އަޅުވެތިކޮށްފައިވާ ހުޅަނގު އައްސޭރިއާއި ޣައްޒާއަށް އަރައި ޔަހޫދީ އިސްރާޢީލުގެ ޖައްބާރު ސިފައިން ހިންގި ލާއިންސާނީ އުދުވާންތަކެއްގައި ފަލަސްޠީނުގެ ހަތަރު މީހުން ޝަހީދުކޮށްލައިފިއެވެ. އޭގެ ތެރެއިން ތިން މީހުން ޝަހީދުކޮށްލާފައި ވަނީ ހުޅަނގު އައްސޭރީގެ ޖިނީނަށް އަރައި އެ ރަށުގެ ރެފިއުޖީ ކޭމްޕުގައި ޔަހޫދީ ޓެރެރިސްޓު ސިފައިން ހިންގި ލާއިންސާނީ ޖަރީމާތަކެއްގައެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ، ހަތަރު ވަނަ މީހާ ޝަހީދުކޮށްލާފައި ވަނީ ޣައްޒާ ބަންދު ކުރަން ޔަހޫދީ އިސްރާޢީލުން ޖަހާފައިވާ ފެންސް ކައިރީގައި ކަމުގައެވެ. ޝަހީދުކޮށްލާފައި ވަނީ 25 އަހަރުގެ ޔޫސުފް ސާލިމް ރަޛްވާނެވެ. އޭނާ ޝަހީދުކޮށްލާފައި ވަނީ ޚާން ޔޫނިސްގެ އިރުމަތީގައި ޖަހާފައިވާ ފެންސް ކައިރިންނެވެ.
ޔަހޫދީ ސިފައިން ޖިނީން ރެފިއުޖީ ކޭމްޕަށް ދިން އިންސާނިއްޔަތާ ޚިލާފު ހަމަލަތަކުގައި ފަލަސްޠީނުގެ 20 މީހުން ޒަޚަމުވި ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ޖިނީންގައި ހިންގާފައިވާ ލާއިންސާނީ ޖަރީމާތަކާ ގުޅޭ ގޮތުން ޔަހޫދީ އިސްރާޢީލުން ބުނީ ޖިނީން ރެފިއުޖީ ކޭމްޕަށް ޑްރޯން ހަމަލަތަކެއް ދީފައިވާނެ ކަމުގައެވެ. ފަލަސްޠީނުގެ މުސްލިމުންނަށް ހަމަލަދޭން ޔަހޫދީ އިސްރާޢީލުގެ އަސްކަރިއްޔާއިން ދަނީ ޑްރޯނާއި ހެލިކޮޕްޓަރު ފަދަ ބަރުހަތިޔާރު ބޭނުން ކުރަމުންނެވެ.
ޚާން ޔޫނިސްގެ އިރުމަތީގައި އޮންނަ ބައިތް ހަނޫން ޗެކް ޕޮއިންޓް މިހާރު އޮތީ ބަންދުކޮށްފައެވެ. އެއީ، ޣައްޒާއަށް ވަދެނިކުމެ ހަދަން މިހާރު އޮތް ހަމައެކަނި ދޮރެވެ. ޗެކް ޕޮއިންޓް ބަންދުކުރުމާ އެކު، އިސްރާޢީލަށް ވަޒީފާ އަދާކުރަންދާ 18,000 އަށްވުރެ ގިނަ މުސްލިމުން ޣައްޒާގައި ވަނީ ބަންދުވެފައެވެ. ޞިއްޙީ ފަރުވާ ހޯދަން ބޭނުންވާ މީހުންނަށް ވެސް އިސްރާޢީލަށް އެތެރެވުމުގެ ފުރުޞަތު އޮތީ ބަންދުކޮށްފައެވެ.
މި ހަފުތާގެ ކުރީކޮޅު ވެސް ޔަހޫދީ އިސްރާޢީލުން ވަނީ ޣައްޒާ-އިސްރާޢީލް ގުޅޭ ފެންސު ކައިރީގައި ބޮމެއް ގޮއްވައިލާ، ފަލަސްޠީނުގެ ފަސް މީހުން ޝަހީދު ކޮށްލާފައެވެ. އެ ހާދިސާގައި 25 އަށްވުރެ ގިނަ މީހުން ޒަޚަމުވިއެވެ. މި ހަމަލާގެ ފަހަތުގައި އޮތީ ޔަހޫދީ ޓެރެރިސްޓު ދަޢުލަތުގެ ޖައްބާރު ސިފައިން ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
އެއީ، ފަލަސްޠީނުގެ ކުށެއް ނެތް ޢާންމު ރައްޔިތުންނާ ދެކޮޅަށް ޔަހޫދީ ޓެރެރިސްޓު ސިފައިން ބޮމުގެ ހަމަލައެއް ދީފައިވާ ފުރަތަމަ ފަހަރެއް ނޫނެވެ. ބޮން ގޮއްވުމަކީ ފަލަސްޠީނުގެ މުސްލިމުންގެ ފުރާނަ ނަގައިލާ، އެ މީހުންގެ ލޭއޮހޮރުވައިލަން ޔަހޫދީ ޖައްބާރު ސިފައިން ގަޔާވާ އުކުޅެކެވެ. ނަމަވެސް، ޣައްޒާގައި ހިނގި ހާދިސާގައި އެއްވެސް ބައިވެރިވުމެއް ނުވާނެ ކަމަށް ބުނެ ޔަހޫދީ އަސްކަރިއްޔާއިން ވަނީ ދޮގު ހަދާފައެވެ.
ޣައްޒާއަކީ ފަލަސްޠީނުގެ 2 މިލިޔަނެއްހާ މުސްލިމުން ދިރިއުޅޭ ސަހަރެކެވެ. އެއީ ދުނިޔޭގައި އޮތް އެންމެ ބޮޑު ޖަލުގެ ގޮތުގައި ސިފަ ކުރެވޭ ތަނެކެވެ. އެ ތަން ވަށައިގެން ޔަހޫދީ ޓެރެރިސްޓުން ވަނީ ފެންސް ޖަހައި ބަންދުކޮށްފައެވެ. ޣައްޒާގެ ރައްޔިތުންނަށް އެ ތަނަށް ވަދެނިކުމެ ހެދެނީ ޔަހޫދީ ސިފައިންގެ ޗެކް ޕޮއިންޓުތައް ހުރަސް ކޮށްފައެވެ.
ޣައްޒާގެ ރައްޔިތުން މި ގޮތަށް އަޅުވެތި ކޮށްގެން ގެންގުޅުމަކީ ލާއިންސާނީ ޖަރީމާއެއްގެ ގޮތުގައި މުޅި ދުނިޔެ ސިފަ ކުރި ނަމަވެސް، ޔަހޫދީންގެ މި ޖައްބާރު އަމަލު ހުއްޓުވަން އެންމެ އިނގިއްޔެއްހާ މިންވަރު ވެސް ހިއްލައިލާނެ އިދާރާއެއް، ނުވަތަ ޤައުމެއް ނެތް ކަން ފާހަގަ ކޮށްލަން ޖެހެއެވެ. ޔަހޫދީ އިސްރާޢީލުން ފަލަސްޠީނުގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކުގެ ޢަދަދު އިތުރު ކޮށްފައި މި ވަނީ، އ.ދގެ ޢާންމު މަޖިލީހުގެ 78 ވަނަ ޖަލްސާ ކުރިއަށްދާ ދަނޑިވަޅެއްގައި ކަން ފާހަގަކޮށްލަން ޖެހެއެވެ.