އިންޑިޔާގެ ވެރިރަށް ނިއު ދިއްލީގައި ހުންނަ އަފްޣާނިސްތާނުގެ އެމްބަސީން ޚިދުމަތް ދިނުން ހުއްޓައިލާ، އެ ތަން ބަންދުކޮށްފިއެވެ. ދިއްލީގައި ހުންނަ އަފްޣާނިސްތާނުގެ އެމްބަސީ ބަންދުކޮށްފައި މި ވަނީ، އަފްޣާނިސްތާނުގެ އިންތިޚާބީ ސަރުކާރު ވައްޓައިލާ ޠާލިބާނުން އެ ޤައުމުގެ ވެރިކަން ފޭރިގަތްތާ ދެ އަހަރު ފަހުންނެވެ.
ޠާލިބާނުން އަފްޣާނިސްތާނުގެ ވެރިކަން ފޭރިގަނެފައި ވަނީ 2021 ވަނަ އަހަރުގެ އޮގަސްޓު މަހުއެވެ. ވެރިކަން ފޭރިގަތުމަށް ފަހު ޠާލިބާނުންގެ ސަރުކާރެއް ޤާއިމުކޮށްފައިވީ ނަމަވެސް، ގިނަ ޤައުމުތަކުން ޠާލިބާނުންގެ ސަރުކާރު ބަލައިގަނެފައެއް ނުވެއެވެ. އޭގެ ތެރޭގައި އިންޑިޔާ ވެސް ހިމެނެއެވެ.
ބޭރު ޤައުމުތަކުގައި ޤާއިމު ކޮށްފައިވާ އަފްޣާނިސްތާނުގެ އެމްބަސީތަކުގައި އަދިވެސް ތިބީ، ކުރީގެ ސަރުކާރުން ޢައްޔަންކޮށްފައިވާ ސަފީރުންނާއި އޮފިޝަލުން ކަން ފާހަގަކޮށްލަން ޖެހެއެވެ. އަދި، އެ ފަރާތްތަކުން ދަނީ، ޠާލިބާނުންގެ ސަރުކާރު ބަލައިގަންނަން ދެކޮޅު ހަދަމުންނެވެ. އަދި، އެމްބަސީތަކުގެ ޢިމާރާތްތަކާއި މުދާ ޠާލިބާނުންގެ ސަރުކާރާ ހަވާލު ކުރަން ދެކޮޅު ހަދަމުންނެވެ.
ދިއްލީގައި ހުންނަ އަފްޣާނިސްތާނުގެ އެމްބަސީން ނެރުނު ބަޔާނެއްގައި ބުނެފައި ވަނީ، އެ ތަނުން ދެމުންދިޔަ ޚިދުމަތްތައް ހުއްޓައިލާ، އެމްބަސީ ބަންދު ކުރަން ނިންމުމަކީ ހިތާމަވެރި ނިންމުމެއް ކަމުގައެވެ. އެމްބަސީ ބަންދު ކުރަން މަޖުބޫރުވީ މުވައްޒަފުންގެ ޢަދަދު މަރުވެ، އެ ތަނުގައި މަސައްކަތް ކުރާ މުވައްޒަފުންނަށް ވިސާ ހަމަޖައްސަން ދަތިތަކާ ކުރިމަތިވުމުގެ ސަބަބުން ކަމަށް ވެސް ބަޔާނުގައި ބުނެފައިވެއެވެ.
އެމްބަސީ ބަންދުކުރުމާ އެކު އިންޑިޔާގެ ޚާރިޖީ ވުޒާރާއިން ވަނީ ވަގުތީ ގޮތުން އެ ތަނާ ހަވާލުވެފައެވެ. އަދި، އަފްޣާނިސްތާނުގެ ސަފީރާއި އެ ތަނުގެ އިސް މުވައްޒަފުން އިންޑިޔާ ދޫކޮށް މިހާރު ފުރާފައިވާ ކަމަށް ވެސް ރިޕޯޓުތައް ބުނެއެވެ. އެމްބަސީ ތެރޭގައި ހަމަނުޖެހުންތަކެއް ހިނގާފައިވާ ކަމަށް ބައެއް ރިޕޯޓުތައް ބުނި ނަމަވެސް، އެމްބަސީން ނެރުނު ބަޔާނުގައި އެ ކަން ދޮގު ކުރެއެވެ.
