ތުރުކީވިލާތުގެ ވެރިރަށް އަންކަރާގައި ބޮމެއް ގޮއްވައިލައިގެން ދިން ހަމަލާގެ ޒިންމާ އުފުލާ ކަމަށް ޓެރެރިސްޓު ޖަމާޢަތެއް ކަމުގައިވާ ކުރްދިސްތާން ވޯކަރސް ޕާޓީ (ޕީ.ކޭ.ކޭ)ން ބުނެފިއެވެ. ޓެރެރިސްޓަކު އަމިއްލައަށް ފުރާނަ ނަގައިލައިގެން ދިން ހަމަލާގައި ބޮން ގޮއްވައިލާފައި ވަނީ އަންކަރާގައި ހުންނަ އެ ޤައުމުގެ ދާޚިލީ ވުޒާރާއާއި ޤާނޫނު ހަދާ މަޖިލީހުގެ އިދާރާ ކައިރީގައެވެ.
ބޮން ގޮއްވައިލާފައި ވަނީ ޗުއްޓީއަށް ފަހު ތުރުކީވިލާތުގެ ޤާނޫނު ހަދާ މަޖިލީހުގެ ޖަލްސާއެއް ބޭއްވުމަށް ތައްޔާރުވަމުން ދިޔަ ވަގުތުގައެވެ. ބޮމުގެ ހަމަލައެއް ދީފައިވީ ނަމަވެސް، ރާވާފައިވާ ގޮތަށް ޤާނޫނު ހަދާ މަޖިލީހުގެ ޖަލްސާއެއް ބާއްވާފައިވެއެވެ. އަދި، އެ ޖަލްސާގައި ތުރުކީވިލާތުގެ ރައީސް ރަޖަބް ޠައްޔިބް އުރުދުޣާން ވަނީ ތަޤުރީރު ކުރައްވާފައެވެ.
މަޖިލީހުގައި ވާހަކަފުޅު ދައްކަވަމުން އުރުދުޣާން ވިދާޅުވީ، ތުރުކީވިލާތުގެ އަމަންއަމާން ކަމާއި ސުލްޙަ ނަގައިލަން "ޓެރެރިސްޓުން" ކުރަމުންދާ މަސައްކަތްތައް ކާމިޔާބުވިޔަ ނުދެއްވާނެ ކަމުގައެވެ. އަދި، މިއަދު ޓެރެރިސްޓުން ދޭން އުޅުނު ހަމަލާ ހުއްޓުވާފައި ވަނީ ތުރުކީވިލާތުގެ ހިތްވަރުގަދަ ފުލުހުން ކަމުގައި އޭނާ ވިދާޅުވިއެވެ. އަދި، ހަމަލަ ދިނުމުގެ ފަހަތުގައިވާ ދެ ޓެރެރިސްޓުން މަރުވެފައިވާ ކަމުގައި ވެސް އޭނާ ވިދާޅުވިއެވެ.
މި ހަމަލާގައި ދެ ފުލުހަކަށް އަނިޔާވިއެވެ. އެ ދެ މީހުންނަށް ހޮސްޕިޓަލުގައި އެޑްމިޓު ކޮށްގެން ދަނީ ފަރުވާ ދެމުންނެވެ. ތުރުކީވިލާތުގެ ދާޚިލީ ވަޒީރު ޢަލީ ޔައަލިކަޔާ ވަނީ ފަރުވާ ހޯދަމުންދާ ދެ ފުލުހުންނަށް ޒިޔާރަތް ކުރައްވައި، އެ ދެ މީހުންގެ ހާލުއަހުވާލު އޮޅުންފިލުވާފައެވެ.
