އޭޝިއަން ގޭމްސް: ޗައިނީސް ޓައިޕޭ އަތުން ޓީޓީ ޓީމުތައް ބަލިވެއްޖެ

ޗައިނާގެ ހަންގްޖޯގައި ކުރިއަށްދާ 19 ވަނަ އޭޝިއަން ގޭމްސްގެ ޓޭބަލް ޓެނިސް ޓީމު އިވެންޓުގައި ޗައިނީސް ޓައިޕޭއަށް ދެކޮޅަށް ކުޅުނު މެޗުތަކުން ރާއްޖޭގެ އަންހެން އަދި ފިރިހެން ޓީމުވެސް ބަލިވެއްޖެއެވެ.

ޓީޓީގެ ޓީމު އިވެންޓް މެޗުތައް މިއަދު ފެށިއިރު، އަންހެން ޓީމުން ކުޅުނު ފުރަތަމަ މެޗުން ޗައިނީސް ޓައިޕޭ އަތުން ބަލިވީ ސީދާ ތިން ގޭމުންނެވެ.

މި މެޗުގެ ފުރަތަމަ ގޭމުގައި ރާއްޖޭގެ އައިޝަތު ރަފާ ނާޒިމް ކުޅެން އެރިއިރު، މި ގޭމުން ރަފާ ބަލިވީ ސީދާ ތިން ސެޓުންނެވެ. މި ގޭމުގެ ސެޓުތައް ދިޔައީ 11-3، 11-3 އަދި 11-1 އިންނެވެ. އަދި ދެވަނަ ގޭމުން ރާއްޖޭގެ ލައިސާ ފަތުހުﷲ އިސްމާޢީލްވެސް ބަލިވީ ސީދާ ތިން ސެޓުންނެވެ. މި ގޭމުގެ ސެޓުތައް ދިޔައީ 11-4، 11-4 އަދި 11-6 އިންނެވެ. ތިންވަނަ ގޭމުގައި ރާއްޖޭގެ ފާތިމަތު ޖުމާނާ ނިމާލް ވާދަކުރިއިރު، ޖުމާނާވެސް ބަލިވެފައިވަނީ ސީދާ ދެ ސެޓުންނެވެ. މި ގޭމުގެ ސެޓުތައް ދިޔައީ 11-3، 11-2 އަދި 11-5 އިންނެވެ.

މީގެ އިތުރުން ފިރިހެން ޓީމުން ކުޅުނު ފުރަތަމަ މެޗުންވެސް ޗައިނީސް ޓައިޕޭ އަތުން ބަލިވީ ސީދާ ތިން ގޭމުންނެވެ.

މި މެޗުގެ ފުރަތަމަ ގޭމުގައި ރާއްޖޭގެ މުޙައްމަދު ޝައްފާން އިސްމާޢީލް ކުޅެން އެރިއިރު، މި ގޭމުން ޝައްފާން ބަލިވީ ސީދާ ތިން ސެޓުންނެވެ. މި ގޭމުގެ ސެޓުތައް ދިޔައީ 11-2، 11-1 އަދި 11-5 އިންނެވެ. އަދި ދެވަނަ ގޭމުން ރާއްޖޭގެ މޫސާ މުންސިފް އަޙްމަދުވެސް ބަލިވީ ސީދާ ތިން ސެޓުންނެވެ. މި ގޭމުގެ ސެޓުތައް ދިޔައީ 11-5، 11-5 އަދި 11-7 އިންނެވެ. ތިންވަނަ ގޭމުގައި ރާއްޖޭގެ އަޚްޔަރު އަޙްމަދު ޚާލިދު ވާދަކުރިއިރު، އަޚްޔަރުވެސް ބަލިވެފައިވަނީ ސީދާ ދެ ސެޓުންނެވެ. މި ގޭމުގެ ސެޓުތައް ދިޔައީ 11-6، 11-5 އަދި 11-2 އިންނެވެ.

ޓީޓީގެ ޓީމު އިވެންޓުގައި ކުޅުނު ފުރަތަމަ މެޗުތަކުން އަންހެން އަދި ފިރިހެން ޓީމުވެސް ބަލިވިއިރު، ދެވަނަ މެޗުގައި މާދަމާ އަންހެން ޓީމު ނުކުންނާނީ އުތުރު ކޮރެއާއާ ދެކޮޅަށެވެ. އަދި ފިރިހެން ޓީމު ނުކުންނާނީ ކަޒަކްސްތާނާ ދެކޮޅަށެވެ.

އޭޝިއަން ގޭމްސްގެ ބައެއް ކުޅިވަރުތައް ފެށިގެން ކުރިއަށްދާއިރު، ގޭމްސް ރަސްމީކޮށް ފެށުމަށް ހަމަޖެހިފައިވަނީ މާދަމާއެވެ. އަންނަ އޮކްޓޯބަރު މަހުގެ އަށްވަނަ ދުވަހުގެ ނިޔަލަށް ގޭމްސް ކުރިއަށްދާއިރު، މި ފަހަރު ރާއްޖޭން ނުވަ ކުޅިވަރެއްގައި ވާދަކުރާނެއެވެ.