މާލޭ ސިޓީގެ މޭޔަރުކަމަށް މަޙްލޫފް ވާދަކުރައްވަނީ

މާލެ ސިޓީގެ މޭޔަރުކަމަށް ވާދަކުރައްވަން މިހާރުގެ މިނިސްޓަރ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަހްލޫފް ނިންމަވައިފިއެވެ. މަހްލޫފް ވަނީ މޭޔަރުކަމަށް ވާދަކުރެއްވުމުގެ ޝަޢުޤުވެރިކަން ފާޅުކުރައްވާ ސޯޝަލް މީޑިއާގައި އެކަން ޙިއްސާކުރައްވާފައެވެ.

މާލޭގެ މޭޔަރުކަމުގެ މަޤާމަށް ޝޯޝަލް މީޑިއާގައި ކެމްޕެއިން ފަށްޓަވައި ކުރެއްވި ޓްވީޓްގައި ވަނީ، މާލޭގެ މޭޔަރަކު އިންތިޚާބުކުރުމަށް ބާއްވާ ބައި އިލެކްޝަންގައި ވާދަކުރެއްވާނެކަމަށް ވިދާޅުވެ، މާލޭގެ ރައްޔިތުން ތާއީދުކޮށްދެއްވުމަށް އެދިވަޑައިގެންފައެވެ.

بِسْمِ اللهِ الرَّحْمٰنِ الرَّحِيْمِ

17 ނޮވެމްބަރު 2023 ވަނަ ދުވަހު ހުސްވާ މާލޭ މޭޔަރު މަގާމުގެ ބައި-އިލެކްޝަންގައި ވާދަކުރުމަށް އަޅުގަނޑު ނިންމައިފީމެވެ.

ވީމާ މާލޭގެ އެންމެހާ ރައްޔިތުން ތާއީދު ކޮށްދެއްވުމަކީ އަޅުގަނޑުގެ ވަރަށް ބޮޑު އެދުމެކެވެ.

ޝުކުރިއްޔާ. #Mahloof4Mayor pic.twitter.com/3PbSM19vpV

— Ahmed Mahloof (@AhmedMahloof) October 4, 2023

ގަލޮޅު ދެކުނު ދާއިރާގެ ރައްޔިތުންގެ މަޖިލީހުގެ މެންބަރުކަންވެސް ކުރައްވާފައިވާ މަޙްލޫފަކީ މިހާތަނަށް މޭޔަރުކަމަށް ވާދަކުރައްވާނެކަން އިޢުލާންކުރެއްވި ފުރަތަމަ ބޭފުޅާއެވެ.

މާލޭގެ މޭޔަރުކަމުގެ ބައި އިލެކްޝަން އޮންނާނީ މޭޔަރުކަމުގައި މިހާރު ހުންނެވި އިންތިޚާބީ ރައީސް ޑރ.މުޙައްމަދު މުޢިއްޒު، ނޮވެމްބަރު 17ގައި ރައީސުލްޖުމްހޫރިއްޔާކަމުގެ ހުވާ ކުރެއްވުމުންނެވެ. މާލެ ސިޓީ މޭޔަރު ޑރ މުޙައްމަދު މުއިއްޒު ވަނީ އެމަނިކުފާނު އަދާކުރައްވަމުންގެންދެވި މޭޔަރުކަމުގެ މަސްޢޫލިއްޔަތުތައް ޑެޕިއުޓީ މޭޔަރު އަޙްމަދު ނަރީޝްއާއި ވަގުތީގޮތުން ހަވާލުކުރައްވާފައެވެ.