ކޮންޓެއިނަރ ޕާކުގައި ތަރައްޤީކުރި "ކޯ ވޯކިންގ ސްޕޭސް" ހުޅުވައިފި

ހައުސިން ޑިވެލޮޕްމަންޓް ކޯޕަރޭޝަނުން ހުޅުމާލޭގައި ތަރައްޤީކުރި ކޮންޓެއިނަރ ޕާރކްގެ ކޯ ވޮރކިންގ ސްޕޭސް ރަސްމީކޮށް ހުޅުވައިފިއެވެ.

ކޯ-ވޯކް ސްޕޭސްއަކީ ހައި ސްޕީޑް އިންޓަރނެޓާއި، ޕްރިންޓިންއާއި، އޮފީހަކަށް ބޭނުންވާ ގިނަ ހިދުމަތްތަކަކާއެކު ވަރަށް ކުޑަ އަގެއްގައި މަސައްކަތްކޮށްލެވޭނެ އޮފީސް ޖާގައެކެވެ.

މިތަން ހުޅުވައިދެއްވީ އިކޮނޮމިކް މިނިސްޓްރީގެ ޑެޕިއުޓީ މިނިސްޓަރ ރިޔާޒް މަންސޫރެވެ.

ކޮންޓެއިނަރ ޕާރކްއަކީ މިނިސްޓްރީ އޮފް އިކޮނޮމިކް ޑިވަލޮޕްމެންޓް، ބިޒްނަސް ސެންޓަރ ކޯޕަރޭޝަން އަދި އެޗްޑީސީ ގުޅިގެން ކުރިއަށް ގެންދިޔަ މަޝްރޫއެކެވެ. ކޮންޓެއިނަރ ޕާކް އަކީ، ހުޅުމާލެ ޒަމާނީ "އަރބަން" ސިޓީއެއްގެ ގޮތުގައި ތަރައްގީކުރުމަށް އެޗްޑީސީން ކުރިއަށްގެންދާ މަޝްރޫއުތަކުގެ ތެރެއިން އެއް މަޝްރޫއުކަމަށް އެ ކުންފުނިން ވިދާޅުވެއެވެ.

މި ކޮންޓެއިނަރ ޕާކަކީ ޒަމާނީ އަދި "އާޓިސްޓިކް" ޕްލޭނެއްގެ ދަށުން، ހުޅުމާލެއަށް އިތުރު ފުރިހަމަކަމެއް ގެނެސްދޭނެ ގޮތަކަށް ތައްޔާރުކޮށްފައިވާ ތަނެއްކަމަށް އެ ކުންފުނިން ބުނެއެވެ.

މިތަން ހުޅުވުމަށްފަހު ވާހަކަދައްކަވަމުން އިކޮނޮމިކް މިނިސްޓްރީގެ ޑެޕިއުޓީ މިނިސްޓަރ ރިޔާޒް މަންސޫރު ވިދާޅުވީ، ކުދި ވިޔަފާރިއަށް ފަސޭހަކޮށްދިނުމުގެ ގޮތުން މި ސަރުކާރުން ގިނަ މަސައްކަތްތަކެއް ކުރަމުންދާކަމަށެވެ. ޖާގައަކީ ކުދި ވިޔަފާރިތަކަށް މިހާރު ދިމާވާ އެންމެ ބޮޑު މައްސަލަކަން އޭނާ ފާހަގަކުރެއްވިއެވެ.

ކުދި ވިޔަފާރިތަކަށް ފަހި މާހައުލެއް ޤާއިމްކޮށްދިނުމަށް މި ސަރުކާރުން ފެށި ބައެއް މަޝްރޫއުތަކުގެ ތެރޭގައި އެސްއެމްއީ ހަބް އަދި އޮތެންޓިކް މޯލްޑިވްސް އަކީ ކާމިޔާބު މަސައްކަތެއްކަމަށް ރިޔާޒް މަންސޫރު ފާހަގަކުރެއްވިއެވެ. އެގޮތުން މިހާރު ކުޅުދުއްފުއްޓާއި އަދި އައްޑޫގައިވެސް އެސްއެމްއީ ހަބެއް ހުޅުވުމުގެ މަސައްކަތް ކުރަމުންދާކަން އޭނާ ފާހަގަކުރެއްވިއެވެ.

