ފަލަސްޠީނުގެ މިނިވަން ކަމަށް ޖިހާދު ކުރަމުންދާ ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް ފަށާފައިވާ 'އޮޕަރޭޝަން އަޤްޞާ ފްލަޑް'ގެ ދަށުން އިސްރާޢީލުގެ ރަށްތަކުގައި އެ ޤައުމުގެ ޖައްބާރު ސިފައިންނާ ހަނގުރާމަ ކުރަމުން އެބަދެއެވެ. ޙަމާސްއާ ދެކޮޅަށް ޔަހޫދީ އިސްރާޢީލުގެ ހަރުކަށި ބޮޑުވަޒީރު ބެންޖަމިން ނަތަންޔާހޫގެ ސަރުކާރުން ވެސް ހަނގުރާމަ އިޢުލާނު ކޮށްފައިވާއިރު، މި ހަނގުރާމައިގައި ދެ ފަރާތުން މަރުވެފައިވާ މީހުންގެ ޢަދަދު މިހާރު ވަނީ 1,000 އަށްވުރެ މައްޗަށް އަރާފައެވެ.
ޔަހޫދީން އަޅުވެތި ކޮށްފައިވާ ޣައްޒާގައި ވެރިކަން ކުރަނީ ޙަމާސްއިންނެވެ. އެ ޖަމާޢަތުގެ މުޖާހިދުން ވަނީ ފެންސުތައް ހުރަސްކޮށް އިސްރާޢީލުގެ ދެކުނުގައިވާ ރަށްތަކަށް އަރާފައެވެ. އަދި، ޔަހޫދީ އިސްރާޢީލުގެ އަސްކަރީ އަމާޒުތަކަށް ހަމަލަދޭން ފަށާފައެވެ. އަދި، ކަޣްމިއްޔާގެ ކިބޫތްޒާއި އަޝްކެލޯންގެ އިތުރުން ސްދެޜޯތްގައި ޙަމާސްގެ މުޖާހިދުން ދަނީ އިސްރާޢީލުގެ ޓެރެރިސްޓު ސިފައިންނާ ދެކޮޅަށް ހިތްވަރުގަދަ ކަމާ އެކު ހަނގުރާމަ ކުރަމުންނެވެ. ފަލަސްޠީނުގެ މިނިވަން ކަމަށް ޖިހާދު ކުރަމުންނެވެ.
ޙަމާސްގެ ހަމަލަތަކުގައި މަރައިލާފައިވާ ޔަހޫދީންގެ ޢަދަދު 700 އަށް އަރާ ކަމުގައި މީޑިޔާ ރިޕޯޓުތައް ބުނެއެވެ. ޔަހޫދީ އިސްރާޢީލުގެ އަސްކަރިއްޔާއިން ބުނީ، ޙަމާސްގެ ހަމަލަތަކުގައި މަރުވެފައިވާ ޔަހޫދީންގެ ޢަދަދު އިތުރުވާނެ ކަމަށް ބެލެވޭ ކަމުގައެވެ. ޙަމާސްއިން ވަނީ ޔަހޫދީންގެ 130 އަށްވުރެ ގިނަ މީހުން ރަހީނުކޮށް ޣައްޒާއަށް ގެންގޮސްފައެވެ. އޭގެ ތެރޭގައި ޔަހޫދީ ސިފައިންނާއި ފުލުހުންގެ އިސް ކޮމާންޑަރުން ވެސް ހިމެނެއެވެ.
ޙަމާސްގެ އޮޕަރޭޝަނަށް ރައްދު ދިނުމުގެ ގޮތުން ޔަހޫދީ އިސްރާޢީލުން ދަނީ ޣައްޒާއަށް ވެސް މެދުކެނޑުމެއް ނެތި ބޮން އަޅަމުންނެވެ. ޣައްޒާގެ ކުށެއް ނެތް ޢާންމު ރައްޔިތުން ޝަހީދު ކުރަމުންނެވެ. އެ މީހުންގެ ގެދޮރު ސުންނާފަތި ކުރަމުންނެވެ. މި ހަނގުރާމައިގައި މިހާތަނަށް ޝަހީދުކޮށްލާފައިވާ މީހުންގެ ޢަދަދު 436 އަށް އަރައެވެ. އޭގެ ތެރޭގައި 91 ކުޑަކުދިން ވެސް ހިމެނޭ ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެއެވެ.
