މަޣްރިބަށް ބާރުގަދަ ބިންހެލުމެއް އައިސް މަރުވި މީހުންގެ ޢަދަދު 296 އަށް އަރައިފިއެވެ. ރިކްޓަރ މިންގަނޑުން 6.8 ގައި ރެކޯޑު ކުރެވިފައިވާ މި ބިންހެލުމާ ގުޅިގެން 150 އަށްވުރެ ގިނަ މީހުން ޒަޚަމުވި ކަމުގައި އެ ޤައުމުގެ އޮފިޝަލުން ވިދާޅުވިއެވެ. ބިންހެލުން އައިސްފައި ވަނީ ބިމުގެ ފަށަލައިން ފެށިގެން 18.5 ކިލޯމީޓަރު އަޑިއަށް ކަމުގައި އެމެރިކާގެ ޖިޔޮލޮޖިކަލް ސަރވޭން ބުނެއެވެ.
ބިންހެލުން އައިސްފައި ވަނީ މަރާކިޝްގެ ހުޅަނގުން 75 ކިލޯމީޓަރު ދުރުގައި އޮންނަ ހިސާބަކަށެވެ. ބިންހެލުމާ އެކު ގިނަ ޢަދަދެއްގެ ޢިމާރާތްތައް ވެއްޓިފައިވާއިރު، ގިނަ ޢަދަދެއްގެ ބަޔަކު ވަނީ ވެއްޓުނު ޢިމާރާތްތަކުގެ ދަށުގައި ތާށިވެފައެވެ.
މަޣްރިބުގެ ދާޚިލީ ވުޒާރާއިން ބުނީ ވެއްޓިފައިވާ ޢިމާރާތްތަކުގެ ދަށުގައި ތާށިވެ، މަރުވެފައިވާ އިތުރު މީހުންގެ ހަށިތައް ފެންނަމުންދާ ކަމަށާއި، މިއާއެކު މަރުވި މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައެވެ. މަރާކިޝްގެ އިތުރުން އަލް-ޙައުޒާއި، ވަރްޒާޒާތާއި، އަޒީލާލާއި، ޝީޝާވަތު އަދި ތަރޫދާނަށް ވެސް ބިންހެލުމުގައި ބޮޑެތި ގެއްލުންތަކެއް ލިބުނު ކަމުގައި އެ ވުޒާރާއިން ބުނެއެވެ.
މި ބިންހެލުމުގައި މަރާކިޝްގެ ތާރީޚީ ރަށެއް ކަމުގައިވާ މަދީނާގެ ޢިމާރާތްތަކަށް ވެސް ބޮޑެތި ގެއްލުންތަކެއް ލިބިފައިވާ ކަމުގައި ރިޕޯޓުތައް ބުނެއެވެ. މިއީ ފާއިތުވި 120 އަހަރެއްހާ ދުވަހުގެ ތެރޭގައި މަޣްރިބް އޮންނަ ސަރަޙައްދަށް މި ފަދަ ބާރުގަދަ ބިންހެލުމެއް އައި ފުރަތަމަ ފަހަރެވެ.
މަޣްރިބަށް އެންމެ ފަހުން ބިންހެލުމެއް އައިސްފައި ވަނީ 2004 ވަނަ އަހަރެވެ. އެ ބިންހެލުމާ ގުޅިގެން 600 އެއްހާ މީހުން މަރުވިއެވެ. އެ ބިންހެލުމުގެ ބާރު މިނަކީ ރިކްޓަރ މިންގަނޑުން 6.3 އެވެ.