ތުރުކީވިލާތާއި ގްރީސް އަދި ބަލްގޭރިޔާގެ ސަރަޙައްދުތަކަށް މިހާރު ކުރަމުންދާ ބޯ ވިއްސާރައިގައި ހިނގި އެކި ހާދިސާތަކުގައި ފަސް މީހުން މަރުވެއްޖެއެވެ. ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ތުރުކީވިލާތުގެ ހުޅަނގުއުތުރުގައި އޮންނަ ކިރްކްރަލޭރީ ޕުރޮވިންސަށެވެ. އެއީ، ފަތުރުވެރިންގެ މެދުގައި މަޤުބޫލު ސަރަޙައްދެކެވެ.
ކްރިކްރަލޭރީއަކީ ތުރުކިވިލާތާއި ގްރީސް އަދި ބަލްގޭރިޔާ ގުޅޭ ސަރަޙައްދީ ރޮނގު ކައިރީގައި އޮންނަ ޕުރޮވިންސެކެވެ. ތުރުކީވިލާތުގެ ދާޚިލީ ވަޒީރު ޢަލީ ޔާލިކަޔާ ވިދާޅުވީ ކްރިކްރަލޭރީގައި ފަތުރުވެރިން ދަތުރުދާ ސަރަޙައްދެއްގައި ހުރި ކޭމްޕެއްގައި ފެންބޮޑުވެ، ދެ މީހަކު އޮޔާ ގެންގޮސްފައިވާ ކަމުގައެވެ. އަދި، އެ ސަރަޙައްދުން ގެއްލިފައިވާ ކަމަށް ބެލެވޭ އިތުރު ހަތަރު މީހަކު ހޯދުމަށް މަސައްކަތް ކުރަމުންދާ ކަމުގައެވެ.
އެ ކޭމްޕު އޮންނަ ސަރަޙައްދުގައި ފެންބޮޑުވި ވަގުތު އެ ތަނުގައި 12 ވަރަކަށް މީހުން ތިބި ކަމުގައި ތުރުކީވިލާތުގެ ދާޚިލީ ވުޒާރާއިން ބުނެއެވެ. ޔާލިކަޔާ ވިދާޅުވީ މަރުވެފައިވާ ދެ މީހެއްގެ ހަށިގަނޑު އެ ސަރަޙައްދުން ފެނިފައިވާ ކަމަށާއި، ހަ މީހަކު ރައްކާތެރިކަމާ އެކު ސަލާމަތް ކުރެވިފައިވާ ކަމުގައެވެ.
ތުރުކީވިލާތަށް ކުރަމުންދާ ވިއްސާރައިގެ އަސަރު، އެ ޤައުމުގެ އެންމެ ބޮޑު ރަށް ކަމުގައިވާ އިސްތަންބޫލަށް ވެސް ދަނީ ކުރަމުންނެވެ. އެ ރަށުގެ ދެ ސަރަޙައްދެއްގައި ފެންބޮޑުވެފައިވާ ކަމުގައި އޮފިޝަލުން ވިދާޅުވިއެވެ. އަދި، ޢާންމުންގެ ގެދޮރާއި ވިޔަފާރިކުރާ އަދި އޮފީސް ޢިމާރާތްތަކުގެ ތެރެއަށް ފެންވަދެ، ބޮޑެތި ގެއްލުންތަކެއް ލިބިފައިވާ ކަމުގައި ވެސް އޮފިޝަލުން ވިދާޅުވިއެވެ.
ފެންބޮޑުވުމާ ގުޅިގެން އިސްތަންބޫލުގެ ބައެއް ސަރަޙައްދުތަކުގައި ސަބްވޭ ރޭލުގެ ޚިދުމަތް ވެސް ވަނީ މެދުކަނޑައިލާފައެވެ. އަދި، ގިނަ ޢަދަދެއްގެ ބަޔަކު ވަނީ އެ މީހުންގެ ގެދޮރާއި އެހެން ޢިމާރާތްތަކުގައި ތާށިވެފައެވެ. ޢާންމު ޚިދުމަތްދޭ ޢިމާރާތްތަކުގައި ތާށިވެފައިވާ މީހުންނަށް އެހީތެރިކަން ފޯރުކޮށްދޭން މަސައްކަތް ކުރަމުންދާ ކަމުގައި އިސްތަންބޫލުގެ ގަވަރުނަރު ދަވުތް ގުލް ވިދާޅުވިއެވެ.