2021 ވަނަ އަހަރުގެ އޮގަސްޓު މަހު ޠާލިބާނުން އަފްޣާނިސްތާނުގެ ވެރިކަން ފޭރިގަތުމުގެ ކުރިން އިންޑިޔާއިން ވަނީ ކާބުލްގައި ހުންނަ އެ ޤައުމުގެ އެމްބަސީ ބަންދުކޮށްފައެވެ. އަދި، އެ ތަނުގައި ތިބި ހުރިހާ އޮފިޝަލުން ރައްކާތެރި ކަމާ އެކު އިންޑިޔާއަށް ގެންގޮސްފައެވެ. ނަމަވެސް، އިންޑިޔާގެ އެމްބަސީގައި މިހާރު މަދު ޢަދަދެއްގެ މުވައްޒަފުން މަސައްކަތް ކުރަމުންދާ ކަމަށް އޮފިޝަލުން ވިދާޅުވިއެވެ.
ޠާލިބާނުންގެ އަމަލުތަކާ ގުޅިގެން އަފްޣާނިސްތާނުގައި ހުންނަ ބޭރު ޤައުމުތަކުގެ ގިނަ އެމްބަސީތައް ބަންދު ކުރިއެވެ. ބަންދު ނުކޮށް މެދުކެނޑުމެއް ނެތި ޚިދުމަތް ދެމުން ގެންގޮސްފައި ވަނީ މަދު އެމްބަސީއެއްގައެވެ. އެއީ، ޕާކިސްތާނާއި ޗައިނާގެ އިތުރުން ރަޝިޔާގެ އެމްބަސީއެވެ.
2021 ވަނަ އަހަރު ޠާލިބާނުން އަފްޣާނިސްތާނުގެ އިންތިޚާބީ ސަރުކާރު ވައްޓައިލުމާ ގުޅިގެން ގިނަ ޢަދަދެއްގެ ބަޔަކު ބޭރު ޤައުމުތަކުގައި ތާށިވިއެވެ. އިންޑިޔާގައި ވެސް އެތަކެއް ހާސް ބަޔަކު ތާށިވެފައިވާ ކަމަށް ރިޕޯޓުތައް ބުނެއެވެ.
އޭގެ ތެރޭގައި އިންޑިޔާގެ އަސްކަރީ މަރުކަޒުތަކުގައި ތަމްރީނު ހޯދަމުންދާ އަފްޣާނިސްތާނުގެ އެތަކެއް ހާސް ސިފައިންނާއި، ވިޔަފާރިވެރިންގެ އިތުރުން ބޭސްފަރުވާއަށް އިންޑިޔާއަށް ދަތުރުކުރި މީހުން ހިމެނެއެވެ. އޭގެ ތެރެއިން ގިނަ މީހުން އެނބުރި އަފްޣާނިސްތާނަށް ދިޔުމަށް ދަނީ ދެކޮޅު ހަދަމުންނެވެ.
ބޭރު ޤައުމުތަކުގައި ހުންނަ އަފްޣާނިސްތާނުގެ އެމްބަސީތަކުގެ ތެރެއިން ޠާލިބާނުންނަށް ބާރު ހިންގޭ އޮތީ މަދު އެމްބަސީއެކެވެ. އޭގެ ތެރޭގައި ޕާކިސްތާނާއި، ޗައިނާއާއި، ތުރުކީވިލާތުގެ އިތުރުން އީރާނުގެ ހުންނަ އެ ޤައުމުގެ އެމްބަސީތައް ހިމެނެއެވެ. އެހެން ޤައުމުތަކުގެ ހުންނަ އެމްބަސީތަކުގައި މި ވަގުތު ސަފީރުން ނެތް ކަމުގައިވީ ނަމަވެސް، އެ ތަންތަނުގައި މުވައްޒަފުން ތިބެއެވެ.