މިޞްރުގެ ފުލުހުންގެ މަރުކަޒެއްގައި ހިނގި ނުރައްކާތެރި އަލިފާނުގެ ހާދިސާއެއްގައި 25 މީހުން ފިހިއްޖެއެވެ. އަލިފާނުގެ ހާދިސާ ހިނގާފައި ވަނީ އިސްމާޢިލިއްޔާގައި ހުންނަ ފުލުހުންގެ މައި އިދާރާ ކަމުގައިވާ "ސެކިޔުރިޓީ ޑިރެކްޓަރޭޓް"ގެ އޮފީސްތައް ހުންނަ ޢިމާރާތުގައެވެ. އެ ތަނުގައި ރޯވި އަލިފާންގަނޑު ނިއްވައިލެވުނީ ހަޔެއްކަ ގަޑިއިރުގެ މަސައްކަތުންނެވެ.
އެ ޢިމާރާތުގައި އަލިފާން ރޯވާން މެދުވެރިވި ސަބަބު ދެނެގަނެވިފައި ނުވާ ކަމުގައި މިޞްރުގެ އޮފިޝަލުން ވިދާޅުވެއެވެ. އެ ޤައުމުގެ އެމްބިޔުލާންސް އިދާރާއިން ބުނީ، މި ހާދިސާގައި ފިހިގެންނާއި ދުމުގެ އަސަރު ކޮށްގެން 25 މީހަކު ހޮސްޕިޓަލަށް ގެންގޮސް ފަރުވާ ދޭން ޖެހުނު ކަމުގައެވެ. އަލިފާން ރޯވެ، ޢިމާރާތުގެ ބައެއް ވެއްޓިފައިވާ ކަމުގައި މަންޒަރު ފެނުނު މީހުން ބުނެއެވެ.
މިޞްރުގެ ދާޚިލީ ވަޒީރު މަޙްމޫދު ތަވްފީޤް ވިދާޅުވީ، އެ ތަނުގައި އަލިފާން ރޯވާން މެދުވެރިވި ސަބަބު ދެނެގަތުމަށް ޚާއްޞަ ކޮމިޓީއެއް އެކުލަވައިލާފައިވާ ކަމުގައެވެ. އަދި، އެ ތަން ޢިމާރާތް ކުރުމުގައި ހުރި މައްސަލަތައް ވެސް އެ ކޮމިޓީން ދެނެގަންނާނެ ކަމުގައި އޭނާ ވިދާޅުވިއެވެ.
މިއީ، އިސްމާޢިލިއްޔާގައި މި ފަދަ ނުރައްކާތެރި އަލިފާނުގެ ހާދިސާއެއް ހިނގާފައިވާ ފުރަތަމަ ފަހަރެއް ނޫނެވެ. 2022 ވަނަ އަހަރުގެ އޮގަސްޓު މަހު އެ ރަށުގައި ހުންނަ ނަޞާރާދީނުގެ ފައްޅިއެއްގައި ހިނގި އަލިފާނުގެ ހާދިސާއެއްގައި 41 މީހުން މަރުވެ، ގިނަ ޢަދަދެއްގެ ބަޔަކު ފިހުނެވެ.