ތުރުކީވިލާތުގެ ކާރިސާތަކާ ބެހޭ އިދާރާއިން ބުނީ ކުރިއަށް އޮތް ދުވަސްތަކުގައި ވެސް އެ ޤައުމުގެ ހުޅަނގާއި ހުޅަނގުދެކުނުގައިވާ ސަރަޙައްދުތަކަށް ބޯކޮށް ވާރޭވެހި ފެންބޮޑުވާނެ ކަމަށް ބެލެވޭ ކަމުގައެވެ. މި ކަމާ ގުޅިގެން ރައްކާތެރި ކަމުގެ ފިޔަވަޅުތައް އެޅުމަށް އެ ސަރަޙައްދުތަކުގައި ދިރިއުޅޭ ރައްޔިތުންނަށް އެ އިދާރާއިން ވަނީ އިރުޝާދު ދީފައެވެ.
ގްރީސްއަށް ބަލައިލާއިރު، ފެންބޮޑުވުމުގެ އަސަރު އެންމެ ބޮޑަށް ކޮށްފައިވާ ސަރަޙައްދުތަކުގެ ތެރޭގައި ފަރުބަދަމަތީ ސަރަޙައްދެއް ކަމުގައިވާ ޕޭލިޔޯގެ ރަށެއް ކަމުގައިވާ ވޯލްޔޯސްގެ އިތުރުން ރިސޯޓު ރަށެއް ކަމުގައިވާ ސްކާތޯސް ހިމެނެއެވެ. ފެންބޮޑުވުމާ ގުޅިގެން އެ ސަރަޙައްދުތަކުގެ ގިނަ މަގުތައް ވަނީ ބަންދުކޮށްފައެވެ. އަދި، އެ ސަރަޙައްދުތަކުގައި ދިރިއުޅޭ ރައްޔިތުން ވަނީ ގެދޮރުގައި ތާށިވެފައެވެ.
ފެންބޮޑުވުމާ ގުޅިގެން ވޯލްޔޯސުން އެކަކު މަރުވެފައިވާ ކަމަށް އޮފިޝަލުން ވިދާޅުވިއެވެ. އެ މީހާ ޢިމާރާތެއްގެ ފާރު ވެއްޓި، އޭގެ ދަށުވުމާ ގުޅިގެންނެވެ. ފެންބޮޑުވުމާ ގުޅިގެން ގްރީސްއިން ވެސް ފަސް މީހަކު ގެއްލިފައިވާ ކަމަށް ބެލެވޭއިރު، އެ މީހުން ހޯދުމަށް ޓީމުތަކުން މިހާރު ދަނީ މަސައްކަތް ކުރަމުންނެވެ.
ގްރީސްގެ މޫސުމާ ބެހޭ އިދާރާއިން ބުނީ ފާއިތުވި 24 ވަރަކަށް ގަޑިއިރުގެ ތެރޭގައި ޕޭލިޔޯއަށް 760 މިލިމީޓަރުގެ ވާރޭ ވެހިފައިވާ ކަމުގައެވެ. ޕޭލިޔޯގެ ބައެއް ސަރަޙައްދުތަކުގެ ބިންގަނޑު ކެނޑި، މަގުތައް ބަންދުވެފައިވާއިރު، އެ ރަށުގެ ބައެއް ސަރަޙައްދުތަކުން ކަރަންޓުގެ ޚިދުމަތް ކެނޑިފައިވާ ކަމުގައި ވެސް އޮފިޝަލުން ވިދާޅުވިއެވެ. ވިއްސާރައާ ގުޅިގެން އެ ސަރަޙައްދުތަކުގެ ވައިގެ ދަތުރުފަތުރަށް ވެސް ވަނީ ހުރަސް އެޅިފައެވެ.