ޗައިނާގެ ހަންގްޖޯގައި ކުރިއަށްދާ 19 ވަނަ އޭޝިއަން ގޭމްސްގެ ބީޗް ވޮލީބޯޅަ އިވެންޓުގައި ކުޅުނު ދެ މެޗުންވެސް ބަލިވެ ރާއްޖޭގެ ޤައުމީ ޓީމުގައި ހިމެނޭ އިސްމާޢީލް ސާޖިދު (ކުޑަކާއްޓޭ) އާއި އާދަމް ނަސީމް (އެޑަމް) ގެ ޕެއާ ކަޓައިފިއެވެ.
މުބާރާތުގައި އިއްޔެ ކުޅުނު ފުރަތަމަ މެޗުގައި ޗައިނާގެ ޕެއާ އަތުން އެޑަމް އާއި ކުޑަކާއްޓޭގެ ޕެއާ ބަލިވީ ސީދާ ދެ ސެޓުންނެވެ. މި މެޗުގެ ސެޓުތައް ދިޔައީ 21-11 އަދި 21-12 އިންނެވެ.
އަދި މިއަދު ކުޅުނު ދެވަނަ މެޗުގައި އެޑަމް އާއި ކުޑަކާއްޓޭގެ ޕެއާ ވާދަކުރީ ފިލިޕީންސްގެ ޕެއާއާއެވެ. މި މެޗުންވެސް އެޑަމް އާއި ކުޑަކާއްޓޭގެ ޕެއާ ބަލިވީ ސީދާ ދެ ސެޓުންނެވެ. މި މެޗުގެ ސެޓުތައްވެސް ދިޔައީ 21-11 އަދި 21-12 އިންނެވެ.
އޭޝިއަން ގޭމްސްގައި ވަރުގަދަ ޕެއާތަކާ ދެކޮޅަށް ކުޅެ އެޑަމް އާއި ކުޑަކާއްޓޭގެ ޕެއާ ބަލިވި ނަމަވެސް، ދާދި ފަހުން އެ ޕެއާއިން ވަނީ ބަންގްލަދޭޝްގައި ކުރިއަށްދިޔަ ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) ބީޗް ވޮލީބޯލް ޓުއާއިން ރިހި މެޑަލް ހޯދާފައެެވެ.
އޭޝިއަން ގޭމްސްގެ ބައެއް ކުޅިވަރުތައް ފެށިގެން ކުރިއަށްދާއިރު، ގޭމްސް ރަސްމީކޮށް ފެށުމަށް ހަމަޖެހިފައިވަނީ މާދަމާއެވެ. އަންނަ އޮކްޓޯބަރު މަހުގެ އަށްވަނަ ދުވަހުގެ ނިޔަލަށް ގޭމްސް ކުރިއަށްދާއިރު، މި ފަހަރު ރާއްޖޭން ނުވަ ކުޅިވަރެއްގައި ވާދަކުރާނެއެވެ.