އޭއެފްސީ 23 އަހަރުން ދަށުގެ މުބާރާތުގެ ކޮލިފައިން ފެށުމުގެ އެއް ދުވަސް ކުރިން ރާއްޖެއިން މުބާރާތުގައި ބައިވެރިނުވާން ނިންމައި، މުބާރާތުން ވަކިވެއްޖެއެވެ.
ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީ ހުސެއިން ޖަވާޒް ވިދާޅުވީ މި ނިންމުން ނިންމީ ޓިކެޓު ހަމަނުޖެހުމުން ކަމަށާއި މުބާރާތުގައި ރާއްޖެ ކުޅެންޖެހޭ މެޗު ފަސްކޮށްދިނުމަށް ވެސް އެދުނު ކަމަށެވެ.
ރާއްޖެ ހިމެނޭ ގުރޫޕްގެ ކޮލިފައިން އޮންނާނީ ޗައިނާގަ އެވެ. ރާއްޖެއާއެކު ގްރޫޕް ޖީގައި ހިމެނެނީ އިންޑިޔާއާ، ޗައިނާ އަދި ޔޫއޭއީ އެވެ. ޝެޑިއުލްގައިވާ ގޮތުން މިއަދު ރާއްޖެ ކުޅެންޖެހޭ މެޗުގައި ބައްދަލުކުރަން އޮތީ އިންޑިއާ އާއެވެ.
އެފްއޭއެމުން ބުނީ، މިދިޔަ މަހުގެ ހަތްވަނަ ދުވަހު، މި މެޗުތަކާ ގުޅޭ މައުލޫމާތު ޔޫތު މިނިސްޓްރީއާ ހިއްސާކޮށް ޓިކެޓްގެ ހަރަދުތަކާއި އެހެނިހެން މައުލޫމާތު ހިއްސާކޮށްފައިވާނެ ކަމަށެވެ. މިނިސްޓްރީގެ އެހީއާ ނުލައި ޓިކެޓްގެ އަގަށްވާ މިލިއަނެއްހާ ރުފިޔާ ފަހުވަގުތު އެފްއޭއެމަށް ހޯދުނު ނަމަވެސް ފައިސާ ލިބުނުލެއް ލަސްވުމުން ދަތުރުގެ އިންތިޒާމްތައް ހަމަނުޖެހުނު ކަމަށް އެފްއޭއެމުން ބުންޏެވެ.
އިންޑިއާގެ އެފްއޭއާއެކު މެޗު ފަސްކޮށްދޭން ވާހަކަ ދެކެވުނު ކަމަށާއި މުބާރާތުން ވަކިވާން ނިންމީ އެގޮތަށްވެސް އެއްބަސްނުވެވުމުން ކަމަށް އެފްއޭއެމުން މައުލޫމާތުދެއެވެ.