ޕާކިސްތާނުގެ ހުޅަނގުއުތުރުގައިވާ ޚައިބަރް ޕަޚްތުންޚްވާގައި ސިފައިންގެ ޗެކްޕޮއިންޓުތަކަކަށް ހަމަލަދީ ސިފައިންގެ ހަތަރު މީހުން މަރައިލައިފިއެވެ. ހަތިޔާރު އެޅި ޖަމާޢަތަކަށް ނިސްބަތްވާ ބަޔަކު ޚައިބަރް ޕަޚްތުންޚްވާގެޱޗިތްރާލް ޑިސްޓްރިކްޓުގައި އޮންނަ ސިފައިންގެ ދެ ޗެކްޕޮއިންޓަށް ހަމަލަދީފައިވެއެވެ.
ޕާކިސްތާނުގައި ހަރަކާތްތެރިވާ ޓެރެރިސްޓު ޖަމާޢަތެއް ކަމުގައިވާ ތަހްރީކް ޠާލިބާން ޕާކިސްތާން (ޓީ.ޓީ.ޕީ)ން ވަނީ ހަމަލަތަކުގެ ޒިންމާ އުފުލާފައެވެ. ޗެކްޕޮއިންޓަށް ހަމަލަދިނުމުން ސިފައިން ވަނީ އެ މީހުންނަށް ރައްދު ދީފައެވެ. ދެ ފަރާތުގެ މެދުގައި ކުރިއަށް ދިޔަ ހަމަލަ ބަދަލުކުރުންތަކުގައި ޓީ.ޓީ.ޕީގެ 12 ހަނގުރާމަވެރިން މަރުވެފައިވާ ކަމުގައި އަސްކަރިއްޔާއިން ބުނެއެވެ.
ޕާކިސްތާނުގެ އަސްކަރިއްޔާއިން ބުނީ، އަސްކަރިއްޔާގެ ޗެކް ޕޮއިންޓުތަކަށް ދީފައިވާ ހަމަލާތައް ރާވައި އިންތިޒާމު ކޮށްފައި ވަނީ އަފްޣާނިސްތާނުގެ ކުނާރާއި ނޫރިސްތާން ޕުރޮވިންސުގައި ތިބި ޠާލިބާނުގެ އިސްވެރިން ކަމުގައެވެ. އަދި، ޕާކިސްތާނަށް ހަމަލަދޭން އަފްޣާނިސްތާން ބޭނުން ކުރުން ހުއްޓުވުމަށް ޕާކިސްތާނުން ވަނީ ޠާލިބާނުންނަށް ގޮވައިލާފައެވެ.
ޗިތްރާލްގެ އޮފިޝަލެއް ކަމުގައިވާ މުޙައްމަދު ޢަލީ ވިދާޅުވީ، ޗެކް ޕޮއިންޓުތަކަށް ހަމަލަދޭން ހަނގުރާމަވެރިން މޯޓަރު ބަޑި ފަދަ ހަތިޔާރު ބޭނުން ކޮށްފައިވާ ކަމުގައެވެ. މޯޓަރު ބަޑިން ހަމަލާ ދީފައި ވަނީ ސަރަޙައްދީ ރޮނގު ހުރަސްކޮށް އަފްޣާނިސްތާނުގެ ފަޅިން ކަމަށް ވެސް އޭނާ ވިދާޅުވިއެވެ.
މި އަހަރުގެ ތެރޭގައި ޚައިބަރް ޕަޚްތުންޚްވާގައި ޓީ.ޓީ.ޕީން ދީފައިވާ މި ފަދަ ހަމަލަތަކުގެ ޢަދަދު 300 އަށްވުރެ މައްޗަށް އަރައެވެ. ޓީ.ޕީ.ޕީއަކީ އަފްޣާނިސްތާނުގެ ވެރިކަން ފޭރިގަނެފައިވާ ޠާލިބާނުންނާ ގުޅިފައިވާ ޓެރެރިސްޓު ޖަމާޢަތެކެވެ. ނަމަވެސް، ޕާކިސްތާނަށް ހަމަލަދޭން އަފްޣާނިސްތާން ބޭނުން ކޮށްފައިވާ ކަމަށް ކުރާ ތުހުމަތުތައް އެ ޖަމުޢިއްޔާއިން ވެސް ދޮގު ކުރެއެވެ.
ޓީ.ޓީ.ޕީ އުފައްދާފައި ވަނީ 2007 ވަނަ އަހަރުއެވެ. އެ ޖަމާޢަތުގެ ހަރަކާތްތައް ފަށާފައި ވަނީ، ޖަލަށް ލާފައިވާ އެ ޖަމާޢަތަށް ނިސްބަތްވާ މީހުން ސަލާމަތް ކުރުމުގެ ނަމުގައެވެ. އަދި، ޚައިބަރް ޕަޚްތުންޚްވާއިން ޕާކިސްތާނުގެ އަސްކަރިއްޔާގެ ބާރު ކަނޑުވައިލުމުގެ ބޭނުމުގައެވެ.
މީގެ އަހަރުތަކެއް ކުރިން ޓީ.ޓީ.ޕީން ވަނީ ޚައިބަތް ޕަޚްތުންޚްވާގެ ބައެއް ސަރަޙައްދުތަކަށް އަތްގަދަ ކޮށްފައެވެ. ނަމަވެސް، ޕާކިސްތާނުގެ އަސްކަރިއްޔާއިން ހިންގި ބޮޑު އޮޕަރޭޝަނެއްގައި އެ ރަށްތައް ވަނީ ޓީ.ޓީ.ޕީގެ އަތްދަށުން މިނިވަން ކޮށްފައެވެ. ފަހަކަށް އައިސް ޚައިބަރް ޕަޚްތުންޚްވާގެ އިތުރުން ބަލޫޗިސްތާނުގައި ޓީ.ޓީ.ޕީން ހިންގާ ޓެރެރިސްޓު ހަރަކާތްތައް އިތުރު ކޮށްފައިވާ ކަން ފާހަގަ ކުރެވެއެވެ.