ބާރުގަދަ ތޫފާނެއް ކަމުގައިވާ ކޮއިނޫ ތައިވާނުގެ ދެކުނުގައިވާ ސަރަޙައްދުތަކަށް އެރުމާ ގުޅިގެން ކުރިމަތިވި އެކި ހާދިސާތަކުގައި އެކަކު މަރުވެ، ގިނަ ޢަދަދެއްގެ ބަޔަކަށް އަނިޔާވެއްޖެއެވެ. މި ތޫފާނާ ގުޅިގެން ތައިވާނުގެ ދެކުނުގައިވާ ސަރަޙައްދުތަކުގައި ވައިބާރުވެ، ބޯކޮށް ވާރޭވެހި، ފެންބޮޑުވިއެވެ. އަދި، އައްސޭރިފަށުގައިވާ ސަރަޙައްދުތަކުގެ ކަނޑުތައް ގަދަވެ، އުދައަރައި ބޮޑެތި ގެއްލުންތަކެއް ލިބުނެވެ.
ތޫފާން ކޮއިނޫއާ ގުޅިގެން އެންމެ ބޮޑެތި ގެއްލުންތަކެއް ލިބިފައި ވަނީ ހެންގްޗުން ޕުރޮވިންސުގެ ސަރަޙައްދުތަކަށެވެ. ކޮއިނޫއަކީ ކެޓެގަރީ ހަތަރެއްގެ ބާރުގަދަ ތޫފާނެކެވެ. މި ތޫފާނާ އެކު ގަޑިއަކު 252 ކިލޯމީޓަރަށް ވައިބާރުވެފައިވާ ކަމުގައި ތައިވާނުގެ މޫސުމާ ބެހޭ އިދާރާއިން ހާމަކުރެއެވެ.
ކޮއިނޫއާ ގުޅިގެން އެ ސަރަޙައްދުތަކުގެ ސްކޫލްތަކާއި އޮފީސްތައް ބަންދު ކުރަން ޖެހުނު ކަމުގައި ތައިވާނުގެ އޮފިޝަލުން ވިދާޅުވިއެވެ. އަދި، އެތަކެއް މިލިޔަން މީހުން، އެ މީހުންގެ ގެދޮރުގައި ތާށިވިއެވެ. މި ތޫފާނާ ގުޅިގެން ހިނގި އެކި ހާދިސާތަކުގައި 304 މީހަކަށް އަނިޔާވި ކަމުގައި އޮފިޝަލުން ވިދާޅުވިއެވެ.
ހެންގްޗުން ޕުރޮވިންސުގެ އިތުރުން ތައިވާނުގެ ދެކުނުގައިވާ ޗިންދުންގްއާއި، އިރުމަތީ އައްސޭރިފަށުގައިވާ ތައިޓުންގާއި ހުއަލިއެންއަށް ބޯކޮށް ވާރޭވެހުނެވެ. އަދި، އެ ޤައުމުގެ ދެކުނުގައިވާ ބަނދަރުމަތީ ރަށެއް ކަމުގައިވާ ކައޮޝިޔުންގްއަށް ބޮޑެތި ގެއްލުންތަކެއް ލިބުނެވެ. ތޫފާން ކޮއިނޫއާ ގުޅިގެން އެ ސަރަޙައްދުތަކުގެ ސްކޫލްތަކާއި އޮފީސްތައް ވަނީ ބަންދުކޮށްފައެވެ.
ތައިވާނުގެ އަލިފާން ނިއްވާ އިދާރާއިން ބުނީ، މި ތޫފާނާ ގުޅިގެން އެކަކު މަރުވީ، ބާރު ވަޔާއެކު ވިއްސައިގެން ދިޔަ ބިއްލޫރިގަނޑަކުން ޖެހިގެން ކަމުގައެވެ. މި ހާދިސާ ހިނގާފައި ވަނީ ތައިޗުންގް ސިޓީގައެވެ. އަދި، އެންމެ ބޮޑެތި ގެއްލުންތަކެއް ލިބިފައި ވަނީ ތައިޗުންގްގެ އައްސޭރިފަށުގައި ޕެސިފިކް ކަނޑުގައި އޮންނަ ރަށެއް ކަމުގައިވާ އޯކިޑް އައިލެންޑަށެވެ.
އޯކިޑް އައިލެންޑަކީ 5,000 މީހުންގެ އާބާދީއެއް ދިރިއުޅޭ ރަށެކެވެ. ތޫފާން ކޮއިނޫއާ އެކު ކަނޑުތައް ގަދަވެ، އެ ރަށުގެ ބަނދަރުމަތީގައި އަޅާފައިވާ ގިނަ ޢަދަދެއްގެ އޮޑިދޯނިފަހަރު ދިޔަވެފައިވާ ކަމުގައި އެ ރަށުގެ އޮފިޝަލުން ވިދާޅުވިއެވެ.
މި ތޫފާނާ ގުޅިގެން ތައިވާނުގެ މައި ދެ އެއަރލައިން ކަމުގައިވާ ޔޫ.އެން.އައި އެއަރ އަދި މެންޑެރިން އެއަރލައިންސްގެ ވައިގެ ދަތުރުތައް މެދުކަނޑައިލަން ޖެހުނެވެ. އަދި، ބައިނަލްއަޤުވާމީ ދަތުރުތަކުގެ ތެރެއިން 46 އުދުހުމެއް ކެންސަލް ކުރަން ޖެހުނު ކަމުގައި ވެސް އޮފިޝަލުން ވިދާޅުވިއެވެ. އެ ޤައުމުގެ މައި ރަށާއި ވަކިން އޮންނަ ރަށްތަކާ ދެމެދު ފޯރުކޮށްދޭ ފެރީގެ ޚިދުމަތްތަކަށް ވެސް ބުރޫއަރާފައިވެއެވެ.