ޔަހޫދީ އިސްރާޢީލުގެ ޖައްބާރުކަން ބޮޑުވެގެންވާ ބޮޑުވަޒީރު ބެންޖަމިން ނަތަންޔާހޫގެ އަމުރަށް ޣައްޒާއަށް ބޮން އަޅައި ފަލަސްޠީނުގެ މުސްލިމުން ޝަހީދު ކުރަމުންދާތީ ރަޝިޔާގެ ރައީސް ވްލަޑިމިޔަރ ޕުޓިން އެ ކަމާ މެދު ކަންބޮޑުވުން ފާޅު ކުރައްވައިފިއެވެ. ޕުޓިން ވިދާޅުވީ، ފަލަސްޠީނުގެ ޢާންމު ރައްޔިތުން ޝަހީދު ކުރަމުންދާ ޢަދަދު އިންތިހާއަށް އިތުރުވެފައިވާ ކަމުގައެވެ.
ޣައްޒާގެ މުސްލިމުން ޝަހީދު ކުރަން ޔަހޫދީ އިސްރާޢީލުން ފަށާފައިވާ އަސްކަރީ ހަރަކާތްތަކާ ގުޅޭ ގޮތުން ވާހަކަފުޅު ދައްކަވަމުން ޕުޓިން ވިދާޅުވީ، މި ކަމުގެ ފުރިހަމަ ޒިންމާ އެމެރިކާއިން އުފުލަން ޖެހޭނެ ކަމުގައެވެ. އަދި، މެދުއިރުމަތީގެ ސިޔާސަތުތައް އެމެރިކާއިން ކަނޑައަޅާފައި ވަނީ ފަލަސްޠީނުގެ ނިކަމެތި ރައްޔިތުންގެ ހައްޤުތައް އެއްފަރާތް ކޮށްފައި ކަމުގައެވެ. އެ މީހުންގެ ބޭނުންތަކަށް އެމެރިކާއިން އިޙުތިރާމު ނުކުރާ ކަމުގައެވެ.
އޭނާ އެމެރިކާއަށް ފާޑުވިދާޅުވެ ވާހަކަފުޅު ދައްކަވާފައި ވަނީ، ތުރުކީވިލާތުގެ ރައީސް ރަޖަބް ޠައްޔިބް އުރުދުޣާނާ ފޯނުން ގުޅުއްވައި ވާހަކަފުޅު ދައްކަވަމުން ކަމުގައި ރަޝިޔާގެ ރިޔާސީ ގަނޑުވަރު – ކްރެމްލިނުން ބުންޏެވެ. ޔަހޫދީ އިސްރާޢީލުގެ ހަމަލަތަކުގައި ޝަހީދު ކުރަމުންދާ ފަލަސްޠީނުގެ ޢާންމު ރައްޔިތުންގެ ޢަދަދު އިންތިހާއަށް އިތުރުވަމުންދާ ކަމާ މެދު ޕުޓިން ވަރަށް ބޮޑަށް ކަންބޮޑުވުން ފާޅު ކުރައްވާފައިވާ ކަމުގައި ކްރެމްލިނުން ބުނެއެވެ.
ފަލަސްޠީނުގެ މުސްލިމުންގެ މައްޗަށް ޔަހޫދީ އިސްރާޢީލުން ހިންގަމުންދާ އިސްތިޢުމާރީ ވެރިކަން ނިމުމަކަށް ގެންނަން ޖެހޭ ކަމަށާއި، ހަމަލަ ބަދަލު ކުރުން ވަގުތުން ހުއްޓައިލަން ޖެހޭ ކަމަށް ދެ ބޭފުޅުން އެއްބަސްވެ ވަޑައިގަންނަވާ ކަމުގައި ވެސް ކްރެމްލިނުން ބުންޏެވެ. އަދި، ދެ ފަރާތުގެ މެދުގައި ސުލްޙަ ޤާއިމު ކުރަން މަޝްވަރާތައް ފެށުމަށް ބާރުއެޅުމާ މެދު ދެ ބޭފުޅުން ވާހަކަފުޅު ދައްކަވާފައިވާ ކަމުގައި ވެސް ކްރެމްލިނުން ނެރުނު ބަޔާނެއްގައި ބުނެފައިވެއެވެ.
