ނޭޕާލުގައި މިހާރު ކުރިއަށްދާ 19 އަހަރުން ދަށުގެ ސާފް ޗެމްޕިއަންޝިޕް ފުޓްބޯޅަ މުބާރާތުގައި ރާއްޖެއިން ކުޅުނު ފުރަތަމަ މެޗުން ޕާކިސްތާނާ އެއްވަރުވެއްޖެއެވެ.
ކަތުމަންޑޫގެ ދަޝްރަތު ސްޓޭޑިއަމުގައި މިއަދު ކުޅުނު މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.
މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ރާއްޖެއިންނެވެ. މެޗުގެ 39 ވަނަ މިނެޓުގައި އޭރިއާ ތެރެއިން ފޮނުވާލި ރީތި ހަމަލާއަކުން މި ލަނޑު ކާމިޔާބުކޮށްދިނީ ދިވެހި ޕްރިމިއަރ ލީގުގައި ޔުނައިޓެޑް ވިކްޓަރީ (ޔޫވީ) ގައި މި ފަހުން ތަފާތު މޮޅު ކުޅުމެއް ދައްކަމުން އަންނަ އަދި 19 އަހަރުން ދަށުގެ ޓީމުގެ ކެޕްޓަން ޝަނާން ރަޝާދެވެ.
އެކަމަކު މެޗު ނިމެން ހަ މިނެޓަށް ވެފައި ވަނިކޮށް ޕާކިސްތާނުން ވަނީ ނަތީޖާ އެއްވަރުކޮށްފައެވެ. މެޗުގެ 84 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޝާހް ޖަހާނެވެ.
19 އަހަރުން ދަށުގެ ސާފް ޗެމްޕިއަންޝިޕުގައި ރާއްޖެއިން ކުޅުނު ފުރަތަމަ މެޗުން އެއްވަރުވިއިރު، މި ފަހަރުގެ މުބާރާތުގައި ރާއްޖެ ހިމެނެނީ ޕާކިސްތާނުގެ އިތުރުން ނޭޕާލާއެކު ގްރޫޕް އޭގައެވެ. މި ގްރޫޕްގެ ފުރަތަމަ މެޗުން ޕާކިސްތާން ވަނީ 1-0 ގެ ނަތީޖާއަކުން ނޭޕާލް ބަލިކޮށްފައެވެ.
އެއާއެކު ޕާކިސްތާނަށް ސެމީގެ ޖާގައެއް ޔަގީންވެފައި ވާއިރު، ދެވަނަ މެޗުގައި ނޭޕާލާ އެއްވަރުކޮށްލައިގެންވެސް ސެމީއަށް ދިޔުމުގެ ފުރުސަތު ރާއްޖެއަށް އެބައޮތެވެ. މި ވަގުތު ތާވަލުގެ ދެވަނައިގައި އޮތް ރާއްޖެއަށް އެއް ޕޮއިންޓް ލިބިފައިވާއިރު، ތިންވަަނައިގައި އޮތް ނޭޕާލަށް ޕޮއިންޓެއް ލިބިފައެއް ނުވެއެވެ.