ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގެ 100 މީޓަރު ދުވުމުގައި ވާދަކޮށް މުޙައްމަދު މިންހާލް ޝާމިން، ޤައުމީ ޖޫނިއާ ރިކޯޑު އައުކޮށްފިއެވެ.
ދާދި ފަހުން މަޑަގަސްކަރާގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި މިންހާލް ވަނީ 100 މީޓަރު ދުވުމުގެ ޖޫނިއާ ރިކޯޑު މުގުރާލާފައެވެ. އެގޮތުން މިންހާލް ރިކޯޑު މުގުރާލި ޓައިމިންއަކީ 10.90 ސިކުންތެވެ.
އަދި އޭޝިއަން ގޭމްސްގައި މިއަދު މިންހާލް ރޭސް ނިންމައި ރިކޯޑު އައުކުރި ޓައިމިންއަކީ 10.82 ސިކުންތެވެ. މިންހާލް ދިޔައީ އޭނާ ވާދަކުރި ހީޓުގެ ހަތްވަނައެވެ. އެ ހީޓުގެ އެއްވަނަ ހޯދި މެލޭޝިއާގެ ބިން މުޙައްމަދު ފަހުމީގެ ޓައިމިން އަކީ 10.28 ސިކުންތެެވެ.
މިންހާލުގެ ކުރިން މި ރެކޯޑް އޮތީ 2021 ވަނަ އަހަރުގެ ނެޝަނަލް ޗެމްޕިއަންޝިޕުގައި ރިކޯޑު ހެދި އިބާދުﷲ އާދަމުގެ އަތުގަވެ. އެގޮތުން އިބާދުﷲ ރިކޯޑު ހެދީ 10.95 ސިކުންތުން ރޭސް ނިންމައިގެންނެވެ.
މިންހާލަކީ ބެންކް އޮފް މޯލްޑިވްސް (ބީއެމްއެލް) ސްކޮލަޝިޕުގެ ދަށުން ޖެމެއިކާގައި ޓްރެއިނިން ފުރިހަމަ ކުރަމުން އަންނަ އެތުލީޓެކެވެ. މިދިޔަ އަހަރު ތުރުކީގެ ކޮންޏާގައި ބޭއްވި އިސްލާމިކް ސޮލިޑާރިޓީ ގޭމްސްގައިވެސް މިންހާލް ވަނީ ވާދަކޮށްފައެެެވެ.
މި ފަހަރުގެ އޭޝިއަން ގޭމްސްގައި ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު ވާދަކުރި 100 މީޓަރު ދުވުމުގައި އޭނާ ދިޔައީ އެ ހީޓުގެ ހަވަނައަށެވެ. ސާއިދުގެ ޓައިމިންއަކީ 10.71 ސިކުންތެވެ. އެ ހީޓުގެ އެެއްވަނަ ދިޔަ އިންޑޮނީޝިއާގެ ޒޮހްރީ ލާލް މުޙައްމަދުގެ ޓައިމިންއަކީ 10.22 ސިކުންތެވެ.