ޔޫކްރެއިނަށް އަރާފައިވާ ރަޝިޔާގެ އިސްތިޢުމާރީ ސިފައިންނާ ދެކޮޅަށް ޔޫކްރެއިނުން ފަށާފައިވާ ކައުންޓަރއޮފެންސިވް ނުވަތަ ރައްދު ހަމަލާގެ އަސްކަރީ ކެމްޕޭނުގައި ބޮޑެތި ކުރިއެރުންތަކެއް ހޯދިފައިވާ ކަމުގައި އެ ޤައުމުގެ ރައީސް ވޮލޮޑޮމީރް ޒެލެންސްކީ ވިދާޅުވެއްޖެއެވެ. ކައުންޓަރއޮފެންސިވްގައި ލިބެމުންދާ ކާމިޔާބީތަކުގެ ވާހަކަ ޒެލެންސްކީ ދައްކަވާފައި މި ވަނީ، އެ ކެމްޕޭނުގައި ހޯދަމުންދާ ކުރިއެރުންތަކުގެ ޢަދަދު މަދު ކަމަށް ބުނެ ފާޑުކިޔުންތައް އަމާޒުވެފައިވާ ދަނޑިވަޅެއްގައެވެ.
ރަޝިޔާގެ ސިފައިން ޔޫކްރެއިނަށް ފޮނުވައިގެން ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ޔޫކްރެއިންގެ އިރުމައްޗާއި ދެކުނުގެ ބައެއް ސަރަޙައްދުތަކަށް ރަޝިޔާގެ ފައުޖުތަކުން އަތްގަދަ ކޮށްފައިވާއިރު، ރަޝިޔާގެ ފައުޖުތަކާ ދެކޮޅަށް ޔޫކްރެއިނުން ކައުންޓަރއޮފެންސިވް ފަށާފައި ވަނީ މީގެ ތިން ވަރަކަށް މަސް ކުރިންނެވެ.
ނަމަވެސް، ޔޫކްރެއިންގެ ފައުޖުތަކަށް ދަނީ ބޮޑެތި ހުރަސްތަކަކާ ކުރިމަތިވަމުންނެވެ. އެއް ސަބަބަކީ، އަތްގަދަ ކޮށްފައިވާ ސަރަޙައްދުތަކަށް ދަތުރުކުރެވެން އޮންނަ ހުރިހާ މަގެއްގައި ރަޝިޔާއިން މައިން ހަރުކުރުމެވެ. ނަމަވެސް، ރަޝިޔާ ސިފައިންގެ އަތްދަށުގައިވާ ބައެއް އަވަށްތަކާއި ރަށްތައް މިހާރު މިނިވަން ކުރެވިފައިވާ ކަމުގައި ޒެލެންސްކީ ވިދާޅުވިއެވެ.
"ޔޫކްރެއިންގެ ފައުޖުތަކުން ދަނީ ޖެހެމުން. ރަޝިޔާގެ ފައުޖުތައް ފަހަތަށް ޖައްސަމުން. ކޮންމެ މީހަކު ކޮންމެ އެއްޗެކޭ ކިޔަސް، ޔޫކްރެއިންގެ ފައުޖުތަކުން އެ ދަނީ ކުރިއެރުންތައް ހޯދަމުން. އެންމެ މުހިންމު ކަމަކީ އެ ކުރިއެރުންތައް ދެމެހެއްޓުން،" ޒެލެންސްކީ ވިދާޅުވިއެވެ. މި ކައުންޓަރއޮފެންސިވް ކުރިއަށް ގެންދިޔުމުގައި ޔޫކްރެއިނަށް އެންމެ ބޮޑު އެހީތެރިކަމެއް ފޯރުކޮށްދެމުން ދަނީ ހުޅަނގުގެ ބާރުތަކުންނެވެ. އެމެރިކާއާއި ނޭޓޯގެ މެންބަރު ޤައުމުތަކުންނެވެ.
ކައުންޓަރއޮފެންސިވްގައި ޔޫކްރެއިންގެ ފައުޖުތަކަށް ކުރިއެރުންތަކެއް ނުލިބޭ ނަމަ، އެމެރިކާއާއި ނޭޓޯއިން ފޯރުކޮށްދެމުންދާ އަސްކަރީ އެހީތެރިކަން ހުއްޓައިލާނެ ކަމުގެ ބިރު ޔޫކްރެއިނަށް އޮތް ކަމުގައި މަސްރަޙު ދިރާސާކުރާ ފަރާތްތަކުން ގަބޫލު ކުރެއެވެ. ޔޫކްރެއިންގެ ފައުޖުތަކަށް ބޭނުންވާ ޒަމާނީ ހަތިޔާރު ފޯރުކޮށްދޭން އެމެރިކާއާއި ނޭޓޯގެ މެންބަރު ޤައުމުތަކުން މިހާތަނަށް އެތަކެއް ބިލިޔަން އެމެރިކާ ޑޮލަރެއް ވަނީ ހޭދަކޮށްފައެވެ.
ޔޫކްރެއިންގެ ދިފާޢީ ވަޒީރުގެ ނައިބު ހަނާ މަލިއާރް ވިދާޅުވީ އެ ޤައުމުގެ ދެކުނުގައިވާ ޒަޕޮރީޜިޔާ ސަރަޙައްދުގައި ޔޫކްރެއިންގެ ފައުޖުތަކުން ބޮޑެތި ކުރިއެރުންތަކެއް ހޯދަމުންދާ ކަމުގައެވެ. މި ގޮތުން، ރަޝިޔާގެ ސަފުތައް ފޫއަޅުވައިލާފައިވާ ކަމަށާއި، އެ ސަރަޙައްދުގައި ތިބި ރަޝިޔާގެ ފައުޖުތައް ފަހަތަށް ޖެއްސުމަށް ބުރަ މަސައްކަތްތަކެއް ކުރަމުންދާ ކަމުގައެވެ. ނަމަވެސް، ރަޝިޔާގެ ފައުޖުތަކުން އެ ސަރަޙައްދުތަކުގައި ވަރުގަދަ ދިފާޢީ ސަފުތަކެއް ގާއިމުކޮށްފައިވާ ކަމުގައި މަލިއާރް ވިދާޅުވިއެވެ.
އެމެރިކާއިން ވެސް ވަނީ، ޔޫކްރެއިންގެ ކައުންޓަރއޮފެންސިވްގައި ބޮޑެތި ކުރިއެރުންތަކެއް ހޯދަމުންދާ ކަމަށް ބުނެފައެވެ. ޔޫކްރެއިނުން ބުނީ ޒަޕޮރީޜިޔާގައި ރަޝިޔާ ސިފައިން އަތްގަދަކޮށްފައިވާ މަލިތޮޕޮލް މިނިވަން ކުރަން އެ ޤައުމުގެ ފައުޖުތަކުން މިހާރު މަސައްކަތް ކުރަމުންދާ ކަމުގައެވެ. އަދި، އެ ސަރަޙައްދުގައި ހަރަކާތްތެރިވަމުންދާ ރަޝިޔާގެ ފައުޖުތަކަށް ވަރުގަދަ ހަމަލަތަކެއް އަމާޒު ކުރަމުންދާ ކަމުގައެވެ.
ރަޝިޔާ-ޔޫކްރެއިން ހަނގުރާމައަށް 558 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.