މި މަހު ޗައިނާގެ ހަންގްޖޯގައި ބާއްވާ އޭޝިއަން ގޭމްސްގައި ވާދަކުރާ ރާއްޖޭގެ އެތުލެޓިކްސް ޓީމު އިޢުލާންކޮށްފިއެވެ.
މި ފަހަރުގެ ގޭމްސްގައި އަންހެން އެތުލީޓުންގެ ޓީމަކާއި ފިރިހެން އެތުލީޓުންގެ ޓީމެއް ވާދަކުރާނެއެވެ. އެތުލެޓިކްސް ޓީމުގައި ހިމެނެނީ ޖުމްލަ 12 އެތުލީޓުންނެވެ. އެއީ އަންހެން ހަ އެތުލީޓުންނާއި ފިރިހެން ހަ އެތުލީޓުންނެވެ.
އަންހެން ޓީމުގައި ހިމެނެނީ އަހްނާ ނިޒާރާއި، އައިޝަތު ހިމްނާ ޙަސަނާއި، ފަސޫހާ އަޙުމަދާއި، މަރިޔަމް ރޫޔާ އަލީ އާއި، ޒިވާ މޫޝާ ޝަފީއު އަދި މަރިޔަމް އަލްހާ ޙުސެއިނެވެ. އަދި ފިރިހެން ޓީމުގައި ހިމެނެނީ އަޙްމަދު ނަޖުދާން ޢަބްދުﷲ އާއި، ޙުސެއިން ފަޒީލް ހާރޫނާއި، ޙުސެއިން ރިޒާ އާއި، އިބްރާހީމް ނާހިލް ނިޒާރާއި، މުޙައްމަދު މިންހާލް ޝާމިން އަދި ޙަސަން ސާއިދެވެ.
މި 12 އެތުލީޓުންނަކީވެސް ދާދި ފަހުން މަޑަގަސްކަރައިގައި ނިމިގެންދިޔަ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ރާއްޖެ ތަމްސީލުކުރި އެތުލީޓުންނެވެ. މި ފަހަރުގެ އައިއޯއައިޖީގައި ރާއްޖޭގެ އެތުލީޓުން ވަނީ 4 ގުނަ 400 މީޓަރު ދުވުމުގެ މިކްސް ޓީމު ރިލޭ އިވެންޓުންނާއި، 4 ގުނަ 400 މީޓަރު ދުވުމުގެ އަންހެން ޓީމު ރިލޭ އިވެންޓުގެ އިތުރުން 4 ގުނަ 100 މީޓަރު ދުވުމުގެ އަންހެން ޓީމު ރިލޭ އިވެންޓުން ލޯ މެޑަލް ހޯދާފައެވެ.
ކުރިއަށް އޮތް އޭޝިއަން ގޭމްސްގައި ވާދަކުރާ ރާއްޖޭގެ އެތުލެޓިކްސް ޓީމު އިޢުލާންކުރިއިރު، އޭޝިއާގެ އެންމެ ބޮޑު ކުޅިވަރު ހަރަކާތް އޮންނާނީ މި މަހުގެ 23 ވަނަ ދުވަހުން ފެށިގެން އަންނަ އޮކްޓޯބަރު މަހުގެ އަށްވަނަ ދުވަހުގެ ނިޔަލަށެވެ. މި ގޭމްސްގައި ރާއްޖެއިން އެކަނިވެސް ނުވަ ކުޅިވަރަކުން 100 އެއްހާ އެތުލީޓުން ބައިވެރިވާނެއެވެ. އޭޝިއަން ގޭމްސްއަކީ ދެވަނައަށް އެންމެ ބޮޑު ކޮންޓިންޖެންޓެއް ރާއްޖެއިން ވާދަކުރާ ގޭމްސްއެވެ.
އޭޝިއަން ގޭމްސް މި އަހަރު ބާއްވާއިރު، މިދިޔަ އަހަރުގެ ސެޕްޓެމްބަރު މަހު ހަންގްޒޫގައި ބާއްވަން އޮތް ގޭމްސް މި އަހަރަށް ފަސްކުރަން ޖެހުނީ ޗައިނާގައި ކޮވިޑް-19 ގެ ހާލަތު އޭރު އޮތްގޮތުންނެވެ.