ޔޫރޯ 2024 ގެ ކޮލިފައިން ގްރޫޕް ޖޭގައި ރޭ ކުޅުނު މެޗުގައި ސްލޮވާކިއާ އަތުން ހަނި ގޮތަކަށް ޕޯޗުގަލް މޮޅުވެއްޖެއެވެ.
ސްލޮވާކިއާގައި ކުޅުނު މި މެޗުން ޕޯޗުގަލް މޮޅުވީ 1-0 ގެ ނަތީޖާއަކުންނެވެ.
މި މެޗުގައި ޕޯޗުގަލުން ކާމިޔާބުކުރި ހަމައެކަނި ލަނޑު ފެނިގެންގޮސްފައިވަނީ ފުރަތަމަ ހާފު ނިމެން ދެ މިނެޓަށް ވެފައި ވަނިކޮށެވެ. ބެނާޑޯ ސިލްވާގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ހުނަރުވެރި މިޑްފީލްޑަރު ބްރޫނޯ ފެނާންޑޭޒެވެ. އޭގެ ފަހުން ފެނާންޑޭޒް ތަނަވަސްކޮށްދިން ފުރުސަތެއްގައި އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.
މި މޮޅާއެކު ގްރޫޕް ޖޭގައި މިހާތަނަށް ކުޅުނު ފަސް މެޗުންވެސް މޮޅުވެ، ޕޯޗުގަލް އޮތީ ތާވަލުގެ އެއްވަނައިގައި 15 ޕޮއިންޓާއެކުއެވެ. ޕޯޗުގަލް އަތުން ބަލިވި ސްލޮވާކިއާ ދެވަނައިގައި އޮތްއިރު، ފަސް މެޗުން އެ ޓީމަށް ލިބިފައިވަނީ 10 ޕޮއިންޓެވެ. ތިންވަނައިގައި އޮތް ލަގްޒަމްބާގަށްވެސް ފަސް މެޗުން 10 ޕޮއިންޓް ލިބިފައިވާއިރު، ރޭ ކުޅުނު މެޗުން އެ ޓީމު ވަނީ އައިސްލަންޑް އަތުން 3-1 ގެ ނަތީޖާއަކުން މޮޅުވެފައެވެ.