“މިފަދަ ތަންތަން ހަދަމުން މިދަނީ ހަމައެކަނި މާލެއަކު ނޫން. އަޅުގަނޑުމެން މިހާރު އެބަ ގާއިމްކުރަން އެސްއެމްއީ ހަބްއެއް ކުޅުދުއްފުށީގައި. މަސައްކަތް މިހާރު ދަނީ ކުރިއަށް. ފަންޑިން ވަނީ ހަމަޖެހިފައި. އިއުލާންވެސް ވަނީ ކުރެވިފައި. އިރާދަކުރެއްވިއްޔާ ކޮންޓްރެކްޓް އެވޯޑްކޮށް މަސައްކަތް ފެށޭނެ މިމަހުގައި ނޫނީ އަންނަ މަހުގައި. ހަމައެހެންމެ އެސްއެމްއީ ހަބްގެ ފެސިލިޓީއެއް އައްޑޫގައިވެސް ޤާއިމްކުރުމުގެ މަސައްކަތް މިދަނީ ކުރަމުން." ރިޔާޒް މަންސޫރު ވިދާޅުވިއެވެ.

އެޗްޑީސީގެ ޑެޕިއުޓީ މެނޭޖިންގ ޑިރެކްޓަރ އަޙްމަދު ޤައިސް ވިދާޅުވީ، މި ކޯ ވޮރކިންގް ސްޕޭސް މުސްތަޤްބަލުގައި އިތުރަށް ތަރައްޤީވެގެންދާނެކަމަށެވެ. އެގޮތުން މިތަނުގައި ޓޭކްއަވޭ ކެފޭއަކާއި، ފާސްޓް ފުޑް އައުޓްލެޓް އަދި މީޓިން ރޫމެއް ހެދި، މި ސަރަހައްދުގެ އޯޕަން އޭރިއާ އާންމުންނަށް އެއްވެ އުޅެވޭ ޕާކެއްގެ ގޮތުގައި ތަރައްގީކުރެވިގެންދާނެކަން އޭނާ ފާހަގަކުރެއްވިއެވެ.

މިތަން ނިމޭއިރުގައި 25 ސްޓޭޝަން ވޯކް ސްޕޭސްގެ ގޮތުގައި ކުދި ވިޔަފާރިތަކަށް ހުޅުވިގެންދާނެ. އަދި ހަމައެހެންމެ 2 ކެޕޭއެއްގެ ހިދުމަތާއި، ހިތްގައިމު ޕާކެއް ތަރައްޤީކޮށް ނިންމާނަން” ޤައިސް ވިދާޅުވިއެވެ.

މި ކޯ ވޮރކިންގ ސްޕޭސް މެދުވެރިކޮށް ހުޅުމާލޭގައި އަލަށް ވިޔަފާރިތައް ފަށާ ފަރާތްތަކަށާއި، އެފަދަ ފުރުސަތުތައް ބޭނުންވާ މީހުންނާއި، ގްރޫޕްތަކަށް އެ ފުރުސަތު ފަހިކޮށްދެވިގެންދާނެކަމަށް އެޗްޑީސީން ބުނެއެވެ. އަދި މި ކޯ ވޮރކިންގ ސްޕޭސް ފުރަތަމަ މަހު ދޭނީ ހިލެއެވެ. މި ސްޕޭސް އަށް އޮންލައިން ޕޯރޓަލްއެއް މެދުވެރިކޮށް ބުކްކޮށްލެވޭނެއެވެ.

ކޯ ވޮރކިންގ ސްޕޭސް ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:00 އިން އިރުއޮއްސި 6:00 އެއް ޖެހުމާއި ހަމައަށް ހުންނާނީ ހުޅުވާފައެވެ. މި ކޮންޓެއިނަރ ޕާކުގެ މައިގަނޑު މަގްސަދަކީ ލައިވްލީ އަދި ކޮމިއުނިޓީ އެންގޭޖިންގ މާހައުލެއް ބިނާކޮށް އާޓިސްޓުންނަށްވެސް ފުރުސަތު ލިބިގެންދާނެ ފަދަ ހަބެއް ތައްޔާރުކުރުންކަމަށް އެޗްޑީސީން ބުނެއެވެ.

ކުދި ވިޔަފާރިތަކަށް އަމާޒުކޮށްގެން މަސައްކަތްކުރާނެ ޖާގައެއް ހޯދައިދިނުމަށް ބީސީސީން ފުރަތަމަ ތަރައްޤީކުރި ކޯ ވޯކް ސްޕޭސް "ސީޑް ބައި ބީސީސީ" ހުޅުވީ 2021 ވަނަ އަހަރުގެ ޖުލައިމަހުގެ ތެރޭގައެެވެ. ސީޑް ބައި ބީސީސީގައި އެއްފަހަރާއި ގާތްގަނޑަކަށް 40 މީހުންނަށް މަސައްކަތްކުރެވޭނެއެވެ.