މި ހަމަލާގެ ފަހަތުގައިވާ ބަޔަކު ދެނެގަތުމަށް ތުރުކީވިލާތުގެ އިދާރާތަކުން ތަހުޤީޤު ފަށާފައިވާއިރު، ހަމަލާގައި އަމަލީ ގޮތުން ބައިވެރިވި ދެ ޓެރެރިސްޓުން ދާޚިލީ ވުޒާރާ ކައިރިއަށް ދަތުރު ކޮށްފައި ވަނީ ވަގަށް ނަގާފައިވާ އުޅަނދެއްގައި ކަމަށް އޮފިޝަލުން ވިދާޅުވިއެވެ. އަދި، އެ މީހުން އެ އުޅަނދު ވަގަށް ނެގުމަށް ފަހު އޭގެ ވެރިފަރާތް މަރައިލާފައިވާ ކަމަށް ވެސް އޮފިޝަލުން ވިދާޅުވިއެވެ. އުޅަނދު ވަގަށް ނަގާފައި ވަނީ އަންކަރާގެ އިރުދެކުނުން 260 ކިލޯމީޓަރު ދުރުގައި އޮންނަ ކައިސިރިނިން ކިޔާ ރަށަކުންނެވެ.
2015 އާއި 2016 ވަނަ އަހަރުގެ ތެރޭގައި އަންކަރާގައި މި ފަދަ ގިނަ ޢަދަދެއްގެ ހަމަލަތަކެއް ދީފައިވެއެވެ. އެ ހަމަލަތަކުގެ ފަހަތުގައި އޮތީ ޕީ.ކޭ.ކޭގެ އިތުރުން ޓެރެރިސްޓު ޖަމާޢަތެއް ކަމުގައިވާ އިސްލާމިކް ސްޓޭޓް (އައި.އެސް)އެވެ. ނަމަވެސް، މިއީ 2016 ވަނަ އަހަރަށް ފަހު އަންކަރާގައި ދީފައިވާ މި ފަދަ ފުރަތަމަ ހަމަލައެވެ.
އަންކަރާގައި އެންމެ ފަހުން ދީފައި މިވާ ހަމަލާގެ ފަހަތުގައި އޮތް ކަމަށް ބުނާ ޕީ.ކޭ.ކޭއަކީ 1984 ވަނަ އަހަރު ހަތިޔާރު ނަގައި ހަރަކާތްތެރިވާން ފަށާފައިވާ ޖަމާޢަތެކެވެ. އެއީ، "ޓެރެރިސްޓު" ޖަމާޢަތެއްގެ ގޮތުގައި ތުރުކީވިލާތުގެ އިތުރުން ވިލާތުގެ އިއްތިހާދު (އީ.ޔޫ) އަދި އެމެރިކާއިން ވެސް ވަނީ ކަނޑައަޅާފައެވެ. އެ ޖަމާޢަތުން ތުރުކީވިލާތުގެ ސަރުކާރާ ދެކޮޅަށް ހަތިޔާރު އުފުލާފައި ވަނީ އެ ޤައުމުގެ އިރުދެކުނުގައިވާ ކުރުދިސްތާންގެ ނަން ދީފައިވާ ސަރަޙައްދުގައި އަމިއްލަ ދަޢުލަތެއް އުފެއްދުމުގެ މަޤުޞަދުގައެވެ.
2015 އަދި 2016 ވަނަ އަހަރު އަންކަރާގައި ގިނަ ޢަދަދެއްގެ ޓެރެރިސްޓު ހަމަލަ ދީފައިވާއިރު، 2016 ވަނަ އަހަރުގެ މާރިޗު މަހުގެ 13 ވަނަ ދުވަހު ކާރު ބޮމެއް ގޮއްވައިލައިގެން ދިން ހަމަލައެއްގައި 37 މީހުން ވަނީ މަރައިލާފައެވެ. އަދި، އެ އަހަރުގެ ފެބުރުވަރީ މަހުގެ 17 ވަނަ ދުވަހު ދިން ކާރުބޮމުގެ އެހެން ހަމަލައެއްގައި 28 މީހުން މަރުވިއެވެ.
2015 ވަނަ އަހަރުގެ އޮކްޓޫބަރު މަހުގެ 10 ވަނަ ދުވަހު އަންކަރާގެ ދެ ސަރަޙައްދަކަށް އަމާޒުކޮށް ބޮމުގެ ހަމަލަތަކެއް ދީފައިވެއެވެ. އެ ހަމަލަތަކުގައި 100 އަށްވުރެ ގިނަ މީހުން މަރުވިއެވެ. އެ ހަމަލާގެ ފަހަތުގައި އޮތީ އައި.އެސް ޖަމާޢަތް ކަމަށް ބެލެވެއެވެ.