ޔަހޫދީ އިސްރާޢީލާ ދެކޮޅަށް ހަނގުރާމަ އިޢުލާނުކޮށް ޙަމާސްގެ މުޖާހިދުން ފަށާފައިވާ 'އޮޕަރޭޝަން އަޤްޞާ ފްލަޑް'ގެ ދަށުން މަރައިލާފައިވާ ޔަހޫދީންގެ ޢަދަދު 1,200 އިން މައްޗަށް އަރައިފިއެވެ. ޙަމާސްއިން އިސްރާޢީލާ ދެކޮޅަށް ޚާއްޞަ އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތްކަމަށްވާ އަލް-އަޤްޞާގެ ހުރުމަތް ކެނޑުން އިތުރުވެ، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.
އޮޕަރޭޝަނުގެ ދަށުން ޙަމާސްގެ މުޖާހިދުންގެ ޓީމުތަކުން ވަނީ، ޣައްޒާގެ އިން ވަކިކުރަން ޖަހާފައިވާ ފެންސުތައް ހުރަސްކޮށް އިސްރާޢީލުގެ ދެކުނުގައިވާ ރަށްތަކަށް އަރާފައެވެ. އަދި، ޔަހޫދީ އިސްރާޢީލުގެ އަސްކަރިއްޔާއާއި ފުލުހުންގެ އަމާޒުތަކަށް ހަމަލަދޭން ފަށާފައެވެ. މީގެ އިތުރުން، މުޖާހިދުން ދަނީ މެދުކެނޑިމެއް ނެތި އިސްރާޢީލުގެ ރަށްތަކަށް އަމާޒުކޮށް ރޮކެޓް ހަމަލަ ދެމުންނެވެ. ޙަމާސްއިން މި ފަދަ ބޮޑު އޮޕަރޭޝަނެއް ފެށުމާ އެކު ޔަހޫދީ އިސްރާޢީލާއި މުޅި ދުނިޔެއަށް ވެސް ވަނީ ސިހުން ގެނުވާފައެވެ.
ޙަމާސްގެ އިތުރުން ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތެއް ކަމުގައިވާ ޙިޒްބުﷲއިން ވެސް ދަނީ އިސްރާޢީލުގެ އަސްކަރީ އަމާޒުތަކަށް ހަމަލަ ދެމުންނެވެ. ސޫރިޔާގައި ހަރަކާތްތެރިވާ ޙަމާސްއަށް ވާގިވެރިވާ ގުރޫޕުތަކުން ވެސް އިސްރާޢީލުގެ ރަށްތަކަށް އަމާޒުކޮށް ހަމަލަތަކެއް ދީފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ޙަމާސްއަށް ބަދަލު ހިފުމުގެ ގޮތުން ޔަހޫދީ އިސްރާޢީލުން ވެސް ދަނީ މެދުކެނޑުމެއް ނެތި ޣައްޒާއަށް ބޮން އަޅަމުންނެވެ. ޔަހޫދީންގެ ޖައްބާރުކަން ބޮޑުވެގެންވާ ބޮޑުވަޒީރު ބެންޖަމިން ނަތަންޔާހޫގެ އަމުރަށް ފަށާފައިވާ އުދުވާންތަކުގައި ހަމަލަތައް އަމާޒު ކުރަމުން ދަނީ ފަލަސްޠީނުގެ ޢާންމުން ދިރިއުޅޭ ޢިމާރާތްތަކާއި، ސްކޫލްތަކާއި ހޮސްޕިޓަލްތަކަށެވެ. މި ޢުދުވާންތަކުގައި މިހާތަނަށް ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 900 އަށް އަރާފައެވެ.
ޑްރޯނާއި އާޓިލަރީ ބަޑީގެ އިތުރުން އަސްކަރީ މަތިންދާބޯޓުތަކުން ޣައްޒާއަށް ދެމުންދާ ހަމަލަތަކުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުން ހޯދައި ސަލާމަތް ކުރަން، އިންސާނިއްޔަތަށް ޚިދުމަތްކުރާ ގުރޫޕުތަކުން ދަނީ މަސައްކަތް ކުރަމުންނެވެ.
މީގެ އިތުރުން، ޣައްޒާގައި ދިރިއުޅޭ 2.3 މިލިޔަނެއްހާ މުސްލިމުން ބިކަކޮށް، ހާލުގައި ޖެއްސުމަށް ޔަހޫދީ އިސްރާޢީލުން ވަނީ އެ ސަހަރު ފުރަބަންދު ކޮށްފައެވެ. އަދި، ކާބޯތަކެއްޗާއި ބޭސް ފަރުވާއަށް ބޭނުންވާ ސާމާނު އެތެރެކުރުން ހުއްޓުވާފައެވެ. ޣައްޒާއިން ފެން ވެސް ކަނޑައިލާފައިވާ ކަމުގައި ރިޕޯޓުތައް ބުނެއެވެ. އެ ސަހަރަށް ތެޔޮ އެތެރެ ކުރުން ވެސް ވަނީ ހުއްޓައިލާފައެވެ. އެ ސަހަރަށް ކަރަންޓުގެ ޚިދުމަތް ފޯރުކޮށްދޭ ކުންފުނިން ބުނީ، އެ ޚިދުމަތް ދިނުމަށް ބޭނުންވާ ތެޔޮ ހުސްވަމުންދާ ކަމަށާއި، އެއާ އެކު މުޅި ޣައްޒާއިން ކަރަންޓު ކެނޑި، ކަނު އަނދިރީގެ ތެރެއަށް އެ ސަހަރު ވެއްޓިގެންދާނެ ކަމުގައެވެ.
