގައި އޮތް އަފްޣާނިސްތާނުން މިހާތަނަށް ކުޅުނު ދެ މެޗުންވެސް ވަނީ ބަލިވެފައެވެ.