ޔޫރޯ 2024 ގެ ކޮލިފައިން ގްރޫޕް ބީގައި ރޭ ކުޅުނު މެޗުގައި ރިޕަބްލިކް އޮފް އަޔަލަންޑް އަތުން ސްނެދަލަންޑްސް މުހިންމު މޮޅެއް ހޯދައިފިއެވެ.
އަޔަލަންޑުގައި ކުޅުނު މި މެޗު ނެދަލަންޑްސްއިން ކާމިޔާބުކޮށްފައިވަނީ ފަހަތުން އަރައި 2-1 ގެ ނަތީޖާއަކުންނެވެ.
މި މެޗުގެ ވަރަށް ކުރީކޮޅު އަޔަލަންޑުން ވަނީ ލީޑު ނަގާފައެވެ. މެޗު ފަށައިގެން ހަތަރުވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ އެޑަމް އައިޑާއެވެ. އެކަމަކު އޭގެ ފަހުން މެޗުގެ 19 ވަނަ މިނެޓުގައި ލިބުނު އިތުރު ޕެނަލްޓީއަކުން ކޯޑީ ގަކްޕޯ ވަނީ ލަނޑެއް ޖަހައި، ނެދަލަންޑްސްއަށް ނަތީޖާ އެއްވަރުކޮށްދީފައެވެ.
މި މެޗުގައި އަޔަލަންޑުން ގިނައިރު ބޯޅަ ގެންގުޅުނު ނަމަވެސް، ގިނަ ހަމަލާ އުފައްދާފައިވަނީ ނެދަލަންޑްސްއިންނެވެ. އެގޮތުން ދެވަނަ ހާފުގައި ނެދަލަންޑްސްއިން ވަނީ ފަހަތުން އަރައި ލީޑު ނަގާފައެވެ. މެޗުގެ 56 ވަނަ މިނެޓުގައި ޑެންޒެލް ޑަމްފްރީސްގެ އެހީއާއެކު މި ަނޑު އެ ޓީމަށް ކާމިޔާބުކޮށްދިނީ ވޯޓް ވެގޯސްޓެވެ.
މި މޮޅާއެކު ގްރޫޕް ބީފެ ދެވަނައިގައި ނެދަލަންޑްސް އޮތީ ކުޅުނު ހަތަރު މެޗުން ލިބުނު ނުވަ ޕޮއިންޓާއެކުއެވެ. ތިންވަނައިގައި އޮތް ގްރީސްއަށްވެސް ނުވަ ޕޮއިންޓް ލިބިފައިވާއިރު، އެ ޓީމުން ވަނީ ކޮލިފައިންގައި މިހާތަނަށް ފަސް މެޗު ކުޅެފައެވެ. އެއާއެކުވެސް ނެދަލަންޑްސްއަށް މި ވަގުތު ކުރި ލިބެނީ ލަނޑުގެ ތަފާތުންނެވެ.
މި ގްރޫޕުގެ އެއްވަނައިގައި އޮތް ފްރާންސުން މިހާތަނަށް ކުޅުނު ފަސް މެޗުވެސް ކާމިޔާބުކޮށްފައިވާއިރު، އެ ޓީމަށް ވަނީ 15 ޕޮއިންޓް ލިބިފައެވެ. އަދި ނެދަލަންޑްސް އަތުން ބަލިވި އަޔަލަންޑް އޮތީ ތާވަލުގެ ހަތަރުވަނައިގައި ފަސް މެޗުން ތިން ޕޮއިންޓާއެކުއެވެ. އެއާއެކު އަޔަލަންޑަށް މިހާރު ވަނީ އަންނަ އަހަރުގެ ޔޫރޯއަށް ކޮލިފައިވުމުގެ ފުރުސަތު ހަނިވެފައެވެ.