ސެޕްޓެންބަރު 8 ވަނަ ދުވަހު މަޣްރިބަށް އައި ބާރުގަދަ ބިންހެލުމުގައި މަރުވި މީހުންގެ ޢަދަދު 2,862 އަށް އަރާފައިވާ ކަމުގައި އެ ޤައުމުގެ ދާޚިލީ ވުޒާރާއިން ހާމަކޮށްފިއެވެ. ރިކްޓަރ މިންގަނޑުން 6.8ގައި ރެކޯޑު ކުރެވިފައިވާ ބިންހެލުމުގައި އެތަކެއް ސަތޭކަ ޢިމާރާތެއް ވެއްޓި، ގިނަ ޢަދަދެއްގެ ޢިމާރާތްތަކަށް ބޮޑެތި ގެއްލުންތައް ލިބިފައިވާއިރު، ޢިމާރާތްތަކުގެ ދަށުގައި ތާށިވި މީހުންގެ ހަށިތައް ހޯދަން ހުއްޓުމެއް ނެތި އަދިވެސް ދަނީ މަސައްކަތް ކުރަމުންނެވެ.
ބިންހެލުން އައިސްފައި ވަނީ މަރާކިޝްގެ ހުޅަނގުދެކުނުން ހައި އެޓްލަސް ފަރުބަދަ އޮންނަ ސަރަޙައްދަށެވެ. ބިންހެލުންތައް ދިރާސާކުރާ އެމެރިކާގެ ޔޫ.އެސް. ޖިޔޮލޮޖިކަލް ސަރވޭ (ޔޫ.އެސް.ޖީ.އެސް)އިން ބުނީ މަޣްރިބުގެ ބިންހެލުން އައިސްފައި ވަނީ މަރާކިޝްގެ އިރުއުތުރުން 72 ކިލޯމީޓަރު ދުރުގައި އޮންނަ ހައި އެޓްލަސް ފަރުބަދަ އޮންނަ ސަރަޙައްދަށް ކަމުގައެވެ.
ބިންހެލުން އައިސްފައި ވަނީ ބިމުގެ ފަށަލައިން ފެށިގެން 18.5 ކިލޯމީޓަރު އަޑިއަށް ކަމުގައި އެ އިދާރާއިން ބުންޏެވެ. ފުރަތަމަ ބިންހެލުމުގެ 19 މިނެޓު ފަހުން އެ ސަރަޙައްދަށް ރިކްޓަރ މިންގަނޑުން 4.9ގެ ބާރުމިނުގައި އިތުރު ލޮޅުމެއް އައިސްފައިވާ ކަމުގައި ވެސް ޔޫ.އެސް.ޖީ.އެސްއިން ބުނެއެވެ. ބިންހެލުމުގެ ސަބަބުން މަރާކިޝްގެ އިތުރުން އަލް-ޙައުޒާއި، ވަރްޒާޒާތާއި، އަޒީލާލާއި، ޝީޝާވަތު އަދި ތަރޫދާނަށް ވެސް ބޮޑެތި ގެއްލުންތަކެއް ލިބުނެވެ.
ބިންހެލުމުގައި ވެއްޓުނު ޢިމާރާތްތަކުގެ ދަށުގައި ތާށިވެފައިވާ މީހުންގެ ހަށިތައް ހޯދުމުގައި އެހީތެރިކަން ފޯރުކޮށްދޭން ބޭރު ޤައުމުތަކުގެ ޓީމުތަކުން މިހާރު ވަނީ މަޣްރިބަށް ދަތުރު ކޮށްފައެވެ. މަޣްރިބަށް އެމަރޖެންސީ ހާލަތްތަކުގައި ހަރަކާތްތެރިވާ ޓީމުތައް ފޮނުވާފައިވާ ޤައުމުތަކުގެ ތެރޭގައި ސްޕެއިން، އިނގިރޭސިވިލާތް އަދި ޤަޠަރު ހިމެނެއެވެ.
