ރަޝިޔާގެ އަސްކަރިއްޔާއިން ޔޫކްރެއިންގެ ރަށްތަކަށް އަމާޒުކޮށް ޑްރޯނާއި ކްރޫޒް މިސައިލް ބޭނުންކޮށްގެން ވަރުގަދަ ހަމަލާތަކެއް ދީފައިވާ ކަމުގައި ޔޫކްރެއިންގެ ވައިގެ ސިފައިން ބުނެފިއެވެ. ރަޝިޔާގެ ގިނަ ހަމަލަތައް އަމާޒުކޮށްފައި ވަނީ މިކޮލައިފާއި ދްނީޕްރޯޕެތްރޯވްސްކާއަށެވެ.
ޔޫކްރެއިންގެ އަސްކަރިއްޔާއިން ބުނީ އެ ޤައުމުގެ ރަށްތަކަށް ހަމަލަދިނުމަށް ރަޝިޔާއިން 31 ޑްރޯނާއި ކްރޫޒް މިސައިލް ފޮނުވައިލާފައިވާ ކަމުގައެވެ. ނަމަވެސް، އޭގެ ތެރެއިން 29 ޑްރޯނާއި ކްރޫޒް މިސައިލް ދިފާޢުކޮށް ވައްޓައިލާފައިވާނެ ކަމުގައި ޔޫކްރެއިނުން ބުނެއެވެ. ރަޝިޔާގެ ހަމަލާތައް މެދުކެނޑުމެއް ނެތި ތިން ގަޑިއިރަށް ދެމިގެން ދިޔަ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
މިކޮލައިފާއި ދްނީޕްރޯޕެތްރޯވްސްކާއަށް ރަޝިޔާއިން ހަމަލާ ދީފައި މި ވަނީ، ޔޫކްރެއިންގެ ސަރަޙައްދީ ރޮނގު ކައިރީގައި އޮންނަ ރަޝިޔާގެ ރަށަކަށް އަމާޒުކޮށް ޔޫކްރެއިނުން ކްލަސްޓަރ ބޮމުގެ ހަމަލަތަކެއް ދީފައިވާ ކަމަށް ރަޝިޔާއިން ބުނެފައިވާ ދަނޑިވަޅެއްގައެވެ. ޔޫކްރެއިންގެ ހަމަލަތައް އަމާޒުކޮށްފައި ވަނީ ރަޝިޔާގެ ބްރިޔަންސްކް ސަރަޙައްދުގެ ރަށެއް ކަމުގައިވާ ކްލީމަވާއަށެވެ.
ބްރިޔަންސްކުގެ ގަވަރުނަރު އަލެކްސާންދްރަ ބަގާމާސް ވިދާޅުވީ، ޔޫކްރެއިނުން ދީފައިވާ ކްލަސްޓަރ ބޮމުގެ ހަމަލަތަކުގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައި ނެތް ކަމުގައެވެ. މީގެ ކުރިން ވެސް ޔޫކްރެއިނުން ސަރަޙައްދީ ރޮނގު ހުރަސްކޮށް ބްރިޔަންސްކަށް ހަމަލަތައް އަމާޒުކޮށްފައިވާ ކަން ފާހަގަ ކުރެވެއެވެ.
ކްލަސްޓަރ ބޮން ބޭނުން ކޮށްގެން ބްރިޔަންސްކަށް ހަމަލަދީފައިވާ ކަމަށް ރަޝިޔާއިން ތުހުމަތު ކުރި ނަމަވެސް، ޔޫކްރެއިނުން އެ ކަން ކަށަވަރު ކޮށްދީފައެއް ނުވެއެވެ. ސަރަޙައްދީ ރޮނގު ހުރަސްކޮށް ދޭ މި ފަދަ ހަމަލަތަކާ ގުޅިގެން ވާހަކަ ދައްކަން ޔޫކްރެއިނުން ދެކޮޅު ހަދައެވެ. ޔޫކްރެއިންގެ ފައުޖުތަކަށް ކްލަސްޓަރ ބޮން ފޯރުކޮށްދީފައި ވަނީ އެމެރިކާއިންނެވެ.
