ޔޫރޯ 2024 ގެ ކޮލިފައިން ގްރޫޕް ސީގައި ރޭ ކުޅުނު މެޗުގައި ޔޫކްރެއިން އަތުން އިޓަލީ މުހިންމު މޮޅެއް ހޯދައިފިއެވެ.
އަމިއްލަ ޤައުމުގައި ކުޅުނު މެޗުން އިޓަލީ މޮޅުވީ 2-1 ގެ ނަތީޖާއަކުންނެވެ.
ވާދަވެރި ކުޅުމެއް ފެނިގެންދިޔަ މި މެޗުގައި ދެ ޓީމުންވެސް ލަނޑުތައް ކާމިޔާބުކޮށްފައިވަނީ މެޗުގެ ފުރަތަމަ ހާފުގައެވެ. އެގޮތުން މެޗު ފަށައިގެން 12 ވަނަ މިނެޓުގައި އިޓަލީން ވަނީ ލީޑު ނަގާފައެވެ. މަޓިއާ ޒަކާނީގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ އިންޓަރ މިލާނުގެ ލޯނު އެއްބަސްވުމެއްގެ ދަށުން މި ސީޒަނުގައި ސަސުއޯލޯއަށް ކުޅެމުން އަންނަ މިޑްފީލްޑަރު ޑާވިޑޭޭ ފްރަޓޭސީއެވެ.
އަދި މެޗުގެ 29 ވަނަ މިނެޓުގައި ފްރަޓޭސީ ވަނީ އިތުރު ލަނޑެއް ކާމިޔާބުކޮށް، އިޓަލީގެ ލީޑު ފުޅާކޮށްދީފައެވެ. މި ލަނޑު އެންމެ ފުރަތަމަ އޮފްސައިޑް ކަމަށް ނިންމި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރް) ބެލުމަށް ފަހު ވަނީ އެ ލަނޑު ބަލައިގަންނަން ނިންމާފައެވެ. ނަމަވެސް ފުރަތަމަ ހާފު ނިމުމުގެ ކުރިން ޔޫކްރެއިނުން ވަނީ ލަނޑެއް ޖަހައި، ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އަންޑްރީ ޔާމަލެންކޯއެވެ.
މި މެޗުން އިޓަލީ މޮޅުވި ނަމަވެސް، މިދިޔަ ހޮނިހިރު ދުވަހު އެ ޓީމު ލޫސިއާނޯ ސްޕެލެއްޓީ ކޯޗުކަމުގައި ކުޅުނު ފުރަތަމަ މެޗުން ނޯތު މެސެޑޯނިއާއާ 1-1 ގެ ނަތީޖާއަކުން އެއްވަރުވެފައެވެ. އެކަމަކު ޔޫކްރެއިން ބަލިކޮށް ގްރޫޕް ސީގެ ދެވަނައަށް އިޓަލީ ޖެހިލިއިރު، އެ ޓީމަށް ވަނީ ކުޅުނު ހަތަރު މެޗުން ހަތް ޕޮއިންޓް ލިބިފައެވެ. ތިންވަނައިގައި އޮތް ޔޫކްރެއިނަށްވެސް ހަތް ޕޮއިންޓް ލިބިފައިވާއިރު، އެ ޓީމުން ވަނީ މިހާތަނަށް ފަސް މެޗު ކުޅެފައެވެ. މި ގްރޫޕުގެ އެއްވަނައިގައި އޮތީ ކުޅުނު ފަސް މެޗުން 13 ޕޮއިންޓް ހޯދާފައިވާ އިންގްލަންޑެވެ.