ޔަހޫދީން އަޅުވެތި ކޮށްފައިވާ ފަލަސްޠީނުގެ ޣައްޒާ ރޫޅައިލާ، ސުންނާފަތިކޮށްލުމަށް ފަހު، މުޅި މެދުއިރުމަތި ބަދަލުކޮށްލާނެ ކަމުގައި ޔަހޫދީ އިސްރާޢީލުގެ ހަރުކަށި ބޮޑުވަޒީރު ބެންޖަމިން ނަތަންޔާހޫ ބުނެފިއެވެ. އޭނާގެ އިންޒާރުތައް ދީފައި މި ވަނީ، އިސްރާޢީލާ ދެކޮޅަށް ހަނގުރާމަ އިޢުލާނުކޮށް ޙަމާސް ޖަމާޢަތުން 'އޮޕަރޭޝަން އަޤްޞާ ފްލަޑް'ގެ ނަމުގައި މުޅި ދުނިޔެ ސިއްސުވައިލާ ވަރުގެ ބޮޑު، އަދި ކާމިޔާބު އޮޕަރޭޝަނެއް ފެށުމާ ގުޅިގެންނެވެ.
ޙަމާސްއަކީ ފަލަސްޠީނުގެ މިނިވަންކަމަށް ޖިހާދު ކުރާ މުޖާހިދުންގެ މައްޗަށް އެކުލެވިގެންވާ ޖަމާޢަތެކެވެ. އަދި، ޣައްޒާގައި ސިޔާސީ ގޮތުން ވެރިކަން ކުރަނީ ވެސް އެ ޖަމާޢަތުންނެވެ. އިސްރާޢީލާ ދެކޮޅަށް އެ ޖަމާޢަތުން ފެށި ބާރުގަދަ އަސްކަރީ ކެމްޕޭންގެ ދަށުން މުޖާހިދުންގެ ޓީމުތަކުން ވަނީ އިސްރާޢީލުގެ ދެކުނުގެ ރަށްތަކަށް އަރައި، ޔަހޫދީންނާ ދެކޮޅަށް ހަނގުރާމަ ކުރަން ފަށާފައެވެ.
ޙަމާސްއިން ދިން ހަމަލަތަކުގައި މަރުވެފައިވާ ޔަހޫދީންގެ ޢަދަދު މިހާރު 1،000އަށްވުރެ މައްޗަށް އަރައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 2,240 އަށްވުރެ މައްޗަށް އަރައެވެ. އިސްރާޢީލުގެ ދެކުނުގައިވާ ބައެއް ރަށްތަކުގެ ބައެއް ސަރަޙައްދުތައް އަދިވެސް އޮތީ ހަމާސްގެ ބާރުގެ ދަށުގައެވެ. ޙަމާސްއިން ވަނީ ޔަހޫދީންގެ ގިނަ ޢަދަދެއްގެ ބަޔަކު ރަހީނު ކޮށްގެން ޣައްޒާއަށް ގެންގޮސްފައެވެ. އޭގެ ތެރޭގައި ގިނައީ ޔަހޫދީންގެ ޖައްބާރު ސިފައިންނާއި ފުލުހުންގެ މީހުންނެވެ.
މި ޖިހާދަށް ރައްދު ދިނުމުގެ ގޮތުން ޔަހޫދީ ޖައްބާރު އަސްކަރިއްޔާއިން ޣައްޒާއަށް ބޮން އަޅަން ފަށާފައިވާއިރު، ޔަހޫދީންގެ ބޮޑުވަޒީރު ނަތަންޔާހޫ ބުނީ ޣައްޒާ ސުންނާފަތި ކޮށްލާނެ ކަމުގައެވެ. އަދި، މިއީ ހަނގުރާމައިގެ ފެށުން ކަމަށާއި، ޙަމާސްގެ މެންބަރުންގެ ހިތަށް ނުގެނެވޭހާ މިންވަރެއްގެ ބާރަކާ އެކު އެ ޖަމާޢަތް ނައްތައިލާނެ ކަމުގައެވެ. ޙަމާސްއަށް ކުރިއަށް އޮތީ ހިތްދަތި ދުވަސްތަކެއް ކަމުގައި ވެސް އޭނާ ބުންޏެވެ.
ޔަހޫދީ އިސްރާޢީލުގެ އަސްކަރިއްޔާއިން ޣައްޒާއަށް ދެމުންދާ ހަމަލަތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު 560 އަށް އަރައެވެ. އަދި، ޒަޚަމުކޮށްލާފައިވާ މީހުންގެ ޢަދަދު 2,750 އަށްވުރެ އިތުރެވެ. ޔަހޫދީންގެ ހަމަލަތަކުގައި ގެދޮރު ހަލާކުވެ، މަގުމަތިވެފައިވާ ފަލަސްޠީނުގެ ރައްޔިތުންގެ ޢަދަދު މިހާރު ވަނީ 120,000 އަށް އިތުރުވެފައެވެ.
ޣައްޒާގެ އިތުރުން ހުޅަނގު އައްސޭރީގައި ވެސް ޔަހޫދީ ސިފައިން ދަނީ ލާއިންސާނީ ޖަރީމާތައް ހިންގަމުންނެވެ. ފަލަސްޠީނުގެ ރެޑް ކްރެސެންޓުން ބުނީ، ޔަހޫދީ ސިފައިންގެ ބައިގަނޑެއް ހުޅަނގު އައްސޭރިއަށް އަރައި ހިންގި އުދުވާންތަކެއްގައި 10 މީހުން ޒަޚަމު ކޮށްލާފައިވާ ކަމުގައެވެ. ޢާންމުންނާއި، ޞިއްޙީ ޚިދުމަތްތެރިންނާއި ނޫސްވެރިންނަށް ވެސް ޔަހޫދީ ސިފައިން ބަޑީގެ ހަމަލަތައް އަމާޒު ކުރަމުންދާ ކަމުގައި އެ ޖަމުޢިއްޔާއިން ބުނެއެވެ.
ޔަހޫދީ އިސްރާޢީލުން ޣައްޒާގައި ހިންގަމުންދާ ލާއިންސާނީ ޖަރީމާތައް ހުއްޓުމަކަށް ގެނައުމާ ގުޅޭ ގޮތުން މަޝްވަރާ ކުރުމަށް ޢަރަބި ލީގުން ކުއްލި ބައްދަލުވުމެއް ބޭއްވުމަށް މިހާރު ދަނީ ތައްޔާރުވަމުންނެވެ. އެ އިއްތިހާދު މެންބަރު ޤައުމުތަކުގެ ޚާރިޖީ ވަޒީރުން އަންނަ ބުދަ ދުވަހު ބައްދަލު ކުރާނެ ކަން އެ އިއްތިހާދުން ވަނީ އިޢުލާނު ކޮށްފައެވެ. މި ބައްދަލުވުން ކުރިއަށްދާނީ މިޞްރުގެ ވެރިރަށް ޤާހިރާގައެވެ.