ސްޕެނިޝް ލީގުގައި ފަސޭހަކަމާއެކު އޮސަސޫނާ ބަލިކޮށް، ލީގު ބްރޭކުގެ ކުރިން ރެއާލް މެޑްރިޑުން ތާވަލުގެ އެއްވަނަ ކަށަވަރުކޮށްފިއެވެ.
ރެއާލްގެ އަމިއްލަ ދަނޑުގައި ކުޅުނު މި މެޗު އެ ޓީމު ކާމިޔާބުކޮށްފައިވަނީ 4-0 ގެ ނަތީޖާއަކުންނެވެ. މިއީ މި ސީޒަނުގައި ލީގުގައި ކުޅުނު 9 މެޗުގެ ތެރެއިިން ރެއާލް މެޑްރިޑް މޮޅުވި 8 ވަނަ މެޗެވެ.
މި މޮޅާއެކު ލީގުގައި ކުޅުނު 9 މެޗުން ރެއާލް މެޑްރިޑަށް 24 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ އެއްވަނައިގައެވެ. އަދި މިމެޗުން ބަލިވި އޮސަސޫނާ ލީގުގައި ކުޅުނު 9 މެޗުން ލިބުނު 10 ޕޮއިންޓާއެކު އެޓީމު މިވަގުތު އޮތީ ލީގު ތާވަލްގެ 10 ވަނައިގައެވެ.
މެޗުގެ ވަރަށް ކުރީކޮޅު ރެއާލް މެޑްރިޑުން ވަނީ ލީޑު ނަގާފައެވެ. ޑެނީ ކަވަހާލް ތަނަވަސްކޮށްދިން ފުރުސަތެއްގައި މި ލަނޑު ފުރަތަމަ ހާފުގެ 9 ވަނަ މިނެޓުގައި ކާމިޔާބުކޮށްދިނީ ބެލިންހަމް އެވެ.
މެޗުގެ ދެވަަނަ ހާފުގައި ރެއާލުން ވަނީ ބޮޑުތަނުން ކުޅުން ވަރުގަދަކޮށްފައެވެ. އެޓީމުގެ ދެވަނަ ލަނޑު ދެވަނަ ހާފުގެ 54 ވަނަ މިނެޓުގައި އުރުގުއާއީ މިޑްފީލްޑަރު ފެޑްރިކޯ ވަލްވެޑޭ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ ވެސް ބެލިންހަމްއެވެ.
ތިންވަނަ ލަނޑު ދެވަނަ ހާފުގެ 65 ވަނަ މިނެޓުގައި ވަލްވެޑޭ ތަނަވަސްކޮށްދިން ފުރުސަތެއްގައި ބްރެޒިލްގެ ފޯވާޑް ވިނީޝިއަސް ޖޫނިއަރ ކާމިޔާބުކުރި އިރު އެޓީމުގެ ހަތަރުވަނަ ލަނޑު މެޗުގެ 70 ވަނަ މިނެޓުގައި ކާމިޔާބުކޮށްދިނީ ހޯސެލޫ އެވެ. މި މެޗުގެ 84 ވަނަ މިނެޓުގައި ރެއާލަށް ޕެނަލްޓީއެއް ލިބުނު ނަމަވެސް އޮސަސޫނާގެ ކީޕަރު ވަނީ އެ ބޯޅަ މަތަކޮށްފައެވެެ.