އިރާޤުގެ ބޮޑުވަޒީރު މުޙައްމަދު އަލް-ސުދާނީއާ އެކު ބޭއްވެވި ބައްދަލުވުމެއްގައި ވެސް ޕުޓިން ވަނީ މެދުއިރުމަތީގެ ސުލްޙައަށް އަލިއަޅުއްވައިލައްވާފައެވެ. ޕުޓިން ވިދާޅުވީ، ފަލަސްޠީނުގެ މިނިވަން ދަޢުލަތެއް ޤާއިމު ކޮށްދިނުމަކީ މިހާރުންމިހާރަށް ކުރަންޖެހޭ ކަމެއް ކަމުގައެވެ. އަދި، މެދުއިރުމަތީގެ މަސްރަޙު ހޫނުވެފައި ވަނީ، އެމެރިކާއިން ގެންގުޅޭ ނާކާމިޔާބު ސިޔާސަތުތަކާ ގުޅިގެން ކަމަށް އޭނާ ތުހުމަތު ކުރައްވައެވެ.
"މިއީ، އެމެރިކާއިން މެދުރިއުމަތީގައި ގެންގުޅޭ ވަކި ފަރާތަކަށް ބުރަވާ ސިޔާސަތުގެ ސަބަބުން ހިނގަމުންދާ ހަމަނުޖެހުންތައް ކަން ގިނަ ބަޔަކު ޤަބޫލު ކުރޭ،" ޕުޓިން ވިދާޅުވިއެވެ. އަދި، ފަލަސްޠީނުގެ ރައްޔިތުންގެ ހައްޤުތައް އެއް ފަރާތްކޮށް، ހިތުހުރި ގޮތަކަށް މެދުއިރުމަތީގެ ސިޔާސަތުތައް ކަނޑައަޅަން އެމެރިކާއިން މަސައްކަތް ކުރަމުންދާ ކަމުގައި ޕުޓިން ވިދާޅުވިއެވެ.
މެދުއިރުމަތީގެ ސުލްޙަ ޤާއިމުކުރުމަށް މަސައްކަތް ކުރުމަށް އެކުލަވައިލި 'ކުއާޓެޓް'ގައި 2002 ވަނަ އަހަރުން ފެށިގެން ރަޝިޔާއިން ވެސް ވަނީ އިސް ދައުރެއް އަދާކޮށްފައެވެ. އެ އިއްތިހާދުގައި ރަޝިޔާގެ އިތުރުން ހިމެނެނީ އެމެރިކާއާއި، އ.ދއާއި ވިލާތުގެ އިއްތިހާދު (އީ.ޔޫ)އެވެ. ޙަމާސް-އިސްރާޢީލް ހަނގުރާމަ ނިމުމަކަށް ގެނައުމަށް ކުރަމުންދާ މަސައްކަތަށް ރަޝިޔާއިން މިހާރު ވެސް އެއްބާރުލުން ދެމުންދާ ކަމުގައި ކްރެމްލިންގެ ތަރުޖަމާނު ދްމިތްރީ ޕެސްކޮފް ވިދާޅުވިއެވެ.
ޔަހޫދީ އިސްރާޢީލުން މިހާރު ޣައްޒާއަށް މެދުކެނޑުމެއް ނެތި ބޮންއަޅައި، ފަލަސްޠީނުގެ ކުށެއް ނެތް ޢާންމުންނާއި ކުޑަކުދިން ޝަހީދު ކުރަމުން ދަނީ، ޙަމާސް ޖަމާޢަތުން އިސްރާޢީލާ ދެކޮޅަށް ހަނގުރާމަ އިޢުލާނު ކުރުމާ ގުޅިގެންނެވެ. ޙަމާސްއިން 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތްކަމަށްވާ އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.