އިރާޤުގެ އުތުރުގައި އޮންނަ ކިރްކުކް ޕުރޮވިންސުގައި ހަމަނުޖެހުން ބޮޑުވެ، އެ ސަރަޙައްދުގައި ކުއްލި ހާލަތު އިޢުލާނުކޮށްފިއެވެ. އެ ސަރަޙައްދުގައި ހަމަނުޖެހުން ހިނގަމުން ދަނީ ޢަރަބީންނާއި ކުރުދީ ދަރިކޮޅުގެ މީހުންނާ ދެމެދުގައެވެ. ހަމަނުޖެހުންތައް ފެށިފައި ވަނީ، އެ ސަރަޙައްދުގައި ހުންނަ ސަލާމަތީ ޚިދުމަތްތަކާ ބެހޭ ޢިމާރާތެއްގެ ބާރު އެ ސަރަޙައްދުގެ އިދާރާތަކާ ހަވާލުކުރަން މަސައްކަތް ކުރުމުން ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ޢަރަބީންނާއި ކުރުދީ ދަރިކޮޅުގެ މީހުންނާ ދެމެދު ހިނގަމުންދާ ހަމަނުޖެހުންތަކުގައި މިހާތަނަށް ޢާންމުންގެ އެކަކު ވަނީ މަރުވެފައެވެ. އަދި، ގިނަ ޢަދަދެއްގެ ބަޔަކަށް ވަނީ އަނިޔާވެފައެވެ. ކިރްކުކްގައި ކުއްލި ހާލަތު އިޢުލާނު ކުރުމަށް އަމުރު ކުރައްވާފައި ވަނީ ބޮޑުވަޒީރު މުޙައްމަދު ޝިޔާ އަލް-ސުދާނީއެވެ. އެ ސަރަޙައްދުގައި ހިނގަމުންދާ ހަމަނުޖެހުންތައް ކޮންޓްރޯލްކޮށް، ސުލްޙަ ގާއިމުކުރަން އޭނާ ވަނީ އިރާޤުގެ ސަލާމަތީ ބާރުތަކުގެ މައްޗަށް އަމުރު ކުރައްވާފައެވެ.
އަދި، ސުލްޙަ އިސްކޮށް، ހަމަނުޖެހުންތައް ހުއްޓައިލުމަށް ކިރްކުގައި ހިނގަމުންދާ ހަމަނުޖެހުންތަކުގެ ބައިވެރިންނަށް އޭނާ ވަނީ ގޮވައިލައްވާފައެވެ. ކިރްކުކްގައި ހިނގަމުންދާ ހަމަނުޖެހުންތަކުގައި މިހާތަނަށް އަށް މީހަކަށް އަނިޔާވެ، ފަރުވާދޭން ޖެހިފައިވާ ކަމުގައި އެ ސަރަޙައްދުގެ އޮފިޝަލުން ވިދާޅުވިއެވެ.
ކިރްކުކްގެ ޞިއްޙީ އިދާރާގެ އިސް އޮފިޝަލެއް ކަމުގައިވާ ޒިޔާދު ޚަލަފް ވިދާޅުވީ، ހަމަނުޖެހުންތަކާ ގުޅިގެން އެކަކު މަރުވެފައިވީ ނަމަވެސް، އެ މީހާ މަރުވާން މެދުވެރިވި ސަބަބު ދެނެގަނެވިފައި ނުވާ ކަމުގައެވެ. ނަމަވެސް، ޒަޚަމުވެފައިވާ ގިނަ މީހުންގެ ހަށިގަނޑަށް ވަޒަން އަރާފައިވާ ކަމުގައި އޭނާ ވިދާޅުވިއެވެ. އަދި، ގައު ފަދަ ތަކެތިން ޖެހި ބައެއް މީހުން ޒަޚަމުވެފައިވާ ކަމުގައި ވެސް އޭނާ ވިދާޅުވިއެވެ. ޒަޚަމުވި މީހުންގެ ތެރޭގައި ކިރްކުކްގެ ސަލާމަތީ ބާރުތަކުގެ މީހުން ވެސް ހިމެނެއެވެ.
