ޕެސިފިކް ކަނޑުގައި އުފެދިފައިވާ ކެޓެގަރީ 4 ގެ ބާރުގަދަ ތޫފާނެއް ކަމުގައިވާ ލިޑިޔާ މެކްސިކޯގެ އައްސޭރިފަށުގެ ސަރަޙައްދުތަކަށް އަރައިފިއެވެ. މި ތޫފާނާ އެކު ފެންބޮޑުވުމާއި, ކިސަޑު ފޭބުމުގެ އިތުރުން ބިންގަނޑު ކެނޑުމުގެ ހާދިސާތައް ހިނގާނެ ކަމަށް ބެލެވޭތީ, މެކްސިކޯގެ އައްސޭރިފަށުގެ ސަރަޙައްދުތަކުގައި މިހާރު ވަނީ ރައްކާތެރި ކަމުގެ ފިޔަވަޅުތައް އަޅަން ފަށާފައެވެ. އަދި, ރައްކާތެރި ހިސާބުތަކަށް ބަދަލުވުމަށް ކޯރުތަކާއި ފެންގަނޑުތައް ކައިރި ހިސާބުތަކުގެ އިތުރުން ފަރުބަދަމަތީ ސަރަޙައްދުތަކުގައި ދިރިއުޅޭ މީހުންނަށް ވަނީ އިރުޝާދު ދީފައެވެ.
މެކްސިކޯގެ ރައީސް އަންދްރޭސް މަނުއެލް ލޯޕޭޒް އޮބްރާދޯރް ވިދާޅުވީ, ޕެސިފިކް ކަނޑުގެ އައްސޭރިފަށުގައިވާ މެކްސިކޯގެ ރަށްތަކުގައި ރައްކާތެރި ކަމުގެ ފިޔަވަޅުތައް އެޅުމަށް މަސައްކަތް ކުރަމުންދާއިރު, އެ ކަމުގައި އެހީތެރިކަން ފޯރުކޮށްދޭން އެ ޤައުމުގެ އަސްކަރިއްޔާއަށް އަންގަވާފައިވާނެ ކަމުގައެވެ. މި ގޮތުން, އަސްކަރިއްޔާގެ 6,000 އަށްވުރެ ގިނަ ސިފައިން މިހާރު ވެސް އެ ސަރަޙައްދުތަކަށް ފޮނުވާފައިވާ ކަމުގައި އޭނާ ވިދާޅުވިއެވެ.
ތޫފާން ލިޑިޔާގެ އަސަރު އެންމެ ފުރަތަމަ ކޮށްފައި ވަނީ ފަތުރުވެރިންގެ މެދުގައި މަޤުބޫލު ރިސޯޓު ރަށެއް ކަމުގައިވާ ޕުއެރްތޮ ވަޔަރްތާއަށެވެ. މި ތޫފާނާ އެކު އެ ސަރަޙައްދަށް ގަޑިއަކު 220 ކިލޯމީޓަރުގެ ބާރުމިނުގައި ވައި ޖެހެމުންދާ ކަމުގައި މޫސުން ދިރާސާ ކުރާ އިދާރާ – ޔޫ.އެސް ނޭޝަނަލް ހަރިކޭން ސެންޓަރ (އެން.އެޗް.ސީ)ން ބުނެއެވެ. އެ އިދާރާއިން ބުނީ މެކްސިކޯގެ އައްސޭރިފަށުގެ ސަރަޙައްދުތަކަށް ފުރާނައަށް ނުރައްކާވާ ފަދަ ބާރު މިނެއްގައި ވައި ޖެހެމުންދާ ކަމަށާއި, ބޯކޮށް ވާރޭވެހެމުންދާ ކަމުގައެވެ.
ޕުއެރްތޮ ވަޔަރްތާގައި ދިރިއުޅޭ ރައްޔިތުން ރައްކާތެރި ކަމުގެ ފިޔަވަޅުތައް އެޅުމުގެ ގޮތުން ފިހާރަތަކާއި އެހެން ޢިމާރާތްތަކުގެ ދޮރުތަކުގެ ފިލައި ޖަހައި ބަންދުކޮށްފައިވާ ކަމުގައި އެ ރަށުގެ އޮފިޝަލުން ވިދާޅުވިއެވެ. އަދި, ގެތަކަށް ފެންވަނުން ހުއްޓުވުމަށް, ގެދޮރުގެ ކުރިމަތީގައި ވެލި ބަސްތާ ޖަހާފައިވާ ކަމުގައި ވެސް އޮފިޝަލުން ވިދާޅުވިއެވެ. މި ތޫފާނާ އެކު އެ ރަށުގެ އައްސޭރިފަށުގެ ސަރަޙައްދުތަކަށް ބިޔަ ރާޅުތަކާ އެކު އުދައަރަމުންދާ ކަމުގައި ވެސް އޮފިޝަލުން ވިދާޅުވިއެވެ.
ތޫފާން ލިޑިޔާގެ އަސަރު ކުރާނެ ކަމުގެ އިންޒާރު ދިނުމާ އެކު, މެކްސިކޯގެ އައްސޭރިފަށުގައިވާ ގިނަ ރަށްތަކުގެ ސްކޫލްތަކާއި އޮފީސްތައް ވަނީ ބަންދު ކޮށްފައެވެ. އަދި, ޢާންމު ދަތުރުފަތުރުގެ ޚިދުމަތްތައް ވެސް ވަނީ މެދުކަނޑައިލާފައެވެ. މި ތޫފާނާ އެކު މެކްސިކޯގެ ނަޔަރިތް, ސިނަލޮއާ, އަދި ހަލިސްކޯ ސްޓޭޓްގެ ސަރަޙައްދުތަކަށް 305 މިލިމީޓަރުގެ ވާރޭ ވެހޭނެ ކަމަށް ބެލެވޭ ކަމުގައި ވެސް އެން.އެޗް.ސީން ބުންޏެވެ.
މި ހަފުތާގެ ކުރީކޮޅު ވެސް މެކްސިކޯގެ ސަރަޙައްދުތަކަށް ބާރުގަދަ ތޫފާނެއް އަރާފައިވެއެވެ. ތޫފާން މެކްސްއާ ގުޅިގެން ހިނގި ފެންބޮޑުވުމުގެ ހާދިސާތަކުގައި ދެ މީހުން މަރުވިއެވެ. އަދި, ގިނަ ޢަދަދެއްގެ ގެދޮރާއި މުދަލަށް ގެއްލުން ލިބުނެވެ. އެ ތޫފާނުގެ އަސަރު އެންމެ ބޮޑަށް ކޮށްފައިވާ ސަރަޙައްދުތަކުގެ ތެރޭގައި އެ ޤައުމުގެ ދެކުނުގައިވާ ގެއްރޭރޯ ސްޓޭޓް ހިމެނެއެވެ.