ޔޫކްރެއިންގެ އައު ދިފާޢީ ވަޒީރު ކަމުގެ މަޤާމަށް މުސްލިމް ބޭފުޅެއް ޢައްޔަން ކޮށްފިއެވެ. އެ މަޤާމަށް ޢައްޔަން ކޮށްފައި ވަނީ އުމުރުން 41 އަހަރުގެ ރުސްތެމް އުމެރޮވްއެވެ. އޭނާ އެ މަޤާމަށް ޢައްޔަން ކޮށްފައި ވަނީ، އެ މަޤާމު ކުރިން ފުރުއްވަމުން ގެންދެވި އޮލެކްސީ ރޭޒްނިކޮފް މަޤާމުން ވަކި ކުރުމަށް ފަހުއެވެ.
ދިފާޢީ ވަޒީރު ކަމުގެ މަޤާމާ ހަވާލުވެ ވަޑައިގެންނެވުމަށް ފަހު ވާހަކަފުޅު ދައްކަވަމުން އުމެރޮވް ވިދާޅުވީ، ޔޫކްރެއިނަށް އަރައި ބިންތަކަށް ވެރިވެގަނެފައިވާ ރަޝިޔާގެ އިސްތިޢުމާރީ ސިފައިން ބަލި ކުރުމަށް ކުރަން ޖެހުނު ހުރިހާ މަސައްކަތެއް ކުރައްވާނެ ކަމުގެ ފުރިހަމަ ޔަޤީން ކަން އަރުވާ ކަމުގައެވެ. އަދި، ރަޝިޔާއިން އަތްގަދަ ކޮށްފައިވާ ހުރިހާ ބިންތަކެއް މިނިވަން ކުރައްވާނެ ކަމުގައެވެ.
އުމެރޮވްއަކީ ކްރައިމިޔާގައި ދިރިއުޅޭ ތަތާރްސްކީ ދަރިކޮޅަށް ނިސްބަތްވާ ބޭފުޅެކެވެ. އެއީ، މުސްލިމުންގެ މައްޗަށް އެކުލެވިގެންވާ ދަރިކޮޅެކެވެ. އޭނާގެ އުފަން ރަށް އޮންނަ ކްރައިމިޔާ މިހާރު އޮތީ ރަޝިޔާގެ އިސްތިޢުމާރީ ސިފައިންގެ އަތްދަށުގައެވެ. ރަޝިޔާއިން ކްރައިމިޔާއަށް އަތްގަދަ ކޮށްފައި ވަނީ 2014 ވަނަ އަހަރުއެވެ.
އޭނާގެ ކުރިން ދިފާޢި ވަޒީރުގެ މަޤާމު ފުރުއްވަމުން ގެންދެވި ރޭޒްނިކޮފް އެ މަޤާމުން ވަކި ކޮށްފައި ވަނީ، ކޮރަޕްޝަން ނައްތައިލުމަށް ރައީސް ވޮލޮޑޮމީރް ޒެލެންސްކީ ފައްޓަވާފައިވާ މަސައްކަތްތަކުގެ ދަށުންނެވެ. ރޭޒްނިކޮފްގެ މައްޗަށް އެންމެ ފަހުން ހުށަހެޅުނު ކޮރަޕްޝަންގެ އެއް މައްސަލައަކީ، ފިނި މޫސުމުގައި ބޭނުންކުރާ ޖެކެޓުތަކެއް ބާޒާރުގެ އަގުތަކަށް ވުރެ ބޮޑު އަގެއްގައި ގަތް މައްސަލައެވެ. އެ ތަކެތި ހޯދާފައި ވަނީ ޔޫކްރެއިންގެ ފައުޖުތަކުގެ ބޭނުމަށެވެ.
ރޭޒްނިކޮފްގެ މައްޗަށް ކޮރަޕްޝަންގެ ތުހުމަތު ކުރެވިފައިވީ ނަމަވެސް، އޭނާއަކީ ޔޫކްރެއިންގެ ސިފައިންނަށް ބޭނުންވާ އަސްކަރީ އެހީތެރިކަން ބޭރު ޤައުމުތަކުން ހޯދުމަށް ކުރަމުންދާ މަސައްކަތުގައި އިސް ދައުރެއް އަދާކުރައްވާފައިވާ ބޭފުޅެކެވެ. ރަޝިޔާގެ އިސްތިޢުމާރީ ސިފައިންނާ ކުރިމަތިލުމުގެ ޤާބިލުކަން ޔޫކްރެއިންގެ ފައުޖުތަކަށް ލިބިފައި ވަނީ އެމެރިކާއާއި ނޭޓޯގެ މެންބަރު ޤައުމުތަކުގެ އަސްކަރީ އެހީއާ އެކުގައެވެ.
ދިފާޢީ ވަޒީރު ކަމުގެ މަޤާމުން ރޭޒްނިކޮފް ވަކިކޮށްފައިވީ ނަމަވެސް، ޔޫކްރެއިނުން އިނގިރޭސިވިލާތަށް ކަނޑައަޅާފައި ހުންނަވާ ސަފީރު ކަމުގެ މަޤާމަށް އޭނާ ޢައްޔަން ކުރާނެ ކަމަށް ބެލެވޭ ކަމުގައި ޔޫކްރެއިންގެ މީޑިޔާތަކުން ބުނެއެވެ. ދިފާޢީ ވަޒީރު ކަމުގެ މަޤާމަށް އޭނާ ޢައްޔަން ކޮށްފައި ވަނީ 2021 ވަނަ އަހަރުގެ ނޮވެންބަރު މަހުއެވެ. ރަޝިޔާ-ޔޫކްރެއިން ހަނގުރާމަ ފެށުމުގެ ތިން މަސް ކުރިންނެވެ.