އެމްޑަބްލިއުއެސް ދިވެހި ޕްރިމިއަރ ލީގުގެ ކުޅުން މެދުކަނޑާލުމަކީ ކުލަބު އީގަލްސްއަށް ކުރިމަތިވާނެ އުނދަގޫ ކަމެއް ކަމަށް އެ ޓީމުގެ ކޯޗު މުޙައްމަދު ޝިޔާޒް (މޯހަން) ބުނެފިއެވެ.
ލީގުގެ ކުޅުން މެދުކަނޑާލުމާ ގުޅޭގޮތުން މޯހަން ބުނީ ދިގު ލީގެއްގައި މާގިނަ ބްރޭކްތަކެއް ނަގަން ޖެހުމަކީ ރަނގަޅަށް ތައްޔާރުވެގެން ކުޅޭ ޓީމަކަށް ދިވާނެ އުނދަގުލެއްކަމަށެވެ. މޯހަން ބުނީ ހުރިހާ ޓީމަކަށް ވެސް މިފަދަ ބްރޭކްތަކާ ހުރެ އުނދަގޫ ކުރިމަތިވާނެ ކަމަށާއި ނުކުޅެ ގިނަ ދުވަސް ތަކެއް ވާނަމަ ކުޅުންތެރިންނަށް މެޗު ފިޓްނަސް މައްސަލަ ދީމާވުން ފަދަކަންކަމާ ކުރިމަތިލާން ޖެހޭނެކަމަށެވެ.
އޭނާ ބުނީ އެންމެ އެއްމަސަލައަކީ ބްރޭކްގައި ރަނގަޅު ޕްރެކްޓިސް މެޗުތަކެއް ނުލިބުން ކަމަށެވެ. މޯހަން ބުނީ އަލުން ލީގުފަށާއިރު ޓީމުން ބްރޭކަށް ދިޔައިރު އޮތް ފޯމަށް ގެނައުން އެއީ އެންމެ ބޮޑު ޗެލެންޖުކަމަށެވެ. ސީޒަން ފެށިގެން ލީގުގައި ދެވަނަ ބުރުގެ ކުޅުން ފެށުނު އިރު ޓީމު ހަމަޔަކަށް އެޅި ފެންވަރު މަތިވެސް ވެއްޖެ ކަމަށާއި އެ ލެވެލްގައި ހިފެހެއްޓުން އެއީ ވެސް ޗެލެންޖެއް ކަމަށެވެ.
މި ސީޒަންގައި ލީގު ހޯދުމުގެ ރޭހުގައި އެންމެ ވާދަވެރިކޮށް ފެނިގެންދަނީ މާޒިޔާ އާއި އީގަލްސްއެވެ. މި ވަގުތު ލީގުގެ އެއްވަނައިގައި މާޒިޔާއަށް ވުރެ އެއް މެޗު އިތުރަށް ކުޅެ އެއް ޕޮއިންޓުގެ ލީޑަކާއެކު އޮތީ އީގަލްސްއެވެ. އީގަލްސް ވަނީ ލީގުގައި ކުޅުނު ނުވަ މެޗުން 23 ޕޮއިންޓް ހޯދާފައެވެ. ލީގުގެ ފުރަތަމަ ބުރުގައި މި ދެ ޓީމު ވާދަކުރި މެޗު ނިމުނީ 2-2 ގެ ނަތީޖާއަކުން އެއްވަރުވެގެންނެވެ.
ލީގުގެ ކުޅުން ދެ މަހެއްހާ ދުވަހަށް މެދުކަނޑާލާފައިވާއިރު، ބްރޭކަށްފަހު ދެން އެންމެ އަވަހަށްވެސް ލީގު މެޗެއް ކުޅޭނީ އަންނަ އޮކްޓޯބަރު މަހުގެ 28 ވަނަ ދުވަހެވެ.