ހުސްވެފައިވާ ޖަރުމަންގެ ގައުމީ ޓީމުގެ އައު ކޯޗަކަށް ހޫލިއަން ނާގަލްސްމަން ހަމަޖައްސައިފިއެވެ.
އެ މަޤާމުގައި ކުރިން ހުރީ ހަންސީ ފްލިކެވެ. އޭނާ ވަނީ މި މަހުގެ ކުރީކޮޅު ޖަޕާނާ ދެކޮޅަށް ކުޅުނު އެކުވެރިކަމުގެ މެޗުގައި ތަފާތު ބޮޑު ނަތީޖާއަކުން ބަލިވުމާއެކު މަޤާމުން ވަކިކޮށްފައެވެ.
މީޑިއާ ރިޕޯޓުތައް ބުނާގޮތުން ޖަރުމަނުން ވަނީ އެ ޓީމުގެ ކޯޗަކަށް ؛ލިވަޕޫލުގެ މިހާރުގެ ކޯޗު ޔާގެން ކްލޮޕް ހަމަޖައްސަން މަސައްކަތްކޮށްފައެވެ. ނަމަވެސް ކްލޮޕް އެ މަޤާމަށް އެއްވެސް ޝައުގުވެރިކަމެއް ނެތް ކަމަށް ރިޕޯޓުތައް ބުނެއެވެ.
ޖަރުމަންގެ އާ ކޯޗު ނާގަލްސްމަން އެ ގައުމުގެ ކޯޗަކަށް ހަމަޖައްސާފައިވަނީ އަންނަ އަހަރު އެ ގައުމުގައި ބާއްވާ 2024 ގެ ޔޫރޯގެ ނިޔަލަށް ހަތަރު މިލިއަން ޑޮލަރަށެވެ.
މިއަހަރުގެ މާރޗްމަހު ބަޔާނުން ނާގަލްސްމަންގެ ކޮންޓްރެކްޓް އުވާނުލާތީ އެހެން ޓީމަކަށް އޭނާއަށް ސޮއިކުރެވޭނީ ބަޔާނަށް ފީއެއް ދައްކައިގެން ކަމަށް ރިޕޯޓުތަކުގައި ވެއެވެ. އެހެންކަމުން ނާގަލްސްމަން އަންނަނީ އެ ކޮންޓްރެކްޓް ބާތިލްކުރުމާ ގުޅޭ ކަންކަން ފުރިހަމަ ކުރަމުންނެވެ. ޖަރުމަންގެ ގައުމީ ޓީމާ ނާގަލްސްމަން ހަވާލުވީ އެ ކަންކަމަށް ބަޔާނާ އެކު އެއްބަސްވުމެއް ހެދުމަށްފަހު ކަމަށް ޖަރުމަނު މީޑިއާތަކުން ބުނެއެވެ.
ޖަރުމަނު ކޯޗުގެ މަޤާމުގައި ނާގަލްސްމަންގެ ފުރަތަމަ މެޗަކީ އެމެރިކާއާއި ދެކޮޅަށް އަންނަ މަހުގެ 14 ވަނަ ދުވަހު ކުޅޭ މެޗެވެ.