ފަލަސްޠީނުގެ ޣައްޒާއަށް ޔަހޫދީ އިސްތިޢުމާރީ ބާރުތަކުން ދެމުންދާ ޙަމަލާތަކުގައި 100،000 މީހުންގެ ގެދޮރު ގެއްލިފައިވާކަމަށް އދން ބުނެފިއެވެ.
ޔަހޫދީންނާ ދެކޮޅަށް ޙަމާސް ޖަމާޢަތުން ވަރުގަދަ އަސްކަރީ ޙަރަކާތްތަކެއް ފެށުމުން އިސްރާއީލުންވަނީ ފާއިތުވި 24 ގަޑިއިރުގެ ތެރޭގައި ޣައްޒާއަށް ދެމުންދާ ޙަމަލާތައް އިތުރުކޮށްފައެވެ. އެ ގޮތުން 1،000 ޓަނުގެ ގޮވާތަކެތި ޣައްޒާއަށް ޙަމަލާ ދިނުމަށް ބޭނުންކޮށްފައިވާކަމަށް ޔަހޫދީ ފައުޖުތަކުން ބުނެފައިވެއެވެ. އެ ޙަމަލާތައް ޢަމާޒުވެފައިވަނީ ޢާއްމުން ދިރިއުޅޭ ޢިމާރާތްތަކަށެވެ. އެއާއެކު ޔަހޫދީންގެ ޙަމަލާތަކުގައި ޝަހީދުވި ފަލަސްޠީނުގެ ރައްޔިތުންގެ ޢަދަދުވަނީ 400އަށްވުރެ އިތުރުވެފައެވެ. އޭގެ އިތުރުން ޔަހޫދީ ފައުޖުތަކުންވަނީ ބަރު ހަތިޔާރާއި ގިނަ ޢަދަދެއްގެ ސިފައިން ޣައްޒާ ކައިރިއަށް ޖަމާކޮށްފައެވެ. އޭގެ ތެރޭގައި 100،000 ރިސާވް ސިފައިންވެސް ހިމެނެއެވެ.
ޔަހޫދީންނާ ދެކޮޅަށް ޙަމާސް ޖަމާޢަތުން ދެމުންދާ ޙަމަލާތައްވެސްވަނީ ވަރުގަދަކޮށްފައެވެ. އެ ގޮތުން ޣައްޒާގެ ސަރަޙައްދު ހުރަސްކޮށް އެއްގަމުންނާއި ވައިގެ މަގުން ދެމުންދާ ޙަމަލާތަކުގައި 700 ޔަހޫދީން މަރުވެ 2،000 މީހުންވަނީ ޒަޚަމުވެފައެވެ. އޭގެ އިތުރުން ޙަމާސް ޖަމާޢަތުންވަނީ 100އަށްވުރެ ގިނަ ޔަހޫދީން ޙައްޔަރުކޮށް ޣައްޒާއަށް ގެންގޮސްފައެވެ.
ޔަހޫދީ އިސްރާއީލުގެ ދަޢުލަތަށް ކުރިމަތިލާން ޖެހިފައިވަނީ 1973ވަނަ އަހަރުގެ ފަހުން އެ ޤައުމަށް ކުރިމަތިވެފައިވާ އެންމެ ނާޒުކު ޙާލަތާއެވެ. އެ ގޮތުން ޙަމާސް ޖަމާޢަތާ ކުރިމަތިލުމަށް ޔަހޫދީންވަނީ ފާއިތުވި 50 އަހަރުގެ ތެރޭގައި ފުރަތަމަ ފަހަރަށް ރަސްމީކޮށް ހަނގުރާމަ އިޢުލާންުކޮށްފައެވެ.