ބައިނަލްއަޤުވާމީ އެކުވެރިކަމުގެ މެޗެއްގައި ރޭ ސްކޮޓްލަންޑާ ދެކޮޅަށް ކުޅުނު މެޗު އިންގްލަންޑުން ކާމިޔާބުކޮށްފިއެވެ.
ސްކޮޓްލަންޑުގެ ހެމްޕްޑެން ޕާކުގައި ކުޅުނު މި މެޗު އިންގްލަންޑުން ކާމިޔާބުކޮށްފައިވަނީ 3-1 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި އިންގްލަންޑުން ވަނީ ގާތްގާތުގައި ދެ ލަނޑު ޖަހައި ލީޑު ނަގާފައެވެ. އެގޮތުން މެޗުގެ 32 ވަނަ މިނެޓުގައި ކައިލް ވޯކާގެ އެހީއާއެކު އިންގްލަންޑަށް ލީޑު ނަގައިދިނީ ފިލް ފޯޑެންއެވެ. އަދި އޭގެ ތިން މިނެޓު ފަހުން ޖޫޑް ބެލިންހަމް ވަނީ ލަނޑެއް ޖަހައި، އިންގްލަންޑުގެ ލީޑު ފުޅާކޮށްދީފައެވެ.
އެކަމަކު މެޗުގެ ދެވަނަ ހާފުގައި އިންގްލަންޑުގެ ޑިފެންޑަރު ހެރީ މެގުއާ އަތުން ބައިކޮޅަށް ވަން ލަނޑާއެކު ސްކޮޓްލަންޑުން ވަނީ ފަރަގު ކުޑަކޮށްފައެވެ. އެހެން ނަމަވެސް މެޗުގެ 81 ވަނަ މިނެޓުގައި ކެޕްޓަން ހެރީ ކޭން ވަނީ ލަނޑެއް ޖަހައި، މި މެޗުން އިންގްލަންޑް މޮޅުކޮށްދީފައެވެ.
މި މެޗުން ސްކޮޓްލަންޑް ބަލިވިއިރު، 1999 ވަނަ އަހަރުގެ ފަހުން އިންގްލަންޑް އަތުން މޮޅެއް ހޯދަން ސްކޮޓްލަންޑުން ކުރަމުން އަންނަ އިންތިޒާރު މިއާއެކު ވަނީ ދިގުލައިގެން ގޮސްފައެވެ.