ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގެ ޓޭބަލް ޓެނިސް މިކްސް ޑަބަލްސްގެ ގަދަ 16 ބުރުން ރާއްޖޭގެ އައިޝަތު ރަފާ ނާޒިމާއި މޫސާ މުންސިފް އަޙްމަދުގެ ޕެއާ ޖާގަ ހޯދައިފިއެވެ.
މިއަދު ހަވީރު ކުޅުނު މިކްސް ޑަބަލްސްގެ ގަދަ 32 ކުޅުންތެރިންގެ ބުރުގެ މެޗުގައި ރަފާ އާއި މުންސިފްގެ ޕެއާ ވާދަކޮށްފައިވަނީ ޕާކިސްތާނުގެ ހައިޤާ ހަސަން އާއި މުޙައްމަދު ޝާހް ޚާންގެ ޕެއާއާއެވެ. ފޯރިގަދަ ކުޅުމެއް ފެނިގެންދިޔަ މި މެޗު ރަފާ އާއި މުންސިފްގެ ޕެއާ ކާމިޔާބުކޮށްފައިވަނީ 3-2 ސެޓުންނެވެ.
މި މެޗުގެ ފުރަތަމަ ސެޓު 11-5 އިން ރަފާ އާއި މުންސިފްގެ ޕެއާއިން ކާމިޔާބުކުރި ނަމަވެސް، ޖެހިގެން އައި ދެ ސެޓު ޕާކިސްތާނުގެ ޕެއާއިން ވަނީ ގެންގޮސްފައެވެ. އެއީ 11-7 އަދި 16-14 އިންނެވެ. ނަމަވެސް އަނެއް ދެ ސެޓުގައި ރަފާ އާއި މުންސިފްގެ ފަރާތުން މޮޅު ކުޅުމެއް ފެނިގެންދިޔައިރު، އެ ދެ ސެޓު އެ ޕެއާއިން ކާމިޔާބުކޮށްފައިވަނީ 11-7 އަދި 11-9 އިންނެވެ.
މި މޮޅާއެކު މިކްސް ޑަބަލްސްގެ ގަދަ 16 ބުރުން ރަފާ އާއި މުންސިފްގެ ޕެއާ ޖާގައެއް ހޯދިއިރު، މިއީ އޭޝިއަން ގޭމްސްގެ ޓީޓީ އިވެންޓުގައި ރާއްޖޭގެ ކުޅުންތެރިން ގަދަ 16 ބުރުގެ ޖާގައެއް ހޯދި ފުރަތަމަ ފަހަރެވެ.