ބައިނަލްއަޤުވާމީ އެކުވެރިކަމުގެ މެޗެއްގައި ރޭ ޖަރުމަނުން ފްރާންސް ބަލިކޮށްފިއެވެ.
އަމިއްލަ ޤައުމުގައި ކުޅުނު މެޗުން ޖަރުމަން މޮޅުވީ 2-1 ގެ ނަތީޖާއަކުންނެވެ. މި މެޗަކީ ޖަރުމަނުގެ ކޯޗުގެ މަޤާމުން ހަންސީ ފްލިކް ވަކިކުރި ފަހުން, އެ ޓީމުން ކުޅުނު ފުރަތަމަ މެޗެވެ. ރޭ އެ ޓީމަށް އިރުޝާދުދިނީ މިހާރު ސްޕޯޓިން ޑިރެކްޓަރެއްގެ މަޤާމުގައި ހުރި ރޫޑީ ވޮލާއެވެ.
ރޭގެ މެޗުގެ ވަރަށް ކުރީކޮޅު ޖަރުމަނުން ވަނީ ލީޑު ނަގާފައެވެ. މެޗު ފަށައިގެން ހަތަރުވަނަ މިނެޓުގައި ބެންޖަމިން ހެންރިޗްސް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ތޯމަސް މުލާއެވެ.
އެއާއެކު މި މެޗުގެ ބޮޑުބައި ޖަރުމަން އެއް ލަނޑުގެ ލީޑެއްގައި އޮތްއިރު، އެ ޓީމުން ލީޑު ފުޅާކޮށްފައިވަނީ މެޗު ނިމެން ތިން މިނެޓަށް ވެފައި ވަނިކޮށެވެ. ކައި ހަވާޓްޒް ދިން ބޯޅައަކުން މި ލަނޑު ޖަހައިދިނީ ލެރޯއި ސާނޭއެވެ. އެކަމަކު އޭގެ ދެ މިނެޓު ފަހުން ލިބުނު ޕެނަލްޓީއަކުން ފްރާންސުން ވަނީ ފަރަގު ކުޑަކޮށްފައެވެ. މި ޕެނަލްޓީ އެ ޓީމަށް ކާމިޔާބުކޮށްދިނީ އެންޓޮއިން ގްރީޒްމަންއެވެ.
މި މެޗުން ފްރާންސް ބަލިވިއިރު، މިއީ މިދިޔަ އަހަރުގެ ފީފާ ވޯލްޑް ކަޕުގެ ފައިނަލުގައި އާޖެންޓީނާ އަތުން ޕެނަލްޓީ ޖަހައިގެން ބަލިވި ފަހުން، ފްރާންސްއަށް ނާކާމިޔާބީއާ ކުރިމަތިލާން ޖެހުނު ފުރަތަމަ މެޗެވެ.