އޭޝިއާ ކަޕް: ބަންގްލަދޭޝް އަތުން ޕާކިސްތާނަށް މޮޅެއް

އޭޝިއާ ކަޕް ކްރިކެޓް މުބާރާތުގެ ގަދަ ހަތަރެއްގެ ފުރަތަމަ މެޗުގައި ބަންގްލަދޭޝް އަތުން ޕާކިސްތާން މޮޅުވެއްޖެއެވެ.

ރޭ ކުޅުނު މި މެޗު ޕާކިސްތާނުން ކާމިޔާބުކޮށްފައިވަނީ ހަތް ވިކެޓުންނެވެ.

މި މެޗުގައި ފުރަތަމަ ބެޓްކުރަން ނުކުމެ ބަނގްލަދޭޝްއަށް 38 އޯވަރުގެ ތެރޭގައި ހަތަރު ކުޅުންތެރިން ނުބައިވެގެން ހެދުނީ 193 ލަނޑެވެ. އެ ޓީމުން އެންމެ ރަނގަޅަށް ކުޅުނީ 64 ލަނޑު ހެދި މުޝްފިގުއްރަހުމާނެވެ. އަދި ސާކިބް އަލް ހަސަން ވަނީ 53 ލަނޑު ހަދާފައެވެ. މި އިނިންގްސްގައި ޕާކިސްތާނުން އެންމެ ރަނގަޅަށް އުކާފައިވަނީ ހަތް ވިކެޓް ނެގި ހާރިސް ރައޫފެވެ.

ޖަވާބުގައި ކުޅެން ނުކުމެ ޕާކިސްތާން މޮޅުވީ 39.3 އޯވަރުގެ ތެރޭގައި 194 ލަނޑު ހަދައިގެންނެވެ. އެ ޓީމުން އެންމެ ރަނގަޅަށް ކުޅުނީ 78 ލަނޑު ހެދި އިމާމުލް ހައްގު އާއި 63 ލަނޑު ހެދި މުހައްމަދު ރިޒްވާނެވެ.

ބަންގްލަދޭޝް އާއި ޕާކިސްތާނާއެކު ގަދަ ހަތަރެއްގައި ކުޅެނީ އިންޑިޔާ އާއި ސްރީލަންކާ އެވެ. މި މުބާރާތް ކުޅެނީ ޕާކިސްތާނުގައި ހަތަރު މެޗު އަދި ބާކީ މެޗުތައް ލަންކާގައެވެ.