ޑްރޯންތަކާއި އާޓިލަރީ ބަޑީގެ އިތުރުން އަސްކަރީ މަތިންދާބޯޓުތައް ބޭނުންކޮށްގެން ޔަހޫދީ އިސްރާޢީލުގެ އަސްކަރިއްޔާއިން ޣައްޒާއަށް ދެމުންދާ ހަމަލަތަކުގެ ސަބަބުން އެ ރަށުގެ އެތަކެއް ހާސް ބަޔަކު ވަނީ ގެދޮރުނެތިފައެވެ. މި ގޮތުން، ފަލަސްޠީނުގެ 123,000 އަށްވުރެ ގިނަ މީހުންގެ ގެދޮރު ޔަހޫދީ ޓެރެރިސްޓުންގެ ހަމަލަތަކުގައި ސުންނާފަތި ކޮށްލާފައިވާ ކަމުގައި އ.ދއިން ބުނެއެވެ. އޭގެ ތެރެއިން 74,000 މީހުންނަށް ސްކޫލްތައް ފަދަ ޢިމާރާތްތަކުން ހިޔާވަހިކަން ހަމަޖައްސައިދޭން އ.ދއިން ދަނީ މަސައްކަތް ކުރަމުންނެވެ.
ޣައްޒާއާ ދެކޮޅަށް ފަށާފައިވާ ހަނގުރާމަ އިތުރަށް ވަރުގަދަ ކުރަން ވެސް ޔަހޫދީ ޓެރެރިސްޓުން ދަނީ މަސައްކަތް ކުރަމުންނެވެ. މި ގޮތުން، ޣައްޒާގެ ސަރަޙައްދީ ރޮނގު ކައިރިއަށް 100,000 އަށްވުރެ ގިނަ ރިޒަރވް ސިފައިން ޖަމާކުރުމުގެ މަސައްކަތް ވަނީ ފަށާފައެވެ. އަދި، އަސްކަރީ ޓޭންކުފަހަރާ އެކު ޣައްޒާއަށް އަރަން ޔަހޫދީ އަސްކަރިއްޔާއިން ތައްޔާރުވަމުންދާ ކަމުގައި ރިޕޯޓުތައް ބުނެއެވެ. ކުރިއަށް އޮތް 48 ގަޑިއިރުގެ ތެރޭގައި ޔަހޫދީން ބަރުހަތިޔާރާ އެކު ޣައްޒާއަށް އަރާނެ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ދެކެއެވެ.
މި ހަނގުރާމައިގައި ޔަހޫދީންނަށް އެންމެ ބޮޑު އެއްބާރުލުމަކާއި އެހީތެރިކަމެއް ފޯރުކޮށްދެނީ އެމެރިކާއިންނެވެ. ޙަމާސްގެ މައްޗަށް ކާމިޔާބީ ހޯދަން ޔަހޫދީ ދަޢުލަތައް އެހީތެރިކަން ފޯރުކޮށްދޭނެ ކަމުގައި އެމެރިކާގެ ރައީސް ޖޯ ބައިޑަން ވަނީ ވިދާޅުވެފައެވެ. އަދި، މި ހަނގުރާމައިގައި އެހީތެރިކަން ފޯރުކޮށްދޭން އެމެރިކާގެ އަސްކަރިއްޔާއިން ދަނީ ތައްޔާރުވަމުންނެވެ. މި ގޮތުން، އެމެރިކާގެ އަސްކަރީ މަތިންދާބޯޓު އުފުލާ މަނަވަރު ޔޫ.އެސް.އެސް ޖެރާލްޑް އާރް. ފޯޑް މިހާރު ވަނީ ޔަހޫދީ އިސްރާޢީލު ކައިރިއަށް ފޮނުވާފައެވެ.