ޣައްޒާގެ ޞިއްޙަތާ ބެހޭ ވުޒާރާއިން ބުނީ، ޔަހޫދީ އިސްރާޢީލުގެ ސިފައިން ގަސްދުގައި ޞިއްޙީ ޚިދުމަތްތެރިންނާއި، ޞިއްޙީ ޚިދުމަތް ފޯރުކޮށްދޭ މަރުކަޒުތަކާއި ހޮސްޕިޓަލްތަކަށް އަމާޒު ކުރަމުންދާ ކަމުގައެވެ. އެންމެ ފަހުން ދިން ހަމަލަތަކުގައި ވެސް ޔަހޫދީ އިސްރާޢީލުން ވަނީ އެމްބިޔުލާންސަކަށް މިސައިލް ހަމަލައެއްދީ، ދެ މީހަކު ޝަހީދު ކޮށްލާފައެވެ. އަދި، އިތުރު ޞިއްޙީ ޚިދުމަތްތެރިންތަކެއް ޒަޚަމު ކޮށްލާފައެވެ.
އިންސާނިއްޔަތަށް ޚިދުމަތްކުރާ ބައިނަލްއަޤުވާމީ ޖަމުޢިއްޔާ ޖަމާޢަތްތަކުން ޔަހޫދީ އިސްރާޢީލުގެ މި އަމަލުތައް ކުއްވެރި ކުރެއެވެ. އޭގެ ތެރޭގައި އ.ދ ވެސް ހިމެނެއެވެ. އ.ދގެ އިންސާނީ ހައްޤުތަކާ ބެހޭ އިދާރާގެ އިސްވެރިޔާ ފޮލްކަރ ތުރްކު ވިދާޅުވީ ޣައްޒާ ފުރަބަންދު ކޮށްފައި ވަނީ ބައިނަލްއަޤުވާމީ ޤާނޫނުތަކާ ޚިލާފަށް ކަމުގައެވެ. ދުނިޔޭގެ ޞިއްޙަތު ޖަމުޢިއްޔާ (ވޯލްޑް ހެލްތް އޮގަނައިޒޭޝަން – ޑަބްލިޔު.އެޗް.އޯ)ން ވެސް ވަނީ، ޣައްޒާގައި ހާލުގައި ޖެހިފައިވާ އެތަކެއް ސަތޭކަ ހާސް ރައްޔިތުންނަށް އިންސާނީ އެހީތެރިކަން ފޯރުކޮށްދެވޭނެ މަގު ހުޅުވައިދިނުމަށް ޔަހޫދީ އިސްރާޢީލަށް ގޮވައިލާފައެވެ.
ނަމަވެސް، ޔަހޫދީ ޓެރެރިސްޓު އިސްރާޢީލުން މިހާރު ދަނީ ޣައްޒާގެ ނިކަމެތި މުސްލިމުންނާ ދެކޮޅަށް ފަށާފައިވާ ހަނގުރާމަ އިތުރަށް ފުޅާ ކުރަން މަސައްކަތް ކުރަމުންނެވެ. ޔަހޫދީ އިސްރާޢީލުގެ ޖައްބާރު ދިފާޢީ ވަޒީރު ޔޮއާވް ގަލާންތް ބުނީ، އެއްގަމު މަގުން ޣައްޒާއަށް އަރައި، ފަލަސްޠީނުގެ މުސްލިމުންގެ ލޭއޮހޮރުވައިލަން އިސްރާޢީލުގެ އަސްކަރިއްޔާއިން ތައްޔާރުވެފައިވާ ކަމުގައެވެ. "ޙަމާސްއިން ބޭނުންވީ ބަދަލެއް. ޣައްޒާ ދެނެއް ނޯންނާނެ،" ގަލާންތް ބުންޏެވެ.
އިސްރާޢީލުގެ އަސްކަރިއްޔާއިން މިހާރު ވަނީ ޣައްޒާގެ ސަރަޙައްދީ ރޮނގު ކައިރިއަށް 300,000 އެއްހާ ސިފައިން ޖަމާކޮށްފައެވެ. މި އުދުވާންތައް ހިންގުމުގައި ޔަހޫދީންގެ ދަޢުލަތަށް އެންމެ ބޮޑަށް އެހީތެރިކަން ފޯރުކޮށްދެމުން ދަނީ އެމެރިކާއިންނެވެ. އެމެރިކާގެ ރައީސް ޖޯ ބައިޑަން ވަނީ، އިސްރާޢީލަށް އަސްކަރީ ގޮތުން އެހީތެރިކަން ފޯރުކޮށްދިނުމުގައި އެމެރިކާއިން ދެމިއޮންނާނެ ކަމުގެ ޔަޤީންކަން އަރުވާފައެވެ. އެމެރިކާގެ އަސްކަރީ މަތިންދާބޯޓު އުފުލާ މަނަވަރު ޔޫ.އެސް.އެސް ޖެރާލްޑް އާރް. ފޯޑް މިހާރު ވަނީ ޔަހޫދީ އިސްރާޢީލު ކައިރިއަށް ފޮނުވާފައެވެ.