ޔޫރޯ 2024 ގެ ކޮލިފައިން ގްރޫޕް އޭގައި ރޭ ކުޅުނު މެޗުގައި ޖޯޖިއާ އަތުން ސްޕެއިން ބޮޑު މޮޅެއް ހޯދައިފިއެވެ.
ޖޯޖިއާގައި ރޭ ކުޅުނު މެޗު ސްޕެއިނުން ކާމިޔާބުކޮށްފައިވަނީ 7-1 ގެ ތަފާތު ބޮޑު ނަތީޖާއަކުންނެވެ.
ރޭގެ މެޗުގައި ސްޕެއިނުގެ ކެޕްޓަން ބޭންޑް އަޅައިގެން ކުޅުނު އަލްވާރޯ މޮރާޓާ ހެޓްރިކެއް ހެދި ނަމަވެސް، މެޗުގެ ތަރިއަކަށް ވެގެންދިޔައީ އުމުރުން 16 އަހަރުގެ ލަމީން ޔަމާލްއެވެ. އެގޮތުން ޑެނީ އޮލްމޯގެ ބަދަލުގައި ކުޅެން ނުކުތް ޔަމާލް ވަނީ ރޭގެ މެޗުގައި ލަނޑު ޖަހައި، ސްޕެއިނަށް ލަނޑު ޖަހައިދިން އެންމެ ހަގު ކުޅުންތެރިޔާގެ ޝަރަފު ހޯދާފައެވެ. އަދި ރޭގެ މެޗަކީ ޔަމާލް ސްޕެއިނަށް ކުޅެދިން ފުރަތަމަ މެޗެވެ.
ރޭގެ މެޗުގެ ފުރަތަމަ ހާފުގައި ސްޕެއިނުން ހަތަރު ލަނޑު ކާމިޔާބުކުރިއިރު، މެޗުގެ 22 ވަނަ މިނެޓުގައި މޮރާޓާ ވަނީ އެ ޓީމަށް ލީޑު ނަގައިދީފައެވެ. އަދި އޭގެ ފަސް މިނެޓު ފަހުން ސްޕެއިނުން ލީޑު ފުޅާކުރިއިރު، މި ލަނޑަކީ ޖޯޖިއާގެ ސޮލޮމޮން އަތުން ބައިކޮޅަށް ވަން ލަނޑެކެވެ. އޭގެ ފަހުން މެޗުގެ 38 ވަނަ މިނެޓުގައި އޮލްމޯ ސްޕެއިނުގެ ތިންވަނަ ލަނޑު ކާމިޔާބުކޮށްދިންއިރު، ފުރަތަމަ ހާފު ނިމުމުގެ ކުރިން މެޗުގެ 40 ވަނަ މިނެޓުގައި މޮރާޓާ ވަނީ އިތުރު ލަނޑެއް ޖަހާފައެވެ.
މި މެޗުގެ ދެވަނަ ހާފުގެ ކުރީކޮޅު ޖޯޖިއާއިން ވަނީ އެ ޓީމުގެ ހަމައެކަނި ލަނޑު ކާމިޔާބުކޮށްފައެވެ. މި ލަނޑު ޖަހައިދިނީ ބަދަލަކަށް ކުޅެން ނުކުތް ޖިއޯޖީއެވެ. އެކަމަކު މެޗުގެ 66 ވަނަ މިނެޓުގައި މޮރާޓާ ވަނީ ސްޕެއިނަށް އިތުރު ލަނޑެއް ޖަހައިދީ، އޭނާގެ ހެޓްރިކް ފުރިހަމަކޮށްފައެވެ. އޭގެ ދެ މިނެޓު ފަހުން ނިކޯ ވިލިއަމްސް ސްޕެއިނުގެ ހަވަނަ ލަނޑު ކާމިޔާބުކޮށްދިންއިރު، ޔަމާލް ލަނޑު ޖަހާފައިވަނީ މެޗުގެ 74 ވަނަ މިނެޓުގައެވެ.
މި މޮޅާއެކު ގްރޫޕް އޭގެ ދެވަނައިގައި ސްޕެއިން އޮތީ ކުޅުނު ތިން މެޗުން ލިބުނު ހަ ޕޮއިންޓާއެކުއެވެ. މި ގްރޫޕުގެ އެއްވަނައިގައި އޮތީ ކުޅުނު ފަސް މެޗުންވެސް މޮޅުވެ 15 ޕޮއިންޓް ހޯދާފައިވާ ސްކޮޓްލަންޑެވެ. ރޭ ކުޅުނު މެޗުން ސްކޮޓްލަންޑް ވަނީ ސައިޕްރަސް އަތުން 3-0 ގެ ނަތީޖާއަކުން މޮޅުވެފައެވެ.