ރާއްޖޭގެ އެކި ކަންކޮޅުތަކުގައި ސަރުކާރުން އަޅާދީފައިވާ ފުޓްބޯޅަ ދަނޑުތަކާއެކު މުސްތަޤުބަލުގައި ގިނަ މަސައްކަތްތަކެއް ކުރެވި، ކާމިޔާބު ނަތީޖާއެއް ނެރެވޭނެކަމުގެ ބޮޑު ޔަގީންކަމެއް އެބައޮތް ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޓެކްނިކަލް ޑިރެކްޓަރު ޕޯލް ސްމޯލީ ބުނެފިއެވެ.
ޓީވީއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ސްމޯލީ ވަނީ ރާއްޖޭގެ ޓެކްނިކަލް ޑިރެކްޓަރުގެ މަޤާމާ ހަވާލުވުމަށްފަހު ކުރަން ބޭނުންވާ ގިނަ މަސައްކަތްތަކުގެ ވާހަކަ ޙިއްސާކޮށްފައެވެ. އޭގެތެރޭގައި ޔޫތު ސިސްޓަމް ތަރައްޤީކުރުމާއި، އަންހެން ފުޓްބޯޅައާ ގުޅޭގޮތުން އޭނާ ވަނީ މި ޕްރޮގްރާމުގައި ވާހަކަދައްކާފައެވެ.
ސްމޯލީ ބުނީ އޭނާ ކުރިން މަސައްކަތްކުރި ބަންގްލަދޭޝްއާ ޚިލާފަށް ރާއްޖެއަކީ ފުޓްބޯޅައަށް ފޯރި ބޮޑު ޤައުމެއް ކަމަށާއި، އެންމެ ކާމިޔާބު މަސައްކަތެއްގެ ގޮތުގައި ފެނިގެންދަނީ ސަރުކާރުން މުޅި ރާއްޖޭގެ އެކި ކަންކޮޅުތަކުގައި އަޅަމުން އަންނަ އަދި އަޅާފައިވާ ފުޓްބޯޅަ ދަނޑުތައް ކަމަށެވެ.
ސްމޯލީ ބުނީ މި ދަނޑުތަކުގެ ސަބަބުން ޔޫތު ޑިވެލޮޕްމަންޓް ޕްރޮގްރާމް ހަރުދަނާކޮށް ގެންދެވިއްޖެ ނަމަ، އޭގެ ނަތީޖާ ކުރިއަށްއޮތް ތިން ވަރަކަށް އަހަރު ފެންނަން ފަށާނެ ކަމަށާއި، އަދި އަންހެން ފުޓްބޯޅައިގެ މަސައްކަތް މިހާރު ހުއްޓިފައި އޮތް ހިސާބުން އަނެއްކާވެސް ފަަށަން ޖެހޭ ކަމަށް ޤަބޫލުކުރާ ކަމަށެވެ. އަދި ރާއްޖެއަކީ ހުނަރުވެރި ކުޅުންތެރިން ތިބި ޤައުމެއް ކަމަށާއި، މި މަސައްކަތްތައް ކުރެވޭނެކަމުގެ ބޮޑު އުއްމީދެއް އެބައޮތް ކަމަށްވެސް ސްމޯލީ ބުންޏެވެ.
ބަންގްލަދޭޝްގެ ޓެކްނިކަލް ޑައިރެކްޓަރުކަމުން އިސްތިއުފާދިނުމަށްފަހު ސްމޯލީ ރާއްޖޭގެ ޓެކްނިކަލް ޑިރެކްޓަރުކަމާ ހަވާލުވީ މި އަހަރުގެ ޖުލައި މަހުގެ ތެރޭގައެވެ. މާލީ ބޮޑު އަޑިގަނޑެއްގައި އޮތް އެފްއޭއެމުން ސްމޯލީގެ މުސާރަ ހަމަޖައްސާފައިވަނީ ޤަތަރު ފުޓްބޯޅަ ފެޑަރޭޝަނުގެ ސްޕޮންސަޝިޕެއްގެ ދަށުންނެވެ.
ސްމޯލީއަކީ އެފްއޭއެމުގެ ރައީސް ބައްސާމުގެ ދައުރުގައި ރާއްޖޭގައި މަސައްކަތްކުރާ ބޭރުގެ ތިންވަނަ ޓެކްނިކަލް ޑިރެކްޓަރެވެ. ބައްސާމުގެ ފުރަތަމަ ދައުރުގައި ތުރުކީގެ ޖޭން ވަންލީ ޓެކްނިކަލް ޑިރެކްޓަރަކަށް ހަމަޖެއްސިއިރު، އެ ދައުރުގެ ފަހުކޮޅުގައި ޖުދާން އަލީ ވަނީ ހަމަޖައްސާފައެވެ.