މަޣްރިބުގެ ދާޚިލީ ވުޒާރާއިން ބުނީ ބިންހެލުމާ ގުޅިގެން ޒަޚަމުވި މީހުންގެ ޢަދަދު މިހާރު 2,562 އަށް އަރާފައިވާ ކަމުގައެވެ. އޭގެ ތެރެއިން ގިނަ ޢަދަދެއްގެ މީހުންގެ ހާލު ސީރިޔަސް ކަމުގައި ޞިއްޙީ ދާއިރާގެ އޮފިޝަލުން ވިދާޅުވާއިރު، އެ މީހުންނަށް ފަރުވާ ދިނުމަށް އިތުރަށް ލޭ ބޭނުންވާތީ، މަޣްރިބުގެ ޢާންމު ރައްޔިތުން ދަނީ ލޭ ހަދިޔާކުރުމަށް މަސައްކަތް ކުރަމުންނެވެ.
ބިންހެލުމާ ގުޅިގެން މަޣްރިބުން ހިތާމަ ފާޅު ކުރަމުންދާއިރު، ދުނިޔޭގެ އެކި ކަންކޮޅުތަކުން ދަނީ މި ހިތާމައިގައި ބައިވެރިވަމުންނެވެ. މި ގޮތުން އ.ދގެ ޢާންމު މަޖިލީހުގެ ތިންވަނަ ޕްލެނަރީ ބައްދަލުވުމުގައި މަޣްރިބު ބިންހެލުމުގައި މަރުވި މީހުންގެ ހަނދާނުގައި ޚާއްޞަ ސުކޫތެއް ގެނެސްފައިވެއެވެ. އަދި، ބޭރު ޤައުމުތަކުން ދަނީ މަޣްރިބުގައި ހާލުގައި ޖެހިފައިވާ އެތަކެއް ހާސް ރައްޔިތުންނަށް އިންސާނީ އެހީތެރިކަން ފޯރުކޮށްދޭން އެހީތެރިކަން ދެމުންނެވެ.
ބިންހެލުމާ ގުޅިގެން ސުންނާފަތިވި ޢިމާރާތްތަކުގެ ރައްޔިތުންގެ ތެރެއިން ގިނަ ޢަދަދެއްގެ ބަޔަކު އަދިވެސް ދިރިއުޅެމުން ދަނީ މަގުތަކުގެ މަތީގައެވެ. އެ މީހުންނަށް ޓެންޓު ފަދަ ވަގުތީ ހިޔާވަހިކަން ފޯރުކޮށްދޭން މަޣްރިބުގެ ސަރުކާރުން ދަނީ މަސައްކަތް ކުރަމުންނެވެ. އަދި، އެ ޤައުމަށް އިންސާނީ އެހީތެރިކަން ބޭނުންވެފައިވާ ކަން ވެސް ފާހަގަ ކޮށްލަން ޖެހެއެވެ.
އެ މީހުންނަށް އިންސާނީ އެހީތެރިކަން ފޯރުކޮށްދޭން ބޭރު ޤައުމުތަކުން ދަނީ މަޣްރިބުގެ ސަރުކާރަށް އެހީވަމުންނެވެ. އެ ޤައުމުތަކުގެ ތެރޭގައި ޤަޠަރު، ސްޕެއިން، އެކުވެރި ޢަރަބި ޢިމާރާތް (ޔޫ.އޭ.އީ)، އިނގިރޭސިވިލާތް، ފަރަންސޭސިވިލާތް، އިޓަލީވިލާތް އަދި އެމެރިކާ ހިމެނެއެވެ. ހާލުގައި ޖެހިފައިވާ މީހުންނަށް ސާފު ބޯފެނާއި ކާބޯތަކެތި ފޯރުކޮށްދޭން މަޣްރިބުގެ ސިފައިން ދަނީ މަސައްކަތް ކުރަމުންނެވެ.
މަޣްރިބަށް މިފަދަ ނުރައްކާތެރި ބިންހެލުމެއް އެންމެ ފަހުން އައިސްފައި ވަނީ 1960 ވަނަ އަހަރުއެވެ. ރިކްޓަރ މިންގަނޑުން 6.7ގެ ބާރުމިނުގައި ރެކޯޑު ކުރެވިފައިވާ އެ ބިންހެލުން އައިސްފައި ވަނީ އަޣަދީރަށެވެ. އެ ބިންހެލުމުގައި 12,000 މީހުން މަރުވިއެވެ.