މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމުކޮށްގެން ބޭއްވި ޤައުމީ ބިލިއާޑް މުބާރާތުގެ ޓީމު އިވެންޓުގެ ޗެމްޕިއަންކަން ކުލަބު އީގަލްސްއިން ހޯދައިފިއެވެ.
މުބާރާތް ކުރިޔަށްދިޔައީ އޮގަސްޓް މަހުގެ 17 އިން މި މަހުގެ ދެވަނަ ދުވަހުގެ ނިޔަލަށް ގައުމީ ބިލިއާޑް ސެންޓަރުގެ އިންޑޯ ހޯލްގައެވެ. މުބާރާތުގެ ޓީމު އިވެންޓުގެ ޗެމްޕިއަންކަން އީގަލްސް ހޯދިއިުރ، މި ބައިގައި ހަ ޓީމެއް ވާދަކޮށްފައިވެއެވެ. އެއީ، އީގަލްސް، ދިވެހި ސިފައިންގެ ކްލަބާއި، ފޯކައިދޫ ސްޕޯޓްސް ކްލަބުގެ އިތުރުން ބީޖީ ސްޕޯޓްސް ކްލަބާއި، އައިލެންޑާސް ހޯޕް ސްޕޯޓްސް ކްލަބު އަދު ޓެންޓް ސްޕޯޓްސް ކްލަބެވެ.
މުބާރާތުގެ ޓީމް އިވެންޓްގެ ޗެމްޕިއަންކަން އީގަލްސް ހޯދީ ފައިނަލްގައި 3-2 އިން ފޯކައިދޫ ބަލިކޮށްގެންނެވެ. މުބާރާތުގެ ދެވަނަ ޓީމަކަށް ފޯކައިދޫ ހޮވުނުއިރު، ތިންވަނަ ޓީމަކަށް ހޮވުނީ ދިވެހި ސިފައިންގެ ކުލަބެވެ.
މުބާރާތުގެ މިކްސް ޑަބަލްސް ޗެމްޕިއަންކަން ހޯދީ އަލީ ފަޔާޒް އާއި ދީނާ އަހުމަދުގެ ޕެއާ އެވެ. އެއްވަނަ ޑިވިޝަނުގެ ފިރިހެން ސިންގަލްސް ޗެމްޕިއަންކަން ހޯދީ ހަސަން ޝާޒް އެވެ. މި އިވެންޓްގެ ދެވަނަ ހޯދީ މުޙައްމަދު ޝަރީފެވެ. އަންހެން ސިންގަލްސް ޗެމްޕިއަންކަން ހޯދީ ދީނާ އަހުމަދު އެވެ.
ފިރިހެން ޑަބަލްސް ޗެމްޕިއަންކަން އިސްމާއިލް ސުވެއިދު އާއި އަބްދުﷲ އަފީފްގެ ޕެއާ ހޮވުނުއިރު، ދެވަނަ އަށް ދިޔައީ އަހުމަދު ނަފީލް އާއި މުޙައްމަދު ސާހިލްގެ ޕެއާ އެވެ. އަންހެން ޑަބަލްސް ޗެމްޕިއަނުންނަކ ފަތީ އާއި އައިޝަތު ޔަޝްފާގެ ޕެއާ އެވެ.