އާމްދަނީ އިތުރުވެ، އައިލެންޑް އޭވިއޭޝަން ފައިދާވާ ކުންފުންޏަކަށް

އައިލެންޑް އޭވިއޭޝަނަށް މިއަހަރުގެ ފުރަތަމަ ކުއާޓަރުގައި 557.60 މިލިއަން ރުފިޔާގެ އާމްދަނީއެއް ލިބިފައިވާ ކަމަށް ޕްރައިވެޓައިޒޭޝަން ބޯޑުން ހާމަކޮށްފިއެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ނެރެފައިވާ މިއަހަރުގެ ފުރަތަމަ ކުއާޓަރުގެ 'ކުއާޓަރލީ ރިވިއު' ރިޕޯޓުގައިވަނީ ސަރުކާރު ހިއްސާވާ ކުންފުނިތަކުގެ މާލީ ހާލަތު ބަޔާންކޮށްފައެވެ. އެގޮތުން ސަރުކާރު ހިއްސާވާ 30 ކުންފުންޏެއްގެ މާލީ ހާލަތު ވަކިވަކިން މިރިޕޯޓުގައިވަނީ ހިމަނާފައެވެ.

މިރިޕޯޓުގައިވާގޮތުން އައިލެންޑު އޭވިއޭޝަނަށް މިއަހަރުގެ ފުރަތަމަ ކުއާޓަރުގައި އާމްދަނީގެ ގޮތުގައި އެކުންފުންޏަށް 557.60 މިލިއަން ރުފިޔާ ލިބިފައިވެއެވެ. މިއީ މިދިޔަ އަހަރުގެ ފަހު ކުއާޓަރާއި އަޅާ ބަލާއިރު 17 އިންސައްތަ އިތުރު އަދަދެކެވެ. އަދި މިދިޔަ އަހަރުގެ ފުރަތަމަ ކުއާޓަރާއި އަޅާ ބަލާއިރުު 27 އިންސައްތަ އިތުރު އަދަދެކެވެ.

މިއަހަރުގެ ފުރަތަމަ ކުއާޓަރުގައި އައިލެންޑް އޭވިއޭޝަނުންވަނީ އުދުހުންތަކުގައި ބޭނުންކުރުމަށް އޭޓީއާރު 2 މަތިންދާ ބޯޓު ގެނެސްފައެވެ. އަދި ފަރެސްމާތޮޑާ އެއަރޕޯޓަށް އެކުއާޓަރުގެތެރޭގައި ދަތުރުތައް ފަށާފައިވާއިރު، މާފަރު އެއަރޕޯޓުން ޕްރައިވެޓް ޖެޓްތަކަށްވަނީ ޖެޓް ފިއުލް ވިއްކަންވެސް ފަށާފައެވެ.

މިއަހަރުގެ ފުރަތަމަ ކުއާޓަރުގައި އާމްދަނީ އިތުރުވުމުގެ މައިގަނޑު ސަބަބަކީ މޯލްޑިވިއަންގެ ފްލައިޓުތަކުގައި ދަތުރުކުރި ފަސިންޖަރުންގެ އަދަދު އިތުރުވުމެވެ. އެގޮތުން އެތެރޭގެ އުދުހުންތަކުން ލިބުނު އާމްދަނީ 16 އިންސައްތައަށް އިތުރުވިއިރު، ބޭރު ޤައުމުތަކަށް ކުރާ ދަތުުރުތަކުން 2 އިންސައްތަ އަދި ސީޕްލޭން ދަތުރުތަކުން ލިބުނު އާމްދަނީ ވަނީ މިދިޔަ އަހަރުގެ ފަހު ކުއާޓަރާއި އަޅާބަލާއިރު 15 އިންސައްތަ އިތުރުވެފައެވެ.

އަދި މޯލްޑިވިއަނުން މެނޭޖްކުރާ މާފަރު އެއަރޕޯޓަށް ޖެއްސި ޖެޓްތަކުގެ އަދަދު އިތުރުވުމުގެ ސަބަބުން ގްރައުންޑް ހޭންޑްލިންގްއިން ލިބުނު އާމްދަނީ އެ ކުއާޓަރުގެތެރޭގައިވަނީ 88.9 އިންސައްތަ އިތުުރުވެފައެވެ.

ރިޕޯޓުގައިވާގޮތުން ފާއިތުވީ 5 އަހަރުގެތެރޭގައި ފުރަތަމަ ފަހަރަށް އައިލެންޑް އޭވިއޭޝަނަށްވަނީ ކުންފުނި ހިންގައިގެން ފައިދާވެފައެވެ. އެގޮތުން މިއަހަރުގެ ފުރަތަމަ ކުއާޓަރުގައި އެކުންފުންޏަށްވަނީ ކުންފުނި ހިންގައިގެން 41.55 މިލިއަން ރުފިޔާ ލިބިފައެވެ. މިއީ މައިގަނޑުގޮތެއްގައި ކުންފުންޏަށް ލިބުނު އާމްދަނީ އިތުރުވުމާއި ގުޅިގެން ކަމަށް ރިޕޯޓުގައި ބުނެފައިވެއެވެ.

އާމްދަނީ އިތުރުވެ ކުންފުނި ހިންގައިގެން ލިބުނު ފައިދާ އާއި އެކު މިއަހަރުގެ ފުރަތަމަ ކުއާޓަރުގައި އައިލެންޑް އޭވިއޭޝަނަށްވަނީ ސާފު ފައިދާގެގޮތުގައި 10.74 މިލިއަން ރުފިޔާ ލިބިފައެވެ. މިދިޔަ އަހަރުގެ ފަހު ކުއާޓަރުގައި އެކުންފުންޏަށް ލިބިފައިވަނީ 53.58 މިލިއަން ރުފިޔާގެ ގެއްލުމެކެވެ. އަދި މިދިޔަ އަހަރުގެ ފުރަތަމަ ކުއާޓަރުގައިވެސް އެކުންފުންނަށް ވަނީ 53.46 މިލިއަން ރުފިޔާގެ ގެއްލުމެއްވެފައެވެ.