އިރާޤުގެ އުތުރުގެ ބޮޑު ސަރަޙައްދެއް އޮތީ ކުރުދީ ދަރިކޮޅުގެ މީހުންގެ ބާރުގެ ދަށުގައެވެ. އެ މީހުންނަކީ ބަޣްދާދުގެ ސަރުކާރަށް ވަފާތެރިވާން ދެކޮޅު ހަދަމުންދާ ބަޔެކެވެ. އެ ސަރަޙައްދުގައި މި ވަގުތު ހިނގަމުންދާ ހަމަނުޖެހުންތައް ގުޅެނީ ކުރުދިސްތާން ވޯކަރސް ޕާޓީ (ކޭ.ޑީ.ޕީ)ގެ އޮފީސް ޢިމާރާތާއެވެ. 2017 ވަނަ އަހަރުން ފެށިގެން އެ ޢިމާރާތް އޮތީ އިރާޤުގެ އަސްކަރިއްޔާގެ ބާރުގެ ދަށުގައެވެ.
އިރާޤުގެ މައި ސަރުކާރުން މިހާރު މަސައްކަތް ކުރަމުން ދަނީ އެ ޢިމާރާތް އަލުން ކޭ.ޑީ.ޕީއާ ހަވާލު ކުރާށެވެ. ނަމަވެސް، މިއީ އެ ސަރަޙައްދުގައި ދިރިއުޅޭ ޢަރަބި ދަރިކޮޅު މީހުން ޤަބޫލު ނިންމުމެއް ނޫނެވެ. ޢަރަބި ދަރިކޮޅުގެ މީހުންނާ އެކު، އެ ސަރަޙައްދުގައި ދިރިއުޅޭ ތުރުކީ ދަރިކޮޅުގެ މީހުން ވެސް ދަނީ މައި ސަރުކާރުގެ މި ނިންމުމާ ދެކޮޅަށް އަޑު އުފުލަމުންނެވެ.
މިކަމާ ގުޅިގެން އުފެދިފައިވާ ހަމަނުޖެހުންތަކުގެ ތެރެއިން ދެ ފަރާތަށް ނިސްބަތްވާ މީހުން ވެސް ވަނީ، ޢާންމުންގެ ގެދޮރާއި، ސަރުކާރު ޢިމާރާތްތަކުގެ އިތުރުން ޢާންމުންގެ މުދަލަށް ވެސް ގެއްލުންދީފައެވެ. އަދި، ގިނަ ޢަދަދެއްގެ އެއްގަމު އުޅަނދުގައި ހުޅުޖަހައި، ބޮޑެތި ގެއްލުންތަކެއް ދީފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ހަމަނުޖެހުންތައް ހުއްޓުވަން ފުލުހުން ދަނީ މަސައްކަތް ކުރަމުންނެވެ.
ކިރްކުކަކީ ތެލުގެ މުއްސަނދި ކަން ލިބިފައިވާ ސަރަޙައްދެކެވެ. އިރާޤުގެ ބައެއް ސަރަޙައްދުތަކަށް އަތްގަދަ ކުރި އިސްލާމިކް ސްޓޭޓް (އައި.އެސް) ޖަމާޢަތުގެ ޓެރެރިސްޓުން 2014 ވަނަ އަހަރު ކިރްކުކްގެ ސަރަޙައްދުތަކުން ފައްސައިލުމުން ކުރުދީން ވަނީ އެ ސަރަޙައްދު ހިފާފައެވެ. ނަމަވެސް، 2017 ވަނަ އަހަރުގެ ތެރޭގައި އިރާޤުގެ އަސްކަރިއްޔާއިން ވަނީ އެ ސަރަޙައްދު ބަޣްދާދުގެ ބާރުގެ ދަށަށް ގެންގޮސްފައެވެ. ނަމަވެސް، އަލް-ސުދާނީގެ ސަރުކާރުން މިހާރު ބޭނުން ވަނީ އެ ސަރަޙައްދު ކުރުދީންގެ އަތްމައްޗަށް ދޫކޮށްލާށެވެ.