ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގައި ވާދަކުރަމުން އަންނަ ޝޫޓިން ޓީމުގައި ހިމެނޭ ސްޓާފް ސާޖަންޓް ޝަރަފިއްޔާ އަބްދުއްރަޙްމާން، 10 މީޓަރު އެއާ ރައިފަލްގެ އަންހެން ޤައުމީ ރިކޯޑު އައުކޮށްފިއެވެ.
އަންހެން ރިކޯޑު ޝަރަފިއްޔާ އައުކުރީ އިއްޔެ ކުރިއަށްދިޔަ ކޮލިފިކޭޝަނުގައި ވާދަކޮށް 605.9 ގެ ސްކޯއެއް ހަދައިގެންނެވެ. މީގެ ކުރިން ޝަރަފިއްޔާ މި ރިކޯޑު ހަދާފައިވަނީ އިންޑޮނޭޝިއާގެ ޖަކާޓާގައި މި އަހަރު ކުރިއަށްދިޔަ އޭޝިއަން ރައިފަލް ޕިސްޓަލް ކަޕް 2023 ގައި ވާދަކޮށްގެން 589.6 ގެ ސްކޯއެއް ހަދައިގެންނެވެ.
ޝަރަފިއްޔާގެ ކުރިން މި ރިކޯޑު އޮތީ ލާންސް ކޯޕްރަލް އާސިފާ ޖައުފަރުގެ އަތުގައެވެ. އެއީ 2019 ވަނަ އަހަރު އޮތް 13 ވަނަ ސައުތު އޭޝިއަން ގޭމްސްގައި ވާދަކޮށް 589.3 ޕޮއިންޓް ހޯދައިގެންނެވެ.
އޭޝިއަން ގޭމްސްގައި ވާދަކޮށް ޝަރަފިއްޔާ 10 މީޓަރު އެއާ ރައިފަލްގެ އަންހެން ޤައުމީ ރިކޯޑު މުގުރާލި ނަމަވެސް، ކޮލިފިކޭޝަން އޭނާ ނިންމާލީ 59 އެތުލީޓުން ވާދަކުރި އިވެންޓުގެ ފުލުގައި އޮވެގެންނެވެ.
މީގެ އިތުރުން 10 މީޓަރު އެއާ ރައިފަލްގެ ފިރިހެން އިވެންޓުގެ ކޮލިފިކޭޝަނުގައި މިއަދު ވާދަކޮށްފައިވަނީ ކޯޕްރަލް އިބްރާހީމް ޝިފާނެވެ. އޭނާ 603.4 ގެ ސްކޯއެއް ހެދި ނަމަވެސް، 54 އެތުލީޓުން ވާދަކުރި އިވެންޓުގައި ދިޔައީ ފުލަށެވެ.
މީގެ ކުރިން 2019 ވަނަ އަހަރު ބޭއްވި ސައުތު އޭޝިއަން ގޭމްސްގައި ޝިފާން ވަނީ 604.9 ގެ ސްކޯއެއް ހޯދައި، މި ރިކޯޑު މުގުރާލާފައެވެ.