ކްލަސްޓަރ ބޮން ނުވަތަ މިޔުނިޝަންސްއަކީ އެއް ފަހަރާ ބޮޑު ސަރަޙައްދަކަށް ހަމަލަދޭން ބޭނުންކުރެވޭ ނުރައްކާތެރި ހަތިޔާރެކެވެ. އޭގެ އެންމެ ހަތިޔާރެއް ބޭނުންކޮށްގެން ދޭ ހަމަލައެއްގެ އަސަރު ދޭއް ނުވަތަ ތިން ފުޓުބޯޅަ ދަނޑުގެ ސަރަޙައްދަކަށް ކުރާނެއެވެ. އެއީ، ގެއްލުންދެނިވި އަދި ފަނާކުރަނިވި ހަތިޔާރެއްގެ ގޮތުގައި ދުނިޔޭގެ ގިނަ ޤައުމުތަކާއި އިންސާނީ ހައްޤުތަކަށް ވަކާލާތުކުރާ ޖަމުޢިއްޔާތަކުން ގަބޫލުކުރެއެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައަށް 587 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ.
ކައުންޓަރއޮފެންސިވްގައި ޔޫކްރެއިންގެ ފައުޖުތަކަށް ބޮޑެތި ހުރަސްތަކެއް ކުރިމަތިވަމުން ދިޔަ ނަމަވެސް، ޔޫކްރެއިނުން ދަނީ ކޮންމެ ވެސް ވަރެއްގެ ކުރިއެރުންތަކެއް ހޯދަމުންނެވެ. އަދި، އިރުމައްޗާއި ދެކުނުގައިވާ ޒަޕޮރީޜިޔާ ހިމެނޭ ސަރަޙައްދުގެ ބައެއް ރަށްތަކާއި އަވަށްތައް ރަޝިޔާ ސިފައިންގެ އަތްދަށުން މިނިވަން ކޮށްފައިވާ ކަން ފާހަގަ ކޮށްލަން ޖެހެއެވެ.
ކައުންޓަރއޮފެންސިވް ކުރިއަށް ގެންދިޔުމުގައި ޔޫކްރެއިނަށް އެންމެ ބޮޑު އެހީތެރިކަމެއް ފޯރުކޮށްދެމުންދާ ޤައުމަކީ އެމެރިކާއެވެ. ނަމަވެސް، އެމެރިކާގެ އިދިކޮޅު ރިޕަބްލިކަން ޕާޓީގެ ބައެއް މެންބަރުން މިހާރު ދަނީ ޔޫކްރެއިނަށް އަސްކަރީ އެހީތެރިކަން ފޯރުކޮށްދިނުން ހުއްޓުވަން މަސައްކަތް ކުރަމުންނެވެ. އެ ކަން ކާމިޔާބުވެއްޖެ ނަމަ، ޔޫކްރެއިންގެ އަސްކަރިއްޔާއަށް ވަރަށް ބޮޑު ގެއްލުމަކާ ކުރިމަތިލާން ޖެހޭނެ ކަމުގައި މަސްރަޙު ދިރާސާކުރާ ފަރާތްތަކުން ޤަބޫލު ކުރެއެވެ.
އަދި، ޔޫކްރެއިންގެ މިނިވަންކަމަށް ކުރަމުންދާ ހަނގުރާމައިގައި ނާކާމިޔާބީއާ ކުރިމަތިލާން ޖެހޭނެ ކަމުގައި އެ ފަރާތްތަކުން ދެކެއެވެ. ރަޝިޔާ-ޔޫކްރެއިން ހަނގުރާމަ ފެށި ފަހުން އެމެރިކާއިން ޔޫކްރެއިނަށް ފޯރުކޮށްދީފައިވާ ހަތިޔާރާއި އަސްކަރީ އެހީގެ އަގު މިހާރު 43 ބިލިޔަން އެމެރިކާ ޑޮލަރަށް